ဖိလစ်ပိုင်မှာ လေ့ကျင့်ရေးလေယာဉ်နှစ်စင်း ဝေဟင်ချင်းတိုက်မိပြီး လေသူရဲ ၄ ဦး သေဆုံး

ဖိလစ်ပိုင်မှာ လေ့ကျင့်ရေးလေယာဉ်နှစ်စင်း ဝေဟင်ချင်းတိုက်မိပြီး လေသူရဲ ၄ ဦး သေဆုံး

အောက်တိုဘာ ၂၆

ဖိလစ်ပိုင်နိုင်ငံမှာ လေ့ကျင့်ရေး လေယာဉ်နှစ်စင်း ဝေဟင်မှာ အချင်းချင်းတိုက်မိပြီး ပျက်ကျခဲ့တာကြောင့် ဖိလစ်ပိုင်လေတပ်က လေသူရဲ ၄ ဦး သေဆုံးသွားခဲ့ပါတယ်။

အဆိုပါ ဖြစ်စဉ်ဟာ အောက်တိုဘာ ၂၃ ရက် ညနေ ၃ နာရီ ၅၁ မိနစ်က ဘာတန်ဂတ်စ်ပြည်နယ်၊ လီပါစီးတီးမှာရှိတဲ့ ဖာနန်ဒို လေတပ်အခြေစိုက်စခန်းအတွင်း ပျံသန်းလေ့ကျင့်နေချိန် ဖြစ်ပွားခဲ့တာလို့ ဖိလစ်ပိုင်လေတပ်ဘက်က သတင်းထုတ်ပြန်ထားပါတယ်။

ပျက်ကျသွားတဲ့ လေယာဉ်တွေဟာ အီတလီဒီဇိုင်နာ စတယ်လီယို ဖရာတီ ရေးဆွဲထုတ်လုပ်ထားတဲ့ SF-260 အမျိုးအစား အပေါ့စား လေ့ကျင့်ရေးလေယာဉ်တွေ ဖြစ်တယ်လို့ သိရပါတယ်။

လေယာဉ်တွေပေါ် ပါသွားတဲ့ လေသူရဲ ၄ ဦးစလုံး သေဆုံးသွားခဲ့ပေမဲ့ လေယာဉ်တစ်စင်းစီမှာ ဘယ်နှစ်ဦးစီ ပါသွားသလဲဆိုတာနဲ့ သေဆုံးသူတွေရဲ့ အမည်စာရင်းကိုတော့ ဖိလစ်ပိုင်လေတပ်ဘက်က ထုတ်ဖော်ပြောထားခြင်း မရှိသေးပါဘူး။

လေတပ်ပြောရေးဆိုခွင့်ရှိသူ ဗိုလ်မှူးကြီး အယ်လ်ဗင် ဂျေး ကာပင်ဂွီယန်ကတော့ အခင်းဖြစ်ရတဲ့ အကြောင်းရင်းကို စုံစမ်းစစ်ဆေးနေပြီဖြစ်တယ်လို့ ပြောဆိုထားတဲ့အပြင် စုံစမ်းစစ်ဆေးမှုတွေ မပြီးမချင်း လက်ကျန် SF-260 လေ့ကျင့်ရေးလေယာဉ်အားလုံးကို ပျံသန်းမှု ယာယီရပ်ဆိုင်းထားတယ်လို့ ဆိုပါတယ်။

အမည်မဖော်လိုတဲ့ ဖိလစ်ပိုင်အစိုးရတာဝန်ရှိသူတွေရဲ့ အဆိုအရ လေယာဉ်နှစ်စင်းဟာ ဝေဟင်မှာ အချင်းချင်းတိုက်မိခဲ့တာဖြစ်ပြီး၊ လေယာဉ်တစ်စင်းဟာ လေတပ်စခန်းတွင်းက စစ်သည်တန်းလျားတွေအနီးကို ထိုးကျသွားခဲ့တယ်လို့ အေပီသတင်းဌာနက မျက်မြင်တွေ့ရှိသူတစ်ဦးရဲ့ စကားကို ကိုးကားဖော်ပြထားပါတယ်။

ပြီးခဲ့တဲ့ မေလတုန်းကလည်း ဖိလစ်ပိုင်မြောက်ပိုင်း တောင်တန်းဒေသမှာ SF-260 လေယာဉ်တစ်စင်း ပျက်ကျလို့ လေသူရဲ ၂ ဦး သေဆုံးခဲ့သလို၊ ၂၀၂၃ ခုနှစ်ကလည်း SF-260 TP Marchetti အမျိုးအစား လေယာဉ်တစ်စင်း ပျက်ကျပြီး လေသူရဲ ၂ ဦး သေဆုံးခဲ့ဖူးပါတယ်။

Ref & Photo: The Independent

မြို့တော် News Channel