ပါကစ္စတန်နိုင်ငံ အစ္စလမ္မာဘတ်မြို့က အစိုးရဆေးရုံတခုမှာ မီးလောင်မှု ဖြစ်ပွားခဲ့ပြီး မွေးကင်းစ ကလေးငယ် ၁၅ ဦးထက်မနည်း သေဆုံးခဲ့တယ်လို့ သိရပါတယ်။
မီးလောင်မှုဟာ ဩဂုတ် ၂၆ ရက်နေ့ မနက် ၇ နာရီဝန်းကျင်မှာ ပါကစ္စတန် ဆေးဘက်ဆိုင်ရာသိပ္ပံအင်စတီကျု (PIMS) ဆေးရုံရဲ့ မိခင်နဲ့ကလေးကျန်းမာရေးဌာန တတိယထပ်မှာ ဖြစ်ပွားခဲ့တာဖြစ်ပြီး အဲယားကွန်းစနစ် ချို့ယွင်းမှုကနေ မီးစတင်လောင်ကျွမ်းခဲ့တာလို့ ဒေသတွင်း ရုပ်သံဌာန Geo TV က ဆိုပါတယ်။
မီးလောင်ချိန်မှာ အဆိုပါဆောင်အတွင်း မွေးကင်းစကလေး ၁၆ ဦးရှိခဲ့ပြီး အဲဒီထဲက ကလေးငယ် ၁ ဦးကိုသာ အသက်ရှင်လျက် ကယ်ဆယ်နိုင်ခဲ့တာကြောင့် ကျန်တဲ့ကလေးငယ် ၁၅ ဦးစလုံး သေဆုံးခဲ့တယ်လို့ သတင်းမှာ ဖော်ပြထားပါတယ်။
အဆိုပါမီးလောင်မှုဟာ မကြာသေးခင်နှစ်တွေအတွင်း ပါကစ္စတန်နိုင်ငံမှာ ဖြစ်ပွားခဲ့တဲ့ ဆေးရုံမီးလောင်မှုတွေထဲက လူသေဆုံးမှုအများဆုံး ဖြစ်စဉ်တွေထဲကတခု ဖြစ်လာခဲ့ပါတယ်။
ပါကစ္စတန်နိုင်ငံမှာ အစိုးရ ကျန်းမာရေးစောင့်ရှောက်မှုကို ထောက်ပံ့ကြေးပေးထားပေမဲ့ ဆေးရုံသုံးပစ္စည်း ကိရိယာ မလုံလောက်မှု၊ လူနာဝန်ပိမှုတို့အပြင် အစိုးရဆေးရုံတွေရဲ့ စီမံခန့်ခွဲမှု အားနည်းချက်တွေကြောင့် လေ့လာစောင့်ကြည့်သူတွေရဲ့ ဝေဖန်မှုကို မကြာခဏ ခံရလေ့ရှိပါတယ်။
မီးလောင်မှုဖြစ်စဉ်နဲ့ ပတ်သက်ပြီး ပါကစ္စတန်ဝန်ကြီးချုပ် ရှက်ဘတ် ရှရစ်ဖ်က ချက်ချင်း စုံစမ်းစစ်ဆေးဖို့ သက်ဆိုင်ရာအာဏာပိုင်တွေကို ညွှန်ကြားထားပြီး ဖြစ်စဉ်အတွက် တာဝန်ရှိသူတွေကို ဖော်ထုတ်ကာ အပြင်းထန်ဆုံး အရေးယူမှုတွေ ပြုလုပ်သွားဖို့ ဝန်ကြီးချုပ်ရုံးက ထုတ်ပြန်ထားပါတယ်။
PIMS ဆေးရုံဟာ အစ္စလမ္မာဘတ်မြို့လယ်ပိုင်းမှာ တည်ရှိတဲ့ အစိုးရဆေးရုံတွေထဲက အဓိက ဆေးရုံတခုဖြစ်ပြီး ပြီးခဲ့တဲ့ သီတင်းပတ်အတွင်းကလည်း ဝန်ကြီးချုပ်ဟောင်း အီမရန်ခန်းဟာ အဆိုပါဆေးရုံမှာ ဆေးကုသမှု ခေတ္တခံယူခဲ့သေးတယ်လို့ သိရပါတယ်။
Ref & Photo; Reuters
နိုင်ငံတကာသတင်း
