အမေရိကန်မှာ ခိုလှုံခွင့်လျှောက်ထားသူတွေရဲ့ ဗီဇာတွေကို ရုပ်သိမ်းဖို့ ထရမ့်အစိုးရ စီစဉ်နေ

အမေရိကန်မှာ ခိုလှုံခွင့် (Asylum) လျှောက်ထားထားသူတွေနဲ့ လက်ရှိ လျှောက်ထားဆဲ နိုင်ငံခြားသားတွေရဲ့ ယာယီပြည်ဝင်ခွင့်ဗီဇာ (non-immigrant visas) တွေကို ရုပ်သိမ်းသွားဖို့ သမ္မတ ဒေါ်နယ်ထရမ့်ရဲ့ အစိုးရအဖွဲ့က စီစဉ်နေတယ်လို့ သိရပါတယ်။

အမေရိကန် နိုင်ငံခြားရေးဝန်ကြီးဌာနရဲ့ ပြောရေးဆိုခွင့်ရှိသူကတော့ ကာလတို လာရောက်လည်ပတ်သူတွေအဖြစ် အမေရိကန်ကို ရောက်ရှိလာပြီးနောက် အမြဲတမ်းနေထိုင်ခွင့်ရဖို့ ခိုလှုံခွင့်လျှောက်ထားသူတွေကို စိစစ်ဖော်ထုတ်ပြီး ဗီဇာရုပ်သိမ်းနိုင်ဖို့ ပြည်တွင်းလုံခြုံရေးဝန်ကြီးဌာနနဲ့ ပူးပေါင်းဆောင်ရွက်နေတယ်လို့ ဆိုပါတယ်။

ဒါပေမဲ့ ဗီဇာရုပ်သိမ်းမယ့် အရေအတွက်အတိအကျကိုတော့ နိုင်ငံခြားရေးဝန်ကြီးဌာနဘက်က ထုတ်ဖော်ပြောဆိုထားခြင်း မရှိသေးပါဘူး။

အေပီသတင်းဌာနကတော့ အမေရိကန် နိုင်ငံခြားရေးဝန်ကြီးဌာနရဲ့ စာရွက်စာတမ်းတွေနဲ့ အမေရိကန်အရာရှိ ၂ ဦးရဲ့ ပြောဆိုချက်တွေကို ကိုးကားပြီး စီးပွားရေးနဲ့ အလည်အပတ်ဗီဇာ ရုပ်သိမ်းခံရမယ့် နိုင်ငံခြားသားအရေအတွက်ဟာ ၂ သိန်းအထိ ရှိနိုင်တယ်လို့ ဖော်ပြပါတယ်။

အဆိုပါအစီအစဉ်သာ အကောင်အထည်ပေါ်လာခဲ့ရင် အမေရိကန်သမိုင်းမှာ အကြီးမားဆုံး အစုလိုက်အပြုံလိုက် ဗီဇာရုပ်သိမ်းမှု ဖြစ်လာနိုင်ပါတယ်။

အေပီသတင်းမှာ ဖော်ပြထားချက်အရ ၂၀၁၆ ခုနှစ်ကနေ ၂၀၂၆ ခုနှစ်အတွင်း ထုတ်ပေးထားတဲ့ B1 စီးပွားရေးဗီဇာနဲ့ B2 အလည်အပတ်ဗီဇာ ကိုင်ဆောင်ထားသူတွေထဲက ခိုလှုံခွင့် လျှောက်ထားထားသူ ဒါမှမဟုတ် လက်ရှိလျှောက်ထားဆဲဖြစ်သူတွေရဲ့ ဗီဇာတွေကို ရုပ်သိမ်းသွားမယ်လို့ ဆိုပါတယ်။

ဗီဇာရုပ်သိမ်းခံရတာနဲ့ ချက်ချင်း ပြည်နှင်ဒဏ်ပေးခံရမှာတော့ မဟုတ်ပါဘူး။ လက်ရှိ ခိုလှုံခွင့်အမှုတွေကို စောင့်ဆိုင်းနေသူ အများစုအနေနဲ့ အမှုကို ဆက်လက်စောင့်ဆိုင်းနိုင်ပေမယ့် စီးပွားရေးနဲ့ အလည်အပတ်ခရီးသွားလာသူအဖြစ် ရရှိထားတဲ့ ဗီဇာအဆင့်အတန်းကိုတော့ ဆုံးရှုံးရမှာ ဖြစ်ပါတယ်။

ဒါ့အပြင် ဩဂုတ်လအစောပိုင်းမှာပဲ ထရမ့်အစိုးရလက်ထက်အတွင်း နိုင်ငံခြားသား ၁၇၅,၀၀၀ ကျော်ရဲ့ ဗီဇာတွေကို ရုပ်သိမ်းခဲ့ပြီးဖြစ်တယ်လို့ အမေရိကန်နိုင်ငံခြားရေးဝန်ကြီးဌာနက ထုတ်ပြန်ထားပါတယ်။

Ref & Photo; Reuters