လူမှုကွန်ရက်မှာ တော်လှန်ရေးအင်အားစုတွေအတွက် လှုံ့ဆော်ဝါဒဖြန့်တယ်ဆိုတဲ့ စွပ်စွဲချက်နဲ့ ဖမ်းဆီးခံရ

တော်လှန်ရေးအင်အားစုတွေဖြစ်တဲ့ CRPH၊ NUG နှင့် PDF တို့ကို ထောက်ခံပြီး လှုံ့ဆော်တာတွေ ဝါဒဖြန့်တာတွေ လုပ်ဆောင်ခဲ့တယ်လို့ ဆိုကာ "သူရိယနေမင်း" TikTok အကောင့်ပိုင်ရှင်ကို အာဏာသိမ်း အစိုးရက ဩဂုတ်လ ၂၀ ရက်နေ့က ဖမ်းဆီးလိုက်တယ်လို့ သိရပါတယ်။

"သူရိယနေမင်း" TikTok အကောင့်ပိုင်ရှင်ဟာ ဒေါ်အောင်ဆန်းစုကြည်ပုံနဲ့ အနီ အစိမ်း နဲ့ပတ်သက်ပြီး TikTok ဆော့တာ၊ ဗိုလ်ချုပ်အောင်ဆန်းရဲ့ ပုံတွေနဲ့ နတ်မောက်နှင့် ဗိုလ်ချုပ်အောင်ဆန်းရဲ့ သမိုင်းကြောင်းကို တင်တာ၊ သရုပ်ဆောင် ကျော်သူရဲ့ အစိုးရကို ဝေဖန်တဲ့ ဇာတ်ဝင်ခန်း တစ်ခုကို ဖြတ်ညှပ်ကပ်ပြီး တင်တာ၊ NLD မဲဆွယ်ကာလက Video တွေ တင်တာ၊ ဒေါ်အောင်ဆန်းစုကြည်ရဲ့ ရေဘေးကယ်ဆယ်ရေး ခရီးစဉ်တွေကို TikTok ပေါ်မှာ တင်ခဲ့တာကြောင့် ခုလို အာဏာသိမ်း အစိုးရရဲ့ ဖမ်းဆီးခြင်း ခံခဲ့ရတာဖြစ်ပါတယ်။

"သူရိယနေမင်း" TikTok အကောင့်ပိုင်ရှင်ဟာ ရန်ကုန်တိုင်း၊ လှိုင်သာယာ(အရှေ့ပိုင်း)မြို့နယ်၊ အမှတ်(၁၅)ရပ်ကွက်မှာ နေထိုင်တဲ့ ကိုသန်းစိုးဦး (ခ)နေမင်း ဖြစ်တယ်လို့ သိရပါတယ်။

ကိုသန်းစိုးဦး (ခ) နေမင်း ကို ဩဂုတ်လ ၂၀ ရက်နေ့ ညနေ ၅ နာရီ ၁၀ မိနစ်ခန့်က သူ့ရဲ့ နေအိမ်မှာ ဖမ်းဆီးခံပြီး လှိုင်သာယာ(အရှေ့ပိုင်း) မြို့မရဲစခန်းမှာ ဖမ်းဆီးထိန်းသိမ်းထားကာ အမှုဖွင့်အရေးယူဖို့ လုပ်ဆောင်နေတယ်လို့ သိရပါတယ်။

အလားတူ သြဂုတ်လ ၇ ရက် မွန်းလွဲ ၁၂ နာရီ ၁၀ မိနစ်ခန့်ကလည်း ရန်ကုန်တိုင်း၊ မှော်ဘီမြို့နယ်၊ စမ်းချောင်းပေါက် ကျေးရွာနေ ရာကုပ် (ခ) ဂျိမ်းစ်ရာကုပ် ဆိုသူဟာ "James Yar Kot" Facebook Account၊ "Anna Moe" Facebook Account တို့နဲ့ လှုံ့ဆော်ဝါဒ ဖြန့်တယ်ဆိုတဲ့ စွပ်စွဲချက်နဲ့ မှော်ဘီမြို့မရဲစခန်းမှာ ဖမ်းဆီးထိန်းသိမ်းကာ အမှုဖွင့်အရေးယူ ခံခဲ့ရတယ်လို့ သိရပါတယ်။