၂ နှစ်ကျော်ကြာ ပိတ်ထားတဲ့ ဘားအံ - ကော့ကရိတ် - မြဝတီ အာရှလမ်းမကြီး ပြန်ဖွင့်ပြီ

၂ နှစ်ကျော်ကြာ ပိတ်ထားခဲ့ရသည့် အဓိကကုန်သွယ်ရေးလမ်းကြောင်း ပြန်လည်ဖွင့်လှစ်

ဧပြီလ ၂ ရက်နေ့တွင် ဘားအံ - ကော့ကရိတ် - မြဝတီ(အာရှလမ်း) ဖွင့်ပွဲကို တံတားဦးကျေးရွာ(လွန်းညရေပြာအိုင်အနီး)မှာ ကျင်းပပြုလုပ်မည်ဖြစ်ကြောင်း သိရပါသည်။ ပြည်နယ်အဆင့်ဌာနဆိုင်ရာများအား အဆိုပါအခမ်းအနားသို့ တက်ရောက်ရန် ကရင်ပြည်နယ်အစိုးရအဖွဲ့က မတ်လ ၃၁ ရက်နေ့က ဖိတ်ကြားထားသည်။

လမ်းပိတ်ခဲ့ရခြင်း နောက်ခံအကြောင်းရင်းများ

အာရှလမ်းမကြီးကို တိုက်ပွဲများကြောင့် လမ်းပိုင်းအချို့ ပျက်စီးမှုနှင့် နယ်မြေလုံခြုံရေး အခြေအနေတို့ကြောင့် ၂၀၂၃ ခုနှစ် ဒီဇင်ဘာလကတည်းက ပိတ်ထားခဲ့ခြင်း ဖြစ်ပါသည်။

အာရှလမ်းမကြီး ပိတ်ထားသည့် (၂) နှစ်ကျော် ကာလအတွင်းတွင် ခရီးသွားလာရေးနှင့် ကုန်သွယ်မှုအတွက် လမ်းဟောင်း (ဒေါနတောင်လမ်း)နှင့် ထိုးကော့ကိုး (ကြက်ဥတောင်လမ်း) တို့ကို အစားထိုး သုံးခဲ့ကြရပါသည်။

လမ်းပြန်ဖွင့်ခြင်း၏ စီးပွားရေးအကျိုးသက်ရောက်မှု

ကုန်သည် တဦးက အောက်ပါအတိုင်း မှတ်ချက်ပြုထားသည်။

"ကုန်ကား တစီးစာ လမ်းခရီးကုန်ကျစရိတ် သိန်း ၉၀ ကနေ သိန်း ၂၀ ကို ပြန်ရောက်မယ်ဆိုတော့ ကုန်စည်သယ်ယူစရိတ်တွေ လျှော့ကျပြီး စျေးကျလာမှာမို့ အများပြည်သူအတွက် အနည်းငယ် သက်သာလာလိမ့်မယ်၊ တောင်သူလယ်သမားတွေ၊ အလုပ်သမား လူတန်းစားတွေ၊ အနှေးယာဥ်မောင်း လုပ်သားတွေ၊ ကားသမားတွေနဲ့ စပယ်ယာတွေ အလုပ်ပြန်လုပ်လို့ရသွားမယ်၊ လမ်းကြောင်းကောင်းမှာ မောင်းနှင်ပြီး တချိန်ကလို အခေါက်ရည်စိပ်စိပ် ကုန်တိုက်နိုင်ကြမယ်၊ အကျိုးအမြတ်ရမယ့်သူတွေက ပြည်သူတွေဖြစ်ပြီး အကျိုးယုတ်မှာက လုပ်စားဖို့ခွက်ခေါက် မရသူတွေ ဖြစ်မှာပါ၊ တော်လှန်ရေးကို စော်ကားလိုခြင်း မဟုတ်ပါဘူး၊ လူတစု တဖွဲ့ရဲ့ ကိုယ်ကျိုးနဲ့ အများပြည်သူ နစ်နာမှုကိုချိန်ဆကြည့်ရင် အမှန်တရားကို မြင်ရမှာပါ၊ ကိုယ်စီခံယူချက်တွေနဲ့မို့ မှန်တယ်ထင်ရင် ဆက်လုပ်ကြပါ၊ အချိန်ကြာလာတာနဲ့အမျှ ရည်မှန်းချက်နဲ့ ရောက်ရှိနေတဲ့နေရာ ကွဲပြားနေတာ အများပြည်သူက သိနေပြီပဲဗျာ၊ ပြည်သူ့အကျိုးကို ရှေးရှုပြီး ဒီလမ်းလေးကိုတော့ လက်လွှတ်ပေးသင့်ပြီ"

အနာဂတ်စိုးရိမ်စရာများနှင့် စောင့်ကြည့်ရမည့်အခြေအနေ

(၂) နှစ်ကျော်အကြာ ပိတ်ထားတဲ့ အာရှလမ်းမကြီးကို ပြန်လည်ဖွင့်လှစ်ဖို့ စစ်ကော်မရှင်ဘက်က ဆင်နေတာဖြစ်ပြီး နယ်မြေစိုးမိုးမှုနဲ့ လုံခြုံရေး အပိုင်းကတော့ ဆက်လက် စောင့်ကြည့်ရမယ့် အခြေအနေမှာ ရှိနေပါသည်။

မြို့တော် News Channel #myotawnews #myotaw