ဒီပဲယင်းတွင် နိုင်ငံရေးအကျဉ်းသားဟောင်း နေအိမ်မီးရှို့ခံရ

ဒီပဲယင်းမြို့နယ်က ရွာတရွာမှာ တိမ်းရှောင်နေတဲ့ နိုင်ငံရေးအကျဥ်းသား အိမ် မီးရှို့ခံရ

၂၀၂၆ စက်တင်ဘာ ၁ Myo Taw

စက်တင်ဘာ ၁

စစ်ကိုင်းတိုင်း၊ ဒီပဲယင်းမြို့နယ်က ကျေးရွာတရွာမှာ နိုင်ငံရေးအကျဥ်သား တဦးရဲ့ နေအိမ်ကို မသမာသူ လူတစုက ဩဂုတ်လ ၃၀ ရက်နေ့ ည ၁၂ နာရီခန့်မှာ မီးရှို့သွားတာ ခံခဲ့ရတယ်လို့ သိရပါတယ်။

ဒီပဲယင်းမြို့နယ်က ကျေးရွာတရွာမှာ လာရောက်တိမ်းရှောင်နေပြီး ဈေးဆိုင်ဖွင့်ကာ အသက်မွေးဝမ်းကျောင်း ပြုနေတဲ့ နိုင်ငံရေး အကျဥ်းသားဟောင်းရဲ့ နေအိမ်ကို အမည်မသိ လူတစုက မိသားစုဝင်တွေ အိပ်ပျော်နေချိန် မီးရှို့ခံခဲ့ရတယ်လို့ သိရပါတယ်။

"မီးရှို့ခံရတဲ့အိမ်က နိုင်ငံရေးအကျဥ်းသား အိမ်ပါ၊ ၅၀ ည နဲ့ မန္တလေးအိုးဘိုထောင်မှာ ၁၅ နှစ် အကျခံခဲ့ရတဲ့ သူပါ၊ လွတ်ငြိမ်းနဲ့ မတ်လ ၂ ရက် တောင်သူလယ်သမားနေ့ကမှ လွတ်လာပြီး မိသားစုလိုက် ဒီမှာလာရှောင်နေကြတာ၊ သူတို့ အိပ်ပျော်နေချိန် မီးနဲ့ ပစ်ပြီး ထွက်ပြေးသွားတာ" လို့ ဒေသခံတဦးက ပြောပါတယ်။

မီးရှို့ခံရချိန် နေအိမ်ထဲမှာ အိပ်ပျော်နေတဲ့ အသက် ၁ နှစ်အရွယ် ကလေးငယ်တစ်ဦးနဲ့ မိန်းကလေး ၄ ဦးသာ ရှိနေခဲ့ပြီး မီးလောင်နေတဲ့ အိမ်ထဲကနေ အသက်လု ထွက်ပြေးခဲ့ရတယ်လို့ သိရပါတယ်။

နေအိမ်မီးလောင်မှုကြောင့် ငွေကျပ် သိန်း ၈၀ ကျော်၊ ဆိုင်ကယ် ၂ စီး၊ စက်ဘီး ၁ စီး၊ ရေခဲသေတ္တာတလုံးနဲ့ တခြားလျှပ်စစ်ပစ္စည်းတွေ ဆုံးရှုံးခဲ့ပြီး စုစုပေါင်း ကာလတန်ဖိုး သိန်း ၄၀၀ ခန့် ဆုံးရှုံးခဲ့တယ်လို့ သိရပါတယ်။

မြို့တော် News Channel