ရေးဘီလူးပို့စ်ကို အသဲပေးလို့ အမျိုးသမီး ၁ ဦးကို အာဏာသိမ်းစစ်တပ်က ဝင်ရောက်ဖမ်းဆီးသွား

မွန်ပြည်နယ်၊ ရေးမြို့နယ်က တော်လှန်ရေးတပ်ဖွဲ့ ရေးဘီလူးရဲ့ Facebook အကောင့်က တင်တဲ့ ပို့စ်တွေကို အသဲပေးခဲ့တဲ့ အမျိုးသမီးတဦး ထပ်မံ ဖမ်းဆီးခံခဲ့ရတယ်လို့ သိရပါတယ်။

ဩဂုတ်လ ၂၃ ရက်နေ့ မနက် ၁၀ နာရီခန့်က ရေးမြို့နယ် မော့ကနင်ကျေးရွာက နေအိမ်တခုကို ဝင်ရောက်စီးနင်းကာ အသက် ၂၅ နှစ်အရွယ် မနဒီဆိုသူကို ရေးဘီလူးပို့စ်တွေမှာ အသဲပေးလို့ဆိုတဲ့ စွပ်စွဲချက်နဲ့ ဖမ်းဆီးခဲ့တာလို့ သိရပါတယ်။

"အခုရက်ပိုင်း အဖမ်းအဆီးအများဆုံးက ရေးဘီးလူး Page မှာ Commet ပေးတဲ့သူ Like ပေးတဲ့သူတွေကို ဖမ်းတာ။ သူတို့စိုးမိုးတဲ့နယ်မြေက လူတွေကို အဓိက ဝင်ဖမ်းတယ်။ လမ်းတွေမှာ ဖုန်းတွေကို စစ်တယ်" လို့ ဒေသခံတဦးက ပြောပါတယ်။

ဖမ်းဆီးခံရသူ မနဒီကို မော့ကနင်းကျေးရွာအခြေစိုက် အမှတ်(၁၀၆) ခြေလျင်တပ်ရင်းက စစ်ကြောရေးမှာ စစ်ဆေးနေတယ်လို့ သိရပြီး အကြမ်းဖက် အားပေးပုဒ်မနဲ့ တရားစွဲမယ်လို့ သိရပါတယ်။

ရေးဘီးလူး Page အောက်မှာ Comment ရေးသူနဲ့ အသဲပေးသူတွေကို ဩဂုတ်လ အစပိုင်းက စတင်ကာ အာဏာသိမ်းစစ်တပ်က ဖမ်းဆီးမှုတွေ ခပ်စိပ်စိပ် လုပ်ဆောင်လာနေပြီး ဖမ်းဆီးခံရသူ ၄ ဦးထက်မနည်း ရှိပြီလို့ သိရပါတယ်။

ဖမ်းဆီးခံရသူတွေကို အကြမ်းဖက်မှုတိုက်ဖျက်ရေး ဥပဒေပုဒ်မ ၅၂(က)နဲ့ အမှုဖွင့်ထားတယ်လို့ သိရပါတယ်။