နေပြည်တော်မှာ ငလျင်ထောက်ပံ့ကြေးတွေကို အုပ်ချုပ်ရေးမှူးက သူ့ကို ထောက်ခံသူတွေကိုသာ ထုတ်ပေးနေပြီး မုန့်ဖိုးအမည်ခံ ငွေညှစ်မှုတွေ ရှိနေ

နေပြည်တော်မှာ ငလျင်ထောက်ပံ့ကြေးတွေကို အုပ်ချုပ်ရေးမှူးက သူ့ကို ထောက်ခံသူတွေကိုသာ ထုတ်ပေးနေပြီး မုန့်ဖိုးအမည်ခံ ငွေညှစ်မှုတွေ ရှိနေ

ဇူလိုင် ၈

နေပြည်တော်၊ တပ်ကုန်းမြို့နယ်၊ သစ်ဆိန့်ပင်ကျေးရွာအုပ်စု၊ ချင်းစုကျေးရွာမှာ အာဏာသိမ်း အစိုးရက ပေးအပ်တဲ့ ငလျင်ထောက်ပံ့ကြေးပေးရာမှာ အမှန်တကယ် ပျက်စီးသူတွေ မရရှိဘဲ အုပ်ချုပ်ရေးမှူးကို အားပေးကူညီသူတွေကိုသာ ဦးစားပေး ခွဲခြားထောက်ပံ့နေပြီး ဝန်ဆောင်ခနဲ့ မုန့်ဖိုးအမည်တပ်ကာ ငွေကြေးကောက်ခံမှုတွေ ပြုလုပ်နေတယ်လို့ သိရပါတယ်။

ငလျင်ထောက်ပံ့ကြေးအဖြစ် ပျက်စီးတဲ့ အိမ်အခြေအနေအပေါ်မှာ မူတည်ပြီး ၁ ထပ်အိမ်ကို ၂၅ သိန်း၊ ၂ ထပ်အိမ်ကို သိန်း ၅၀ နှုန်းနဲ့ ထောက်ပံ့တာဖြစ်ပေမဲ့ လက်တွေ့မှာ အမှန်တကယ် နေအိမ်ပျက်စီးသူ တော်တော်များများ မရရှိကြဘဲ ရရှိသူတွေဟာလည်း ၂ ထပ်အိမ်အတွက် ၁ ထပ်စာ ၂၅ သိန်းသာ ရရှိကြပြီး အုပ်ချုပ်ရေးမှူး ရွေးချယ်ပွဲမှာ ထောက်ခံအားပေး စည်းရုံးပေးခဲ့သူတွေကိုတော့ ၂ ထပ်စာ သိန်း ၅၀ အပြည့်ပေးတယ်လို့ သိရပါတယ်။

ဒါ့အပြင် ထောက်ပံ့ကြေး လာရောက်ထုတ်ယူသူတွေ ဆီကနေ ဝန်ဆောင်ခအပြင် ပျက်စီးစာရင်း တင်ပေးခဆိုပြီး မုန့်ဖိုးအဖြစ် ၁ ထပ်အိမ်ကို သုံးသောင်းကျပ်၊ ၂ ထပ်အိမ်ကို ငါးသောင်းကျပ်နှုန်းနဲ့ အုပ်ချုပ်ရေးမှူးဇနီး ကိုယ်တိုင်က တောင်းယူကောက်ခံနေခဲ့တယ်လို့ ဆိုပါတယ်။

"အခု ထောက်ပံ့ကြေးနဲ့ ပတ်သက်ပြီး စောဒက မတက်ဖို့နဲ့ မြို့နယ်ရုံးကိုတိုင်ရင် နောက်ထပ် ထောက်ပံ့ကြေးတွေ ပေးတော့မှာ မဟုတ်ဘူးလို့ ခြိမ်းခြောက်ထားလို့ ဘယ်သူမှ မတိုင်ရဲကြဘူး၊ ထောက်ပံ့ကြေး ရတဲ့ ၅၁ အိမ်မှာ တကယ်ပျက်စီးတဲ့သူက ၇၀ ရာခိုင်နှုန်းလောက်ပဲ ပါတယ်၊ ထောက်ပံ့ကြေး လုံးဝမရတဲ့ အိမ်တွေထဲမှာ ပျက်စီးဆုံးရှုံးတဲ့ အိမ် ၄ အိမ်ထက်မနည်း ကျန်နေသေးတယ်" လို့ ဒေသခံတဦးက မြို့တော်ကို ပြောပါတယ်။

အလားတူ နေပြည်တော်ရှိ တခြားမြို့နယ်တွေမှာလည်း ကျေးရွာအုပ်ချုပ်ရေးအဖွဲ့တွေဟာ ဒေသခံပြည်သူတွေအတွက် ရောက်ရှိလာတဲ့ ငလျင်ကူညီထောက်ပံ့ရေး ပစ္စည်းတွေနဲ့ အလှူငွေတွေကို အလွဲသုံးစားလုပ်တာ သူတို့နဲ့ နီးစပ်သူတွေကိုသာ ဦးစားပေးတာနဲ့ တိုင်ကြားမှု မလုပ်ရဲအောင် အာဏာပြ ခြိမ်းခြောက်တာတွေကို ကျေးရွာတော်တော်များများမှာ ဆက်တိုက်လုပ်ဆောင်နေတယ်လို့ သိရပါတယ်။

မြို့တော် News Channel