စစ်တွေမြို့လယ်ခေါင် ဗုံးသီး ၂ လုံး ကျရောက်ပေါက်ကွဲလို့ အရပ်သားပြည်သူ ၅ ဦး သေဆုံးပြီး သေဆုံးသူတွေ ထပ်တိုးလာနိုင်

စစ်တွေမြို့လယ်ခေါင် ဗုံးသီး ၂ လုံး ကျရောက်ပေါက်ကွဲလို့ အရပ်သားပြည်သူ ၅ ဦး သေဆုံးပြီး သေဆုံးသူတွေ ထပ်တိုးလာနိုင်

အောက်တိုဘာ ၂၃

ရခိုင်ပြည်နယ်၊ စစ်တွေမြို့ မြို့လယ်ခေါင်မှာ လူစည်ကားချိန် ဗုံး ၂ လုံး ကျရောက်ပေါက်ကွဲလို့ အရပ်သားပြည်သူ ၅ ဦးထက်မနည်း သေဆုံးနိုင်တယ်လို့ သိရပါတယ်။

အောက်တိုဘာ ၂၃ ရက်နေ့ ဒီကနေ့ မနက် ၈ နာရီဝန်းကျင်က၊ ရခိုင်ပြည်နယ်၊ စစ်တွေမြို့ မောလိပ်ရပ်ကွက်၊ မင်းဘာကြီးလမ်း၊ ရွှေငါးစတိုး ခွဆုံအနီးနဲ့ ကျောင်းတက်လမ်း ရပ်ကွက် တို့မှာ ဗုံး ၂ လုံး ပေါက်ကွဲခဲ့တာကြောင့် အမျိုးသမီး ၄ ဦး အပါအဝင် ၅ ဦး မျက်မြင်သေဆုံးခဲ့ပြီး သေဆုံးသူတွေ ထပ်တိုးနိုင်လာတယ်လို့ သိရပါတယ်။

“လူစည်တဲ့အချိန် ဗုံး ၂ လုံးပေါက်တာ၊ လက်ဖက်ရည်ဆိုင်က အမျိုးသား ၁ ယောက်နဲ့ ကောက်ညှင်းပေါင်းသည်ရယ်၊ တခြားအမျိုးသမီး ၃ ယောက်ရယ်၊ အမျိုးသမီး ၄ ယောက် သေတယ်၊ အခုက ဝရုန်းသုန်းကားဖြစ်နေလို့ အရေအတွက် အတိအကျ မသိရသေးဘူး အရေအတွက်များမယ်” လို့ ဒေသခံတဦးက ပြောပါတယ်။

စစ်တွေမြို့နယ်တဝိုက်က ကျေးရွာတွေမှာ အာဏာသိမ်းစစ်တပ်နဲ့ အာရက္ခတပ်တော်(AA) တို့ နှစ်ဖက်ထိတွေ့တိုက်ပွဲတွေ ဖြစ်ပွားနေပြီး စစ်တွေမြို့ကို ဒကစ ဌာနချုပ်နဲ့ အနောက်မြောက်ပိုင်းစစ်ဌာနချုပ်(နမခ) က ဝန်းရံပိတ်ဆို့ထားတယ်လို့ သိရပါတယ်။

မြို့တော် News Channel