မလှိုင်မြို့ စက်ဘီးဆိုင်ဗုံးပစ်ခံရ၊ ၂ ဦးထိမှန် ၁ ဦးသေဆုံး

မလှိုင်က စက်ဘီးဆိုင် ဗုံးသီးနဲ့ ပစ်ခတ်ခံရလို့ ဆိုင်ရှေ့စကားပြောနေသူ ၂ ဦးကို ထိမှန်ကာ ၁ ဦး သေဆုံး

၂၀၂၆ အောက်တိုဘာ ၂၈ Myo Taw

မလှိုင်က စက်ဘီးဆိုင် ဗုံးသီးနဲ့ ပစ်ခတ်ခံရလို့ ဆိုင်ရှေ့စကားပြောနေသူ ၂ ဦးကို ထိမှန်ကာ ၁ ဦး သေဆုံး

အောက်တိုဘာ ၂၈

မန္တလေးတိုင်း၊ မလှိုင်မြို့၊ အမှတ်(၃)ရပ်ကွက်က စက်ဘီးဆိုင်တဆိုင် ဗုံးပစ်ခံရပြီး ဆိုင်ရှေ့စကားပြောနေတဲ့ အမျိုးသမီးနဲ့ အမျိုးသားတဦး ဗုံးစထိမှန်ကာ ၁ ဦး သေဆုံးခဲ့တယ်လို့ သိရပါတယ်။

အောက်တိုဘာလ ၂၆ ရက်နေ့၊ မနက် ၁၁ နာရီခန့်က 'မျိုးအောင်' စက်ဘီးအရောင်းဆိုင်ကို အမျိုးသား ၂ ဦး စီးနင်းလာတဲ့ ဆိုင်ကယ်တစီးက ဆိုင်ရှေ့ကနေ ဖြတ်သန်းမောင်းနှင်ပြီး ဗုံးပစ်ချ တိုက်ခိုက်သွားခဲ့တာလို့ သိရပါတယ်။

ဗုံးသီးပစ်ချ တိုက်ခိုက်မှုကြောင့် 'မျိုးအောင်' စက်ဘီးအရောင်းဆိုင်ရှေ့မှာ စကားပြောနေတဲ့ ဆိုင်အနီးက အဘွားအို ၁ ဦးနဲ့ စက်ဘီးလာဝယ်သူ အမျိုးသား ၁ ဦးတို့ ဗုံးစထိမှန်ကာ ဒဏ်ရာပြင်းထန်ရရှိပြီး မလှိုင်မြို့နယ် ပြည်သူ့ဆေးရုံကို ပို့ဆောင်ပေးခဲ့ရတယ်လို့ သိရပါတယ်။

“စက်ဘီးဆိုင်ကို ပစ်တာ၊ ဗုံးသီးက လူတွေနားကို ကျပြီးကွဲတာ။ ဗုံးအစမှန်ပြီး ဆိုင်ရှေ့က ၂ ယောက်လုံး ထိသွားတယ်။ အဘွားကတော့ ဖြစ်တဲ့အချိန်ကတည်းက အခြေအနေမဟန်တော့တာ၊ ညနေကျတော့ ဆုံးတယ်လို့ ကြားရတယ်။ ကျန်တယောက်ကတော့ သတိရပြီ” လို့ ဒေသခံတဦးက ပြောပါတယ်။

ဗုံးစထိမှန်ခဲ့တာကြောင့် အသက် ၈၅ နှစ်အရွယ် ဒေါ်ချိုတီ ဆိုသူ အဘွားဟာ ပြင်းထန်ဒဏ်ရာရရှိခဲ့ပြီး စက်ဘီးလာဝယ်သူ အသက် ၅၃ နှစ်အရွယ် ဦးဇော်မိုး ဟာလည်း ဒဏ်ရာအနည်းငယ် ရရှိခဲ့တာကြောင့် ဒေသခံတွေက မလှိုင်မြို့နယ် ပြည်သူ့ဆေးရုံကို ပို့ဆောင်ပေးခဲ့ရတာဖြစ်တယ်လို့ သိရပါတယ်။

ဒဏ်ရာရသူ ၂ ဦးထဲက ဒေါ်ချိုတီဟာ ဆေးရုံရောက်ပြီး ညနေပိုင်းမှာ ဆေးကုသမှုခံယူရင်း သေဆုံးခဲ့တယ်လို့ သိရပြီး ဗုံးနဲ့ ပစ်ခတ်မှုကို ဘယ်အဖွဲ့အစည်းက လုပ်ဆောင်ခဲ့တယ်ဆိုတာကိုတော့ မသိရသေးပါဘူး။

မြို့တော် News Channel