ပျိုးနှုတ်နေတဲ့ လူငယ်တဦး ပေါ်တာဆွဲဖမ်းဆီးခံလိုက်ရ

မန္တလေးတိုင်း၊ ဝမ်းတွင်းမြို့နယ်မှာ တောင်ယာလုပ်ကိုင်နေတဲ့ လူငယ်အမျိုးသားတဦး သြဂုတ် ၂၇ ရက်နေ့က ဖမ်းဆီးခံခဲ့ရတယ်လို့ သိရပါတယ်။

ပင်းတလဲ တိုက်နယ်ရွာက အာဏာသိမ်း စစ်တပ်တပ်ဖွဲ့ဝင်တွေဟာ ကုက္ကိုခါးလှ၊ သဲကန်၊ ညောင်ဒို၊ အင်းကုန်းရွာ တွေရှိ တောင်ယာလုပ်ငန်းခွင်ထဲအထိ ပေါ်တာဆွဲခဲ့တဲ့အတွက် သြဂုတ် ၂၇ ရက်နေ့က မွန်းလွဲ ၁ နာရီခန့်က ပျိုးနှုတ်နေတဲ့ လူငယ်တဦး ဖမ်းဆီးခံခဲ့ရတယ်လို့ သိရပါတယ်။

ဒါ့အပြင် သြဂုတ် ၂၇ ရက်နေ့ မနက်အစော ၄ နာရီခန့်မှာ အာဏာသိမ်းစစ်တပ် တပ်ဖွဲ့ဝင်တွေေ ရွှေတောင်တိုက်နယ်၊ သပြေရိုးရွာ၊ ပဲနံ့သာရွာ၊ တောင်ဘို့ရွာ နဲ့ ခန္တောရွာ တို့ကို ပေါ်တာဆွဲတာတွေ လုပ်ဆောင်ခဲ့ပေမဲ့ ဖမ်းဆီးခံရသူ မရှိခဲ့ဘူးလို့ သိရပါတယ်။

သြဂုတ်လ ၂၃ ရက်နေ့ကလည်း ပင်းတလဲ တိုက်နယ်ရှိ အာဏာသိမ်းစစ်တပ် တပ်ဖွဲ့ဝင်တွေက အမြန်လမ်းဘေးရှိ ကန်ပတ်လည်ရွာ နှင့် မင်းကန်ရွာ ဘက်မှာ လူငယ် ၂ ဦးကို ဖမ်းဆီးခံခဲ့ရတယ်လို့ Voice of Wundwin ရဲ့ဖော်ပြချက်အရ သိရပါတယ်။

အာဏာသိမ်း စစ်တပ်က ပင်းတလဲ တိုက်နယ်ရွာရှိ ဆေးရုံ နဲ့ ရဲစခန်းတို့မှာ တပ်စွဲထားပြီး အနီးပတ်ဝန်းကျင်က ကျေးရွာတွေမှာ ပေါ်တာဆွဲတာတွေ လုပ်ဆောင်နေတာကြောင့် ဝမ်းတွင်းမြို့နယ်ထဲက လူငယ်တွေဟာ ပြည်ပထွက်ခွာမှုသူတွေ ပိုမိုများပြားလာပြီး လယ်ယာစိုက်ပျိုးမှု အခြေအနေဟာ အခက်အခဲတွေနဲ့ ရင်ဆိုင်နေကြရတယ်လို့ သိရပါတယ်။