ဇလွန်မြို့နယ်က Honda ဆိုင်ကယ်အရောင်းပြခန်း မီးလောင်ပြီး ဆုံးရှုံးမှုတန်ဖိုး အလွန်များ

ဧရာဝတီတိုင်း၊ ဇလွန်မြို့နယ်၊ ညောင်ပင်ဆိပ်ရပ်ကွက်၊ ဆေးရုံလမ်းက Honda ဆိုင်ကယ် အရောင်းဆိုင်တဆိုင်မှာ မီးလောင်မှု ဖြစ်ပွားခဲ့တယ်လို့ သိရပါတယ်။

ဩဂုတ်လ ၂၇ ရက် ဒီကနေ့ မနက် ၉ နာရီ ၃၀ မိနစ်ခန့်က စတင်ကာ မီးလောင်မှု ဖြစ်ပွားခဲ့တာလို့ သိရပြီး အရောင်းပြခန်းထဲက ဆိုင်ကယ်အစီးရေ ဆယ်နဲ့ချီ ဆုံးရှုံးသွားတယ်လို့ ဆိုပါတယ်။

"ဆေးရုံလမ်းက ကိုကျော်သူရ၊ မအေးမြတ်မွန် တို့ရဲ့ဆိုင်ပါ။ ဖြစ်တဲ့အချိန် လူတွေက ဝိုင်းပြီးကူရင် ၁ စီး ၂ စီးမက ထုတ်လို့ရနိုင်တယ်။ ဖြစ်ဖြစ်ချင်း ကူလို့ရရဲ့နဲ့ အကုန်လုံးက သူ့ထက်ငါ ဖုန်းတွေနဲ့ Social Media ပေါ် တင်ချင်နေကြတာ။ ဆုံးရှုံးမှုက မျက်စိရှေ့တင် အရမ်းများသွားတာ။ အစီးရေ ၃၀ နဲ့အထက် ပါသွားတယ်။ အကုန် သိန်း ၁၀၀ ကျော်တန်တွေချည်းပဲ" လို့ မျက်မြင်ဒေသခံ အမျိုးသမီးတဦးက ပြောပါတယ်။

မီးလောင်မှုကို ဇလွန်မြို့နယ် မီးသတ်စခန်းက မီးငြှိမ်းသတ်ယာဉ် ၂ စီး၊ ရေသယ်ယာဉ် ၂ စီးနဲ့အတူ သန္ဓေမီးသတ်တပ်ဖွဲ့ဝင်တွေ၊ အရန်မီးသတ်တပ်ဖွဲ့ဝင်တွေက နာရီဝက်ကျော်ကြာအောင် ငြှိမ်းသတ်ခဲ့ရတယ်လို့ သိရပြီး မီးလောင်ရတဲ့ ဖြစ်စဥ်အသေးစိတ်ကို မသိရသေးပါဘူး။