မွန်ဂိုးလီးယားမှာ နေအိမ်အတွင်း ဝက်ဝံ ဝင်ရောက်တိုက်ခိုက်မှုကြောင့် အမျိုးသားတဦး သေဆုံး

မွန်ဂိုးလီးယားမှာ နေအိမ်အတွင်း ဝက်ဝံ ဝင်ရောက်တိုက်ခိုက်မှုကြောင့် အမျိုးသားတဦး သေဆုံး

အောက်တိုဘာ ၁၀

မွန်ဂိုးလီးယားနိုင်ငံ၊ မြို့တော် အူလန်ဘာတာ မြို့စွန်က နေအိမ်တလုံးထဲကို ဝက်ဝံတကောင် ဝင်ရောက်တိုက်ခိုက်ခဲ့တာကြောင့် နေအိမ်မှာရှိနေတဲ့ အမျိုးသားတဦး သေဆုံးသွားပြီး အမျိုးသမီးတဦးလည်း အရေးပေါ် ဆေးရုံတင်ထားရတယ်လို့ သိရပါတယ်။

ပြီးခဲ့တဲ့ အောက်တိုဘာ ၈ ရက်နေ့က ဘာယန်ဇူးခ်ခရိုင်ထဲမှာ ဖြစ်ပွားခဲ့တာဖြစ်ပြီး အသက် ၄၀ ကျော်အရွယ် အမျိုးသားဟာ နေရာမှာတင် သေဆုံးခဲ့ကာ အသက် ၅၀ ကျော် အမျိုးသမီးကတော့ ဒဏ်ရာတွေကြားကနေ အိမ်နီးနားချင်းတွေဆီ အကူအညီတောင်းနိုင်ခဲ့တာကြောင့် လွတ်မြောက်ခဲ့ပေမယ့် လက်ရှိမှာ ဆေးရုံတင်ထားရပြီး အခြေအနေစိုးရိမ်ရတယ်လို့ သိရပါတယ်။

လတ်တလောမှာ တောခေါင်းဝန်ထမ်း ၃၅ ဦးပါ အဖွဲ့က အဲဒီဝက်ဝံကို လိုက်လံရှာဖွေနေသလို ဒေသခံတွေကိုလည်း သတိထားကြဖို့ နှိုးဆော်ထားတဲ့အပြင် ပြည်နယ် ၈ ခုမှာ ဝက်ဝံဖမ်းဆီးခွင့် ပါမစ်တွေ ထုတ်ပေးထားတယ်လို့ ဆိုပါတယ်။

အောက်တိုဘာ ၈ ရက် ထုတ်ပြန်ချက်အရ မွန်ဂိုးလီးယားနိုင်ငံတဝန်း ပြည်နယ် ၁၁ ခုနဲ့ မြို့တော်မှာ ဝက်ဝံတွေ့ရှိမှု ၇၅၄ ကြိမ်အထိ ရှိလာခဲ့ပြီး ၈၀ ရာခိုင်နှုန်းဟာ သားပေါက်ပါတဲ့ ဝက်ဝံမတွေ ဖြစ်တယ်လို့ ဆိုပါတယ်။

ရာသီဥတု ဖောက်ပြန်မှုနဲ့ အစာရေစာ ရှားပါးလာတာတွေကြောင့် ဝက်ဝံတွေ လူနေဒေသဘက် ဆင်းလာတာဖြစ်ပြီး ခန်တီပြည်နယ်မှာ တွေ့ရှိခဲ့တဲ့ ဝက်ဝံတကောင်ကို စစ်ဆေးရာမှာလည်း ဝမ်းဗိုက်ထဲ ဘာအစာမှ မရှိတာကို တွေ့ခဲ့ရတယ်လို့ ဆိုပါတယ်။

အလားတူ ရုရှားနိုင်ငံမှာလည်း ဝက်ဝံတိုက်ခိုက်မှုကြောင့် လူ 6 ဦးထက်မနည်း သေဆုံးခဲ့ပြီး ဂျပန်နိုင်ငံမှာလည်း ဆောင်းခိုရာကနေ ဆာလောင်စွာ နိုးထလာတဲ့ ဝက်ဝံတွေကြောင့် ပြီးခဲ့တဲ့နှစ်က လူ ၁၃ ဦးအထိ စံချိန်တင် သေဆုံးခဲ့ပါတယ်။

Ref & Photo: The Independent
Photo: Getty/iStock

မြို့တော် News Channel