ကျောက်မဲက ရတီမှန် ရွှေဆိုင် ဓားပြတိုက်ခံရပြီး ရွှေ ၅၀ ကျပ်သားခန့်နဲ့ ငွေသား သိန်း ၃၀ ခန့်ပါသွား

ကျောက်မဲက ရတီမှန် ရွှေဆိုင် ဓားပြတိုက်ခံရပြီး ရွှေ ၅၀ ကျပ်သားခန့်နဲ့ ငွေသား သိန်း ၃၀ ခန့်ပါသွား

စက်တင်ဘာ ၂၅

ရှမ်းပြည်နယ်မြောက်ပိုင်း၊ ကျောက်မဲမြို့၊ ရပ်ကွက် (၂)၊ ပင်လုံလမ်းရှိ “ရတီမှန်’ ရွှေဆိုင်ကို ဒီကနေ့ မနက်ပိုင်းမှာ လက်နက်ကိုင်အမျိုးသားနှစ်ဦးက ဓားပြတိုက်ပြီး ရွှေထည်ပစ္စည်းတွေအပြင် ဖုန်းနဲ့ ငွေသားတွေ ယူဆောင်ထွက်ပြေးသွားတယ်လို့ သိရပါတယ်။

ဒီကနေ့ စက်တင်ဘာ ၂၅ ရက် မနက် ၁၁ နာရီဝန်းကျင်မှာ ဖြစ်ပွားခဲ့တာဖြစ်ပြီး မျက်နှာဖုံးစွပ်ထားတဲ့ အမျိုးသားနှစ်ဦးက ဆိုင်ကယ်နှစ်စီးနဲ့ ဆိုင်ထဲကို ရောက်လာကာ လက်နက်တွေ ကိုင်ဆောင်ပြီး ဆိုင်အတွင်းက ရွှေထည်ပစ္စည်းတွေကို သိမ်းကျုံးယူဆောင်သွားခဲ့တာလို့ သိရပါတယ်။

ဓားပြတိုက်သူတွေဟာ ရွှေထည်ပစ္စည်း ခန့်မှန်း ၅၀ ကျပ်သားခန့်အပြင် ငွေသား ကျပ်သိန်း ၃၀ ဝန်းကျင်နဲ့ iPhone ဖုန်း ၃ လုံးကိုပါ ယူဆောင်သွားတယ်လို့ ကနဦးသိရပါတယ်။ ဆိုင်အတွင်းက ရွှေတွေကို အတိအကျစာရင်းပြုစုနိုင်ခြင်း မရှိသေးတာကြောင့် ဆုံးရှုံးမှုတန်ဖိုး အတိအကျကိုတော့ မသိရသေးပါဘူး။

ဓားပြတိုက်ပြီးနောက် အမျိုးသားနှစ်ဦးဟာ ဆိုင်ကယ်တွေနဲ့ ထွက်ပြေးသွားခဲ့ပြီး လက်ရှိမှာ ကျူးလွန်သူတွေကို ဖမ်းဆီးရမိရေးအတွက် စုံစမ်းစစ်ဆေးနေဆဲ ဖြစ်တယ်လို့ သိရပါတယ်။

ကျောက်မဲမြို့မှာ စက်တင်ဘာ ၁၂ ရက်ကလည်း မြို့မဈေးအတွင်း ဖွင့်လှစ်ထားတဲ့ ‘ရွှေမိုး’ ရွှေဆိုင် ဓားပြတိုက်ခံခဲ့ရပြီး ရွှေ ၇၀ ကျပ်သားခန့် ပါသွားခဲ့သလို ဆိုင်ပိုင်ရှင်နဲ့ အမျိုးသားတစ်ဦးလည်း သေနတ်နဲ့ ပစ်ခတ်ခံခဲ့ရပါသေးတယ်။

မြို့တော် News Channel