မင်းအောင်လှိုင်နဲ့ ထိတွေ့ဆက်ဆံနေတဲ့ ကမ္ဘာ့ခေါင်းဆောင်တွေကို လက်တွေ့ရလဒ်ပြဖို့ ဒေါ်အောင်ဆန်းစုကြည်ရဲ့ သားငယ်ဖြစ်သူ ကိုထိန်လင်း တောင်းဆို

မင်းအောင်လှိုင်နဲ့ ထိတွေ့ဆက်ဆံနေတဲ့ ကမ္ဘာ့ခေါင်းဆောင်တွေကို လက်တွေ့ရလဒ်ပြဖို့ ဒေါ်အောင်ဆန်းစုကြည်ရဲ့ သားငယ်ဖြစ်သူ ကိုထိန်လင်း တောင်းဆို

အောက်တိုဘာ ၁၇

အာဏာသိမ်း စစ်ခေါင်းဆောင် မင်းအောင်လှိုင်နဲ့ ထိတွေ့ဆက်ဆံမှုတွေ ပြုလုပ်နေကြတဲ့ ကမ္ဘာ့ခေါင်းဆောင်တွေကို လက်တွေ့ရလဒ်တွေနဲ့ သက်သေပြဖို့ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ သားငယ်ဖြစ်သူ ကိုထိန်လင်း (ခေါ်) ကင်မ်အဲရစ် က တိုက်တွန်းတောင်းဆိုလိုက်ပါတယ်။

မင်းအောင်လှိုင်နဲ့ ထိတွေ့ဆက်ဆံမှုတွေ ပြုလုပ်နေကြတဲ့ ကမ္ဘာ့ခေါင်းဆောင်တွေအနေနဲ့ အကြမ်းဖက်မှုတွေ ရပ်တန့်ဖို့၊ လူသားချင်းစာနာမှု အကူအညီတွေ ပေးခွင့်ရဖို့၊ နိုင်ငံရေးဆွေးနွေးမှုတွေ လုပ်ဖို့နဲ့ နိုင်ငံရေးအကျဉ်းသားတွေကို လွှတ်ပေးဖို့ ၎င်းတို့ကိုယ်တိုင် တောင်းဆိုခဲ့ကြပေမယ့် မင်းအောင်လှိုင်က ဘာတွေ လုပ်ပေးခဲ့ပြီးပြီလဲလို့ ကိုထိန်လင်းက ထောက်ပြထားပါတယ်။

ဒါ့အပြင် လက်ရှိအချိန်အထိ အရပ်သားပြည်သူတွေအပေါ် အကြမ်းဖက် သတ်ဖြတ်မှုတွေ ဆက်လက်ဖြစ်ပွားနေဆဲဖြစ်သလို အသက် ၈၁ နှစ်အရွယ်ရှိပြီဖြစ်တဲ့ မိခင်ဖြစ်သူ ဒေါ်အောင်ဆန်းစုကြည်ကိုလည်း ကမ္ဘာကြီးနှင့် အဆက်အသွယ်ဖြတ်တောက်ကာ မိသားစုဝင်တွေနဲ့ တွေ့ဆုံခွင့်မပေးဘဲ ဖုံးကွယ်ဖမ်းဆီးထားဆဲဖြစ်ကြောင်း ကိုထိန်လင်းက ဆိုပါတယ်။

အာဏာသိမ်း စစ်ခေါင်းဆောင်နဲ့ ထိတွေ့ဆက်ဆံမှုတွေကတဆင့် အပြုသဘောဆောင်တဲ့ တိုးတက်မှုတွေ ရရှိနိုင်တယ်လို့ ယုံကြည်ပါက ပထမဆုံးခြေလှမ်းအဖြစ် မိခင်ဖြစ်သူ ဒေါ်အောင်ဆန်းစုကြည်ကို ချက်ချင်းလွှတ်ပေးရန်နှင့် ၎င်းကို လက်တွေ့ရလဒ်ဖြင့် သက်သေပြရန် နိုင်ငံတကာအသိုင်းအဝိုင်းကို တောင်းဆိုထားပါတယ်။

ဒါ့အပြင် ကော်ဇောနီခင်းပြီး ကြိုဆိုခြင်းနှင့် လက်ဆွဲနှုတ်ဆက်ခြင်းတွေဟာ စစ်မှန်တဲ့ တိုးတက်မှုမဟုတ်ဘဲ မြေပြင်လက်တွေ့ လုပ်ဆောင်ချက်တွေကသာ တိုးတက်မှုဖြစ်ကြောင်း၊ အာဏသိမ်းစစ်အစိုးရဘက်က တာဝန်ခံမှု၊ တာဝန်ယူမှု မရှိပါက တရားဝင်မှု လုံးဝ မပေးအပ်သင့်ကြောင်းလည်း ကိုထိန်လင်းက သတိပေး တိုက်တွန်းထားပါတယ်။

မြို့တော် News Channel