ရှမ်း၊ မန္တလေး၊ စစ်ကိုင်း၊ မကွေးတွင် မိုးကြီးနိုင်၊ နိုဝင်ဘာ ၁၀ ထိပ်တန်း

တိုင်းနဲ့ ပြည်နယ် ၄ ခုမှာ နေရာစိပ်စိပ်မှ နေရာအနှံ့အပြား မိုးထစ်ချုန်းရွာနိုင်ပြီး ဒေသအလိုက် မိုးကြီးနိုင်တယ်လို့ဆို

၂၀၂၆ နိုဝင်ဘာ ၉ Myo Taw

နိုဝင်ဘာ ၉

တရုတ်ပြည်မဘက်မှ ဆင်းလာတဲ့ လေအေးနှင့် အရှေ့ဘက်/တောင်ဘက်မှ တက်လာတဲ့ အရှေ့လေပွေလှိုင်းတို့ ပွတ်တိုက်မှုကြောင့် ရှမ်းပြည်နယ် (မြောက်ပိုင်း၊ တောင်ပိုင်း၊ အရှေ့ပိုင်း)၊ မန္တလေးတိုင်း၊ စစ်ကိုင်းတိုင်း(အောက်ပိုင်း) နှင့် မကွေးတိုင်း ဒေသအချို့တို့မှာ နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး ဒေသအလိုက် မိုးကြီးတာတွေ ဖြစ်ပေါ်နိုင်တယ်လို့ မိုးလေဝသ ပညာရှင် ဦးဝင်းနိုင်က ခန့်မှန်းသုံးသပ်ထားပါတယ်။

အထူးသဖြင့် နိုဝင်ဘာလ ၁၀ ရက်မှာ ရှမ်းပြည်နယ်နှင့် မန္တလေးတိုင်းတို့မှာ မိုးသည်းထန်မှု အထွတ်အထိပ်သို့ ရောက်ရှိနိုင်တယ်လို့ ဆိုပါတယ်။

ကချင်ပြည်နယ်၊ နေပြည်တော်၊ ပဲခူးတိုင်း၊ ရန်ကုန်တိုင်း၊ ဧရာဝတီတိုင်း၊ ကရင်ပြည်နယ်၊ မွန်ပြည်နယ်နှင့် တနင်္သာရီတိုင်း တို့မှာ နေရာကွက်ကျားမှ နေရာစိပ်စိပ် မိုးထစ်ချုန်းရွာနိုင်တယ်လို့ ဆိုပါတယ်။

နိုဝင်ဘာလ ၁၂ ရက်မှစတင်ပြီး မိုးရိပ်တွေ သိသိသာသာ လျော့ပါးသွားမှာဖြစ်ပြီး နိုဝင်ဘာလ ၁၃ ရက်မှ ၁၅ ရက်အတွင်း မြန်မာနိုင်ငံတစ်ဝန်းလုံးနီးပါး မိုးကင်းစင်ပြီး တိမ်အသင့်အတင့်သာ ရှိမယ်လို့ ဆိုပါတယ်။

လေဖိအားကြီးရပ်ဝန်းမှ မြောက်လေ/အရှေ့မြောက်လေတွေ တိုက်ခတ်လာမှာဖြစ်တာကြောင့် ကုန်းတွင်းပိုင်းနှင့် ကုန်းမြင့်ဒေသတွေမှာ ညအပူချိန်တွေ သိသိသာသာ လျော့ကျကာ ဆောင်းလေအေး စတင်ဝင်ရောက်မယ်လို့ ဆိုပါတယ်။

နိုဝင်ဘာလ ၉ မှ ၁၁ ရက်အတွင်း အရှေ့လေပွေလှိုင်းနှင့် လေအေးထုတို့ တွေ့ဆုံချိန်ဖြစ်ပြီး ကုန်းတွင်းပိုင်းဒေသတွေမှာ မိုးတိမ်တောင်တွေ ဖွဲ့စည်းကာ လေပြင်းတိုက်ခတ်တာ၊ မိုးကြိုးပစ်တာနှင့် မိုးသီးကြွေတာတွေ ဖြစ်ပေါ်နိုင်တယ်လို့ မိုးလေဝသ ပညာရှင် ဦးဝင်းနိုင်က ခန့်မှန်းသုံးသပ်ထားပါတယ်။

မြို့တော် News Channel