မုတ်သုံလေ အားကောင်းမှုကြောင့် တစ်နိုင်ငံလုံးမှာ မိုးဆက်တိုက် ရွာသွန်းနိုင်ပြီး မြို့ကြီးအချို့မှာလည်း မြစ်ရေဟာ စိုးရိမ်ရေမှတ် ကျော်လွန်နေ

မုတ်သုံလေ အားကောင်းမှုကြောင့် တစ်နိုင်ငံလုံးမှာ မိုးဆက်တိုက် ရွာသွန်းနိုင်ပြီး မြို့ကြီးအချို့မှာလည်း မြစ်ရေဟာ စိုးရိမ်ရေမှတ် ကျော်လွန်နေ

ဇူလိုင် ၁၂

ဇူလိုင်လ ၁၂ ရက်မှ ၁၉ ရက်အထိ မြန်မာနိုင်ငံတစ်ဝန်းမှာ အနောက်တောင် မုတ်သုံလေ အားကောင်းရာမှ အလွန်အားကောင်းနေပြီး ဘင်္ဂလားပင်လယ်အော်နှင့် ကပ္ပလီပင်လယ်ပြင်တို့မှ မိုးတိမ်တိုက်တွေ အဆက်မပြတ် ဝင်ရောက်နေတယ်လို့ မိုးလေဝသ ပညာရှင် ဦးဝင်းနိုင်က ခန့်မှန်း သုံးသပ်ထားပါတယ်။

စစ်ကိုင်းတိုင်း (အထက်ပိုင်း)၊ ကချင်ပြည်နယ်နှင့် ချင်းပြည်နယ်တို့မှာ ဇူလိုင်လ ၁၅ ရက် နောက်ပိုင်းမှစပြီး မိုးတိမ်တိုက်တွေ ပိုမိုသိပ်သည်းလာကာ မိုးရေချိန် ၁၅၀ မီလီမီတာမှ ၂၅၀ မီလီမီတာ ဝန်းကျင်အထိ အလွန်များပြားလာနိုင်တယ်လို့ ဆိုပါတယ်။

တနင်္သာရီတိုင်း၊ ရခိုင်ပြည်နယ်နှင့် မွန်ပြည်နယ်တို့မှာ ကပ္ပလီပင်လယ်ပြင်မှ တိုက်ခတ်လာတဲ့ မုတ်သုံလေကြောင့် မိုးအဆက်မပြတ် ရွာသွန်းနိုင်ပြီး ကမ်းလွန်ပင်လယ်ပြင်မှာ မိုးရေချိန် ၂၀၀ မီလီမီတာ အထက်သို့ မြင့်တက်နေတယ်လို့ ဆိုပါတယ်။

ရှမ်းပြည်နယ် (မြောက်ပိုင်း)၊ စစ်ကိုင်းတိုင်း(အောက်ပိုင်း)၊ ပဲခူးတိုင်း(အရှေ့ပိုင်း)၊ ရန်ကုန်နှင့် ဧရာဝတီတိုင်းတို့မှာ ခန့်မှန်းမိုးရေချိန် ၅၀ မီလီမီတာမှ ၁၀၀ မီလီမီတာ ဝန်းကျင်ရရှိနိုင်ပြီး နေ့စဉ် မိုးဖွဲဖွဲမှ မိုးအသင့်အတင့် ပုံမှန်ရွာသွန်းမယ့် အခြေအနေရှိနေတယ်လို့ ဆိုပါတယ်။

မကွေးတိုင်း၊ မန္တလေးတိုင်းနှင့် ပဲခူးတိုင်း(အနောက်ပိုင်း)တို့မှာ မိုးရေချိန် ၅၀ မီလီမီတာအောက် သာရှိပြီး ဒေသအလိုက် မိုးကျဲကျဲသာ ရွာသွန်းနိုင်တယ်လို့ ဆိုပါတယ်။

ရေကြီး ရေလျှံမှုအန္တရာယ်အနေနဲ့ စစ်ကိုင်းတိုင်း(အထက်ပိုင်း)နှင့် ကချင်ပြည်နယ်တို့မှာ မိုးအဆက်မပြတ် ရွာသွန်းပြီး မိုးရေချိန် အလွန်များနိုင်တာကြောင့် ဧရာဝတီမြစ်နှင့် ချင်းတွင်းမြစ်ဝှမ်းတလျှောက် ရေမျက်နှာပြင် မြင့်တက်လာကာ မြစ်ရေကြီးမှုနှင့် မြေနိမ့်ပိုင်း ရေလျှံမှုတွေ ဖြစ်ပေါ်နိုင်တယ်လို့ ဆိုပါတယ်။

မြေပြိုမှုအန္တရာယ်အနေနဲ့ ချင်းပြည်နယ်နှင့် ကချင်ပြည်နယ်ရှိ တောင်တန်းဒေသတွေမှာ ဇူလိုင်လ ၁၅၊ ၁၆၊ ၁၇ ရက်တို့မှာ မိုးသည်းထန်နိုင်တာကြောင့် တောင်ပြိုတာ၊ လမ်းပိတ်တာတွေ သတိပြုသွားလာနေထိုင်ကြဖို့ အသိပေးထားပါတယ်။

ရခိုင်ကမ်းရိုးတန်းနှင့် တနင်္သာရီကမ်းရိုးတန်းတလျှောက်မှာ မုတ်သုံလေ အားကောင်းမှုကြောင့် လှိုင်းလေပြင်းထန်နိုင်တာကြောင့် ရေလုပ်ငန်းနှင့် ရေကြောင်းသွားလာရေး အထူးသတိပြုဖို့ မိုးလေဝသ ပညာရှင် ဦးဝင်းနိုင်က အသိပေးထားပါတယ်။

မိုးလေဝသနှင့် ဇလဗေဒညွှန်ကြားမှု ဦးစီးဌာနရဲ့ ဇူလိုင်လ ၁၂ ရက် ဒီကနေ့ ထုတ်ပြန်ချက်တွေအရ စစ်တောင်းမြစ်ရေဟာ မဒေါက်မြို့မှာ စိုးရိမ်ရေမှတ် ၁,၀၇၀ စင်တီမီတာအထက် ကျော်လွန်ကာ ၁,၁၁၃ စင်တီမီတာသို့ ရောက်ရှိနေပြီး နောက် ၂၄ နာရီအတွင်း ပေဝက်ခန့် ကျဆင်းနိုင်ပေမယ့် စိုးရိမ်ရေမှတ်အထက်မှာ ဆက်လက် တည်ရှိနိုင်တယ်လို့ဆိုပါတယ်။

အလားတူ သောင်ရင်းမြစ်ရေဟာလည်း မြဝတီမြို့မှာ စိုးရိမ်ရေမှတ် ၉၆၃ စင်တီမီတာထက် ကျော်လွန်ရောက်ရှိနေပြီး နောက် ၂၄ နာရီအတွင်း ၁,၀၂၈ စင်တီမီတာအထိ ထပ်မံမြင့်တက် လာနိုင်တယ်လို့ ဆိုပါတယ်။

ချင်းတွင်းမြစ်ရေဟာ ဟုမ္မလင်းမြို့မှာ နောက် ၂၄ နာရီအတွင်း စိုးရိမ်ရေမှတ်ကို ကျော်လွန်ကာ ၂,၉၂၁ စင်တီမီတာအထိ ရောက်ရှိလာနိုင်တယ်လို့ ဆိုပါတယ်။

အလားတူ သံလွင်မြစ်ရေဟာ ဘားအံမြို့မှာ နောက် ၂၄ နာရီအတွင်း စိုးရိမ်ရေမှတ်ကို ကျော်လွန်ကာ ၇၆၂ စင်တီမီတာသို့ လည်းကောင်း၊ ဘီးလင်းမြို့မှာ ၁,၀၃၅ စင်တီမီတာသို့ လည်းကောင်း အသီးသီး မြင့်တက်ကာ စိုးရိမ်ရေမှတ်အထက် ကျော်လွန် ရောက်ရှိနိုင်တယ်လို့ မိုးလေဝသနှင့် ဇလဗေဒညွှန်ကြားမှု ဦးစီးဌာနက ထုတ်ပြန်ထားပါတယ်။

မြို့တော် News Channel