အမေရိကန်နှင့် ပူးပေါင်းပြီး ဒရုန်းထုတ်လုပ်ရေး စက်ရုံတည်ဆောက်ရန် စီစဉ်နေတယ်လို့ သမ္မတ ဇယ်လန်စကီး ပြောဆို
ဇူလိုင် ၂၅
ယူကရိန်ရဲ့ အဆင့်မြင့် နည်းပညာတွေကို အသုံးပြုပြီး အမေရိကန်ပြည်ထောင်စုမှာ မောင်းသူမဲ့ ဒရုန်းယာဉ်တွေ ထုတ်လုပ်မယ့် စက်ရုံတစ်ရုံ တည်ဆောက်သွားဖို့ အမေရိကန်နဲ့ ပူးပေါင်းဆောင်ရွက်နေတယ်လို့ ယူကရိန် သမ္မတ ဗိုလိုဒီမီးယား ဇယ်လန်စကီးက ပြောဆိုလိုက်ပါတယ်။
အမေရိကန် လက်ယာယိမ်း ဘလော့ဂါ လိုရာ လူမားနဲ့ ပြုလုပ်ခဲ့တဲ့ အင်တာဗျူးမှာ သမ္မတ ဇယ်လန်စကီးက အမေရိကန်နဲ့ ရရှိထားတဲ့ မူလ သဘောတူညီချက်ကို အခြေခံပြီး ဒရုန်းပူးပေါင်း ထုတ်လုပ်ရေးကို အမြန်ဆုံး အကောင်အထည်ဖော်ချင်တယ်လို့ ထည့်သွင်းပြောဆိုခဲ့တာ ဖြစ်ပါတယ်။
ရုရှားနဲ့ ဖြစ်ပွားနေတဲ့ ၄ နှစ်ကြာ ပဋိပက္ခအတွင်း ယူကရိန်ဟာ အချိုးမညီ တိုက်ပွဲဝင်နည်းဗျူဟာ (asymmetrical warfare) နဲ့ ဒရုန်းနည်းပညာ တီထွင်ဆန်းသစ်မှုမှာ အထူး ထူးချွန်ခဲ့ပြီး လက်ရှိမှာတော့ ယူကရိန် ဒရုန်းတွေဟာ ကီလိုမီတာ ၃,၀၀၀ (မိုင် ၁,၈၀၀) ကျော်အထိ ပျံသန်း တိုက်ခိုက်နိုင်နေပြီ ဖြစ်ပါတယ်။
သမ္မတ ဇယ်လန်စကီးကတော့ ဒီပူးပေါင်းဆောင်ရွက်မှုဟာ နှစ်ဦးနှစ်ဖက်စလုံးအတွက် အကျိုးရှိစေမယ့် "Win-Win" သဘောတူညီချက်ဖြစ်တယ်လို့ ဆိုပါတယ်။
အိမ်ဖြူတော် အရာရှိတစ်ဦးရဲ့ အဆိုအရ သမ္မတ ဇယ်လန်စကီးနဲ့ အမေရိကန် သမ္မတ ဒေါ်နယ်ထရမ့် တို့ ဇူလိုင် ၂၈ ရက်မှာ တွေ့ဆုံဆွေးနွေးမှု မပြုလုပ်မီ သဘောတူညီချက်ရဲ့ အသေးစိတ် အချက်အလက်တွေကို ဝါရှင်တန်မှာ ဆက်လက် ညှိနှိုင်းနေဆဲ ဖြစ်တယ်လို့ ဆိုပါတယ်။
တစ်ဖက်မှာလည်း ပန်တဂွန် စစ်ဌာနချုပ်ရဲ့ "Drone Dominance" အစီအစဉ်အရ ယူကရိန် ကုမ္ပဏီ ၆ ခုက ဒရုန်း အစီးရေ ၁၀၀ ခန့်စီ အမေရိကန်ထံ တင်ပို့ခွင့် ရရှိထားသလို ပူးပေါင်းထုတ်လုပ်ရေးအတွက် ရည်ရွယ်ချက် ကြေညာချက် (statement of intent) ကိုလည်း သဘောတူ လက်မှတ်ရေးထိုးထားပြီး ဖြစ်ပါတယ်။
Ref & Photo; Reuters
မြို့တော် News Channel
#myotawnpt
#Myotaw
နိုင်ငံတကာသတင်း
