တရုတ်နျူကလီးယားရေငုပ်သင်္ဘောကနေ ဒုံးကျည် စမ်းသပ်ပစ်လွှတ်ခဲ့တာကြောင့် ပစိဖိတ်ဒေသအတွင်း စိုးရိမ်မှုမြင့်တက်

တရုတ်နျူကလီးယားရေငုပ်သင်္ဘောကနေ ဒုံးကျည် စမ်းသပ်ပစ်လွှတ်ခဲ့တာကြောင့် ပစိဖိတ်ဒေသအတွင်း စိုးရိမ်မှုမြင့်တက်

ဇူလိုင် ၆

တရုတ်စစ်တပ်က ဒီကနေ့ ဇူလိုင်လ ၆ ရက်နေ့မှာ ပစိဖိတ်သမုဒ္ဒရာအတွင်းကို နျူကလီးယားစွမ်းအင်သုံး ရေငုပ်သင်္ဘောကနေ ဒုံးကျည်တစ်စင်း စမ်းသပ်ပစ်လွှတ်ခဲ့တာကြောင့် ဂျပန်၊ ဩစတြေးလျနဲ့ နယူးဇီလန်တို့က ဒေသတွင်းလုံခြုံရေးအတွက် စိုးရိမ်မှုတွေ ထုတ်ဖော် ပြောဆိုလိုက်ပါတယ်။

ဆင်ဟွာသတင်းဌာနရဲ့ ဖော်ပြချက်အရ အဆိုဒုံးကျည်ဟာ ထိပ်ဖူးအတု တပ်ဆင်ထားတဲ့ ဒုံးကျည်သာပြီး နိုင်ငံတကာရေပိုင်နက်ဘက်ကို ပစ်လွှတ်ခဲ့ကာ သတ်မှတ်ထားတဲ့ ရေပြင်ဧရိယာအတွင်း ကျရောက်ခဲ့တယ်လို့ ပြောဆိုထားသလို ဒါဟာ နှစ်စဉ်လုပ်ရိုးလုပ်စဉ် စစ်ရေးလေ့ကျင့်မှုသာဖြစ်ပြီး ဘယ်နိုင်ငံကိုမှ ရည်ရွယ်တာမဟုတ်ဘူးလို့လည်း ဆိုပါတယ်။

ဒါပေမဲ့ ဩစတြေးလျ နိုင်ငံခြားရေးဝန်ကြီး ပန်နီဝေါင်ကတော့ အခုလို စမ်းသပ်ပစ်လွှတ်တာဟာ ဒေသတည်ငြိမ်ရေးကို ထိခိုက်စေနိုင်တဲ့ လုပ်ရပ်ဖြစ်ပြီး တရုတ်ရဲ့ စစ်ရေးအင်အား တိုးချဲ့နေမှုဟာ ပွင့်လင်းမြင်သာမှု မရှိဘူးလို့လည်း ဝေဖန်ထားပါတယ်။

အခုပစ်ခတ်မှုဟာ သြစတြေးလျနဲ့ ဖီဂျီနိုင်ငံတို့ တိုက်ခိုက်ခံရရင် အပြန်အလှန်ကူညီဖို့ ကာကွယ်ရေးမဟာမိတ် သဘောတူညီချက်ကို လက်မှတ်ရေးထိုးပြီး နာရီပိုင်းအကြာမှာပဲ ပေါ်ပေါက်လာတာ ဖြစ်ပါတယ်။

နယူးဇီလန်အခြေစိုက် သင်္ဘောလှုပ်ရှားမှု စောင့်ကြည့်လေ့လာဆန်းစစ်သူ မာ့ခ် ဒေါက်ဂလပ်စ်ကတော့ အဆိုပါ ဒုံးကျည်စမ်းသပ်မှုကို အချိန်အတော်ကြာကတည်းက စီစဉ်ထားခဲ့တာဖြစ်နိုင်ပြီး ဩစတြေးလျနဲ့ ဖီဂျီတို့ ကာကွယ်ရေးမဟာမိတ် သဘောတူညီချက် လက်မှတ်ရေးထိုးပြီးနောက်မှ တရုတ်က အချိန်ကိုက် အသိပေးလာတာက စိတ်ဝင်စားစရာကောင်းတယ်လို့ သုံးသပ်ထားတယ်။

အဆိုပါ ကာကွယ်ရေးသဘောတူညီချက်နဲ့ ပတ်သက်ပြီး တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မော်နင်ကတော့ သက်ဆိုင်ရာနိုင်ငံတွေအနေနဲ့ ကျွန်းနိုင်ငံတွေရဲ့ လွတ်လပ်မှုနဲ့ ကိုယ်ပိုင်ပြဋ္ဌာန်းခွင့်ကို လေးစားဖို့ မျှော်လင့်ကြောင်း၊ တတိယအဖွဲ့အစည်းတွေရဲ့ အကျိုးစီးပွားကို ပစ်မှတ်ထားတာ ဒါမှမဟုတ် ထိခိုက်အောင်လုပ်တာမျိုးကနေ ရှောင်ကြဉ်ကြဖို့ မျှော်လင့်ကြောင်း တုံ့ပြန်ပြောဆိုသွားပါတယ်။

Ref & Photo; Reuters

မြို့တော် News Channel