ကလေးသူငယ်များ ဆိုရှယ်မီဒီယာ သုံးစွဲမှုကို ကန့်သတ်ဖို့ ဥရောပကော်မရှင် ပြင်ဆင်နေ
ဇူလိုင် ၁၃
ဥရောပသမဂ္ဂ (EU) ရဲ့ အုပ်ချုပ်ရေးအဖွဲ့ဖြစ်တဲ့ ဥရောပကော်မရှင်အနေနဲ့ ကလေးသူငယ်တွေ ဆိုရှယ်မီဒီယာ သုံးစွဲခွင့်ကို ကန့်သတ်မယ့် အဆိုပြုချက်တခုကို နွေရာသီအလွန်မှာ တင်သွင်းသွားမယ်လို့ ဥရောပကော်မရှင်ဥက္ကဋ္ဌ အာဆူလာ ဗွန်ဒါလေယန်က ဒီကနေ့ ဇူလိုင်လ ၁၃ ရက်နေ့မှာ ပြောဆိုလိုက်ပါတယ်။
“ကျွန်မတို့ရဲ့ ကလေးတွေဟာ တကယ့်လက်တွေ့ကမ္ဘာမှာ အချိန်ပေးဖို့ လိုအပ်ပါတယ်။ ဆော့ကစားဖို့၊ သူငယ်ချင်းအသစ်တွေ ဖွဲ့ဖို့နဲ့ အမှားတွေကနေ သင်ခန်းစာယူဖို့ အချိန်လိုသလို အယ်လ်ဂိုရီသမ် (Algorithm) တွေရဲ့ ပုံသွင်းမှုကို မခံရခင် သူတို့ရဲ့ ကိုယ်ပိုင်လက္ခဏာနဲ့ အရည်အသွေးတွေကို ကိုယ်တိုင် ပုံဖော်ထုဆစ်ဖို့ အချိန်လိုအပ်ပါတယ်” လို့ ဘရပ်ဆဲလ်မြို့မှာ ပြုလုပ်တဲ့ သတင်းစာရှင်းလင်းပွဲအတွင်း ဗွန်ဒါလေယန်က သတင်းထောက်တွေကို ပြောဆိုခဲ့တာ ဖြစ်ပါတယ်။
ဒါ့အပြင် ဒီအစီအစဉ်ဟာ ကလေးတွေ လူမှုကွန်ရက်ကို အသုံးပြုခွင့်ရှိသင့်၊ မရှိသင့်ဆိုတဲ့ ကိစ္စမဟုတ်ဘဲ လူမှုကွန်ရက်တွေက ကလေးတွေဆီ ဘယ်အချိန်မှာ၊ ဘယ်လိုနည်းနဲ့ ရောက်ရှိနိုင်မလဲဆိုတဲ့ ကိစ္စကို ထိန်းချုပ်ဖို့ အဓိကထား ဆောင်ရွက်တာဖြစ်တယ်လို့လည်း ဥရောပကော်မရှင်ဥက္ကဋ္ဌက ဆိုပါတယ်။
လက်ရှိမှာ ဥရောပနိုင်ငံတချို့ဟာ ကလေးသူငယ်တွေရဲ့ ဆိုရှယ်မီဒီယာအသုံးပြုမှုကို တင်းကျပ်ဖို့ သီးခြားအစီအစဉ်တွေကိုလည်း အကောင်အထည်ဖော်နေကြပါတယ်။ ပြင်သစ်နိုင်ငံအနေနဲ့ အသက် ၁၅ နှစ်အောက် ကလေးတွေအတွက် ဆိုရှယ်မီဒီယာအသုံးပြုခွင့် ကန့်သတ်ရေးဥပဒေကို အတည်ပြုထားပြီး၊ ဒိန်းမတ်၊ စပိန်နဲ့ ဂရိနိုင်ငံတို့ကလည်း အသက်ကန့်သတ်ချက်တွေ ချမှတ်နိုင်ရေး ဆွေးနွေးနေပါတယ်။
ဩစတြေးလျနိုင်ငံကတော့ အသက် ၁၆ နှစ်အောက် ကလေးသူငယ်တွေ ဆိုရှယ်မီဒီယာအသုံးပြုခွင့်ကို ကန့်သတ်တဲ့ ဥပဒေကို စတင်ကျင့်သုံးနေပြီ ဖြစ်ပေမယ့်၊ မကြာသေးခင်က ထုတ်ပြန်တဲ့ လေ့လာမှုတစ်ခုအရ အသက်အတည်ပြုစနစ်မှာ အားနည်းချက်တွေ ရှိနေသေးတာကြောင့် အကောင်အထည်ဖော်ရာမှာ စိန်ခေါ်မှုတွေ ရှိနေဆဲဖြစ်တယ်လို့ ဆိုပါတယ်။
ဒါ့အပြင် အမေရိကန်ပြည်ထောင်စုရဲ့ ပြည်နယ်တချို့မှာလည်း အသက်မပြည့်သေးတဲ့ ကလေးငယ်တွေ ဆိုရှယ်မီဒီယာ အကောင့်ဖွင့် သုံးစွဲခွင့်ကို မိဘခွင့်ပြုချက်ပါမှ ရရှိစေဖို့ ဒါမှမဟုတ် အသက်ကန့်သတ်ချက် ဥပဒေတွေ ပြဋ္ဌာန်းပြီး တင်းတင်းကျပ်ကျပ် ထိန်းချုပ်ဖို့ ဥပဒေကြမ်းတွေ တင်သွင်းဆွေးနွေးတာ၊ အတည်ပြုတာမျိုးတွေ လုပ်ဆောင်လာနေပါတယ်။
အလားတူ နည်းပညာကုမ္ပဏီကြီးတွေဖြစ်တဲ့ Meta နဲ့ TikTok တို့လို ပလက်ဖောင်းတွေ အနေနဲ့လည်း ကလေးသူငယ်တွေ ဘေးကင်းလုံခြုံစေမယ့် ကန့်သတ်ချက်စနစ်တွေ၊ မိဘက ထိန်းချုပ်ကြီးကြပ်နိုင်မယ့် လုပ်ဆောင်ချက် (Parental Control) တွေကို ပိုမိုမြှင့်တင်ပေးဖို့ နိုင်ငံတကာအစိုးရတွေရဲ့ ဖိအားပေးမှုကို ခပ်စိပ်စိပ် ရင်ဆိုင်နေရပါတယ်။
Ref & Photo; Reuters
မြို့တော် News Channel
နိုင်ငံတကာသတင်း
