ဥရောပမှာ ဇွန်လနှောင်းပိုင်း အပူလှိုင်းကြောင့် တစ်ပတ်အတွင်း လူပေါင်းတစ်သောင်းကျော် ပိုမိုသေဆုံးခဲ့

ဥရောပမှာ ဇွန်လနှောင်းပိုင်း အပူလှိုင်းကြောင့် တစ်ပတ်အတွင်း လူပေါင်းတစ်သောင်းကျော် ပိုမိုသေဆုံးခဲ့

ဇူလိုင် ၁၃

ဇွန်လနှောင်းပိုင်းမှာ ဥရောပအနောက်ပိုင်းကို ဖုံးလွှမ်းခဲ့တဲ့ စံချိန်တင်အပူလှိုင်းကြောင့် ဥရောပနိုင်ငံတွေမှာ တစ်ပတ်အတွင်း ပုံမှန်ထက် လူသေဆုံးမှု ၁၀,၆၅၀ ဦးအထိ ရှိခဲ့တယ်လို့ ဥရောပသေဆုံးမှုစောင့်ကြည့်ရေးကွန်ရက် (EUROMOMO) က ထုတ်ပြန်တဲ့ အချက်အလက်တွေအရ သိရပါတယ်။

အဲဒီထဲက ၉,၀၀၀ ကျော်ဟာ အသက် ၆၅ နှစ်နဲ့အထက် သက်ကြီးရွယ်အိုတွေဖြစ်ပြီး၊ ပြင်းထန်တဲ့အပူချိန်ကြောင့် အပူလျှပ်ခြင်း၊ နှလုံးသွေးကြောနဲ့ အသက်ရှူလမ်းကြောင်းဆိုင်ရာ ရောဂါတွေ ပိုမိုဆိုးရွားလာတာတွေကြောင့် အသက်အန္တရာယ်အထိ ဖြစ်စေခဲ့တာလို့ ကျွမ်းကျင်သူတွေက ပြောပါတယ်။

EUROMOMO ကို တာဝန်ယူထားရတဲ့ အကြီးတန်းဆရာဝန် လက်စ်စ် ဗက်စ်တာဂေါ့ဒ်ကတော့ “နှစ်တစ်နှစ်ရဲ့ ဒီလိုအချိန်မျိုးမှာ သေဆုံးမှု ဒီလောက်အထိ များပြားနေတာဟာ ပုံမှန်မဟုတ်ပါဘူး။ တကယ်ကို မြင့်မားတဲ့ ပမာဏပါ၊ အခုလိုပုံမှန်ထက် သေဆုံးမှု မြင့်တက်တာလာဟာ ပြင်းထန်တဲ့အပူလှိုင်းကလွဲလို့ တခြားအကြောင်းရင်းနဲ့ ရှင်းပြဖို့ ခက်ခဲတယ်” လို့ ဆိုပါတယ်။

သိပ္ပံပညာရှင်တွေကတော့ ကမ္ဘာကြီးပူနွေးလာမှုကို ပိုမိုဆိုးရွားစေပြီး အပူလှိုင်းတွေကို ပိုမိုကြိမ်ဖန်များစွာနဲ့ ပြင်းထန်စွာ ဖြစ်ပေါ်စေတဲ့ လူသားတွေကြောင့်ဖြစ်ရတဲ့ ရာသီဥတုပြောင်းလဲမှုသာမရှိရင် အခုလို ဇွန်လနှောင်းပိုင်း အပူလှိုင်းမျိုး ဖြစ်လာဖို့ဆိုတာ တကယ့်ကို မဖြစ်နိုင်သလောက်ပဲလို့ ဆိုပါတယ်။

EUROMOMO ရဲ့ အချက်အလက်တွေအရ ဇွန်လ ၂၂ ရက်ကနေ ၂၈ ရက်အတွင်း ပြင်သစ်၊ စပိန်၊ ဗြိတိန်နဲ့ အခြားဥရောပနိုင်ငံတွေမှာ အပူလှိုင်း အမြင့်ဆုံးရောက်ခဲ့ပြီး၊ ပြင်သစ်နဲ့ ဘယ်လ်ဂျီယံနိုင်ငံတွေမှာ လူသေဆုံးမှု အလွန်မြင့်မားခဲ့တယ်လို့ သိရပါတယ်။

ဒါ့အပြင် သီးခြားလေ့လာတွေ့ရှိချက်အရ အင်္ဂလန်နဲ့ ဝေလ်စ်မှာ မေလနဲ့ ဇွန်လအတွင်း ဖြစ်ပွားခဲ့တဲ့ အပူလှိုင်းတွေကြောင့် သေဆုံးသူ ၂,၇၀၀ ခန့်ရှိခဲ့ပြီး အဲဒီထဲက ၄၂ ရာခိုင်နှုန်းဟာ ကမ္ဘာကြီးပူနွေးလာမှုကြောင့် ဖြစ်ပေါ်လာရတဲ့ အပိုအပူရှိန်ကြောင့် တိုက်ရိုက်သေဆုံးခဲ့ရတာ ဖြစ်တယ်လို့ ဆိုပါတယ်။

Ref & Photo; Reuters

မြို့တော် News Channel