နီပေါနိုင်ငံမှာ ရုတ်တရက် ရေကြီးမြေပြိုမှု ထပ်မံဖြစ်ပွားပြီး လူ ၅ ဦး ပျောက်ဆုံးနေ

နီပေါနိုင်ငံမှာ ရုတ်တရက် ရေကြီးမြေပြိုမှု ထပ်မံဖြစ်ပွားပြီး လူ ၅ ဦး ပျောက်ဆုံးနေ

အောက်တိုဘာ ၁၂

နီပေါနိုင်ငံမှာ ရုတ်တရက် ရေကြီးရေလျှံမှု နောက်တစ်ကြိမ် ထပ်မံဖြစ်ပွားခဲ့တာကြောင့် အနည်းဆုံး လူ ၅ ဦး ပျောက်ဆုံးနေပြီး နီပေါစစ်တပ်က ဘေးသင့်ဒေသတွေဆီကို သွားရောက်ကာ အရေးပေါ် ရှာဖွေကယ်ဆယ်ရေးလုပ်ငန်းတွေကို လုပ်ဆောင်နေရပါတယ်။

ပြီးခဲ့တဲ့ အောက်တိုဘာလ ၁၁ ရက်နေ့က တောင်ပြိုကျမှုကြောင့် မြေသားနဲ့ သဲတွေ ပိတ်ဆို့ပြီး မြစ်ရေလျှံတက်ရာကနေ နီပေါနိုင်ငံ အလယ်ပိုင်း ဂေါ်ရ်ခါခရိုင်အတွင်း ရွှံ့နွံမြေပြိုကျမှုတွေ စတင်ဖြစ်ပေါ်ခဲ့တာ ဖြစ်တယ်လို့ နီပေါစစ်တပ်က တာဝန်ရှိသူတွေက ပြောပါတယ်။

ရုပ်သံမှတ်တမ်းတွေအရ တောင်တန်းတွေ ဝန်းရံထားတဲ့ တောင်ကြားချိုင့်ဝှမ်းဒေသအတွင်း ရွှံ့နွံရေတွေ အရှိန်အဟုန်ပြင်းပြင်းနဲ့ စီးဆင်းနေတာကြောင့် အနီးနားက ဒေသခံတွေဟာ ဘေးလွတ်ရာ ကုန်းမြင့်ပိုင်းတွေကို အရေးပေါ် ရွှေ့ပြောင်းနေကြရတာကို တွေ့ရပါတယ်။

ဒါ့အပြင် မြစ်ကမ်းတစ်လျှောက် နေထိုင်ကြတဲ့ ဒေသခံပြည်သူတွေအနေနဲ့လည်း ဘေးကင်းရာကို အမြန်ဆုံး ရွှေ့ပြောင်းကြဖို့ နီပေါအာဏာပိုင်တွေက အရေးပေါ် သတိပေး နှိုးဆော်ထားပါတယ်။

အဆိုပါ သဘာဝဘေးကြောင့် လူနေအိမ် ၄၀ ဝန်းကျင်နဲ့ တံတားတချို့ ရေစီးနဲ့အတူ မျောပါပျက်စီးသွားသလို ရေအားလျှပ်စစ် အဆောက်အအုံတစ်ခုလည်း ထိခိုက်ပျက်စီးခဲ့ရတယ်လို့ ဒေသတွင်း သတင်းမီဒီယာတွေက ဖော်ပြပါတယ်။

လက်ရှိအချိန်အထိတော့ တပ်ဖွဲ့ဝင်တွေအနေနဲ့ ပိတ်မိနေတဲ့ ဒေသခံ ၄၀ ကျော်ကို အသက်ဘေးကနေ ဘေးကင်းစွာ ကယ်တင်ပေးနိုင်ခဲ့ပြီ ဖြစ်တယ်လို့ နီပေါစစ်တပ်က အတည်ပြု ပြောဆိုထားပါတယ်။

ပြီးခဲ့တဲ့ သြဂုတ်လတုန်းကလည်း တရုတ်နယ်စပ်နဲ့ ထိစပ်နေတဲ့ ဒေသတွေမှာ အလားတူ ရုတ်တရက် ရေကြီးရေလျှံမှု အကြီးအကျယ် ဖြစ်ပွားခဲ့တာကြောင့် နီပေါနိုင်ငံဘက်ခြမ်းမှာ လူပေါင်း ၁,၄၅၅ ဦး သေဆုံးခဲ့ရပြီး ဂျပန်နိုင်ငံသား ၅ ဦး အပါအဝင် လူပေါင်း ၅,၂၀၀ ကျော် ပျောက်ဆုံးနေဆဲ ဖြစ်ပါတယ်။

Ref & Photo: NHK

မြို့တော် News Channel