စံချိန်တင် နွေရာသီ အပူလှိုင်းဒဏ်ကို အနိုင်ယူဖို့ ခွေးသားစွပ်ပြုတ် သောက်ကြဖို့ မြောက်ကိုရီးယား တိုက်တွန်း

စံချိန်တင် နွေရာသီ အပူလှိုင်းဒဏ်ကို အနိုင်ယူဖို့ ခွေးသားစွပ်ပြုတ် သောက်ကြဖို့ မြောက်ကိုရီးယား တိုက်တွန်း

ဩဂုတ် ၄

ကိုရီးယားကျွန်းဆွယ်တစ်ခွင် စံချိန်တင် အပူချိန်တွေ မြင့်တက်နေချိန်မှာ မြောက်ကိုရီးယား အစိုးရပိုင် မီဒီယာတွေက နွေရာသီ အပူဒဏ်ကို အနိုင်ယူနိုင်ဖို့အတွက် ခွေးသားစွပ်ပြုတ် သောက်ကြဖို့ တိုက်တွန်းလိုက်ပါတယ်။

အာဏာရ အလုပ်သမားပါတီရဲ့ ရိုဒေါင်ဆင်းမွန်း သတင်းစာမှာ အပူဒဏ်ကြောင့် နှလုံး၊ သွေးကြောနဲ့ ဆီးချိုရောဂါတွေ ပိုဆိုးလာနိုင်တာမို့ ဖရဲသီး၊ ပဲတီစိမ်းနဲ့ သခွားသီးတို့လို အေးတဲ့ အစားအစာတွေအပြင် အာဟာရဓာတ် ကြွယ်ဝတဲ့ ခွေးသားစွပ်ပြုတ်ကို စားသုံးကြဖို့ အကြံပြုထားတာပါ။

"ဒန်ဂိုဂီ" (Dangogi) လို့ ခေါ်တဲ့ ခွေးသားစွပ်ပြုတ်ကို မြောက်ကိုရီးယားအစိုးရက ရိုးရာ ကျန်းမာရေး အားဖြည့်စာအဖြစ် အစဉ်အဆက် အားပေးခဲ့ပေမဲ့ သာမန်ပြည်သူတွေအတွက်တော့ စျေးကြီးလွန်းတဲ့ အစားအစာ ဖြစ်နေဆဲပါ။

ပြုံယမ်းအစိုးရကတော့ ဒန်ဂိုဂီကို ဆယ်စုနှစ်ပေါင်းများစွာ မြှင့်တင်လာခဲ့ပြီး တေဒေါင်မြစ် တလျှောက်မှာ အဆင့်မြင့် အထူးစားသောက်ဆိုင်တွေ ဖွင့်လှစ်ထားသလို ဒေသအလိုက် ချက်ပြုတ်နည်းတွေကိုလည်း ယဉ်ကျေးမှုအမွေအနှစ်အဖြစ် မှတ်ပုံတင်ထားပါတယ်။

ဒါ့အပြင် မြို့တော်ပြုံယမ်းမှာ နှစ်စဉ် ဟင်းချက်ပြိုင်ပွဲတွေ ကျင်းပပေးပြီး နွေရာသီ အပူဒဏ်ကို ကြံ့ကြံ့ခံ ရင်ဆိုင်တဲ့ မျိုးချစ်စိတ်ဓာတ်တစ်ရပ်အဖြစ် ပုံဖော်ကာ ခွေးသားရဲ့ အခန်းကဏ္ဍကို မြှင့်တင်ပေးနေပါတယ်။

"ဒန်ဂိုဂီက မြောက်ကိုရီးယားမှာ ရေပန်းစားပေမဲ့ စျေးကြီးတဲ့ အစားအစာပါ။ အဓိကကတော့ အပူဒဏ်ကို ခံနိုင်ရည်ရှိအောင် နွေရာသီ ပူပြင်းတဲ့ရက်တွေမှာ စားသုံးကြတာများပါတယ်" လို့ မြောက်ကိုရီးယား သံတမန်ဟောင်း ရီချောက ပြောပါတယ်။

ဒါပေမဲ့လည်း ခွေးတွေကို အစားအစာအဖြစ် သတ်ဖြတ် စားသုံးခြင်းဟာ အလွန် ရက်စက်ရာ ရောက်တာကြောင့် အပြီးတိုင် ရပ်တန့်သင့်တယ်လို့ တိရစ္ဆာန် အခွင့်အရေး လှုပ်ရှားသူအဖွဲ့တွေက ပြင်းပြင်းထန်ထန် ဝေဖန်ထောက်ပြနေကြပါတယ်။

ဒီလို လုပ်ဆောင်ချက်ဟာ ၂၀၂၄ ခုနှစ်မှာ ခွေးမွေးမြူတာ၊ သတ်ဖြတ်တာနဲ့ ရောင်းချတာတွေကို ဥပဒေနဲ့ အပြီးတိုင် ပိတ်ပင်လိုက်တဲ့ တောင်ကိုရီးယားနိုင်ငံရဲ့ လုပ်ဆောင်ချက်နဲ့ လုံးဝ ဆန့်ကျင်ဘက် ဖြစ်နေပါတယ်။

တောင်ကိုရီးယားမှာ ၂၀၂၇ ခုနှစ် ဖေဖော်ဝါရီလအထိ ၃ နှစ် ကြာ ကင်းလွတ်ခွင့်ကာလ ပေးထားပြီး နောက်ပိုင်းမှာ လိုက်နာခြင်းမရှိရင် ထောင်ဒဏ် ၃ နှစ်အထိဖြစ်စေ၊ ဒဏ်ငွေ ကိုရီးယားဝမ် သန်း ၃၀ (အမေရိကန်ဒေါ်လာ ၂၂,၀၀၀ နီးပါး) ဖြစ်စေ ပြစ်ဒဏ်ခတ်ခံရမှာ ဖြစ်ပါတယ်။

လက်ရှိမှာတော့ ကိုရီးယားကျွန်းဆွယ် နှစ်ဖက်လုံးမှာ အပူချိန် ၃၅ ဒီဂရီကနေ ၄၀ ဒီဂရီအထိ ရှိနေပြီး အပြင်းထန်ဆုံး အပူလှိုင်းဒဏ်ကို ရင်ဆိုင်နေကြရပါတယ်။

မိုးလေဝသ ပညာရှင်တွေရဲ့ ထုတ်ပြန်ချက်အရ ဂျပန်ဘက်ကို ဦးတည်နေတဲ့ တိုင်ဖုန်းမုန်တိုင်း ဒိုဖင်း (Typhoon Dolphin) ကြောင့် ပူပြင်းခြောက်သွေ့တဲ့ လေတွေ ပိုမိုတိုက်ခတ်လာနိုင်တာမို့ အပူချိန်တွေ ဆက်လက် မြင့်တက်နေဦးမယ်လို့ သိရပါတယ်။

Ref & Photo; Bangkok Post

မြို့တော် News Channel