မင်းအောင်လှိုင်နဲ့ မတွေ့ဆုံခင် မြန်မာနိုင်ငံနဲ့ အခြေအနေပေါ် မူတည်ပြီး ပြန်လည်ထိတွေ့ဆက်ဆံဖို့ ထိုင်းဝန်ကြီးချုပ် တိုက်တွန်း

မင်းအောင်လှိုင်နဲ့ မတွေ့ဆုံခင် မြန်မာနိုင်ငံနဲ့ အခြေအနေပေါ် မူတည်ပြီး ပြန်လည်ထိတွေ့ဆက်ဆံဖို့ ထိုင်းဝန်ကြီးချုပ် တိုက်တွန်း

ဩဂုတ် ၄

မင်းအောင်လှိုင်နဲ့ ဩဂုတ် ၆ ရက်နေ့နဲ့ ၇ ရက်နေ့မှာ တွေ့ဆုံဖို့ရှိနေတဲ့ ထိုင်းဝန်ကြီးချုပ် အနူတင် ချန်ဗီရာကွန်က မြန်မာနိုင်ငံနဲ့ အခြေအနေပေါ် မူတည်ပြီး ထိတွေ့ဆက်ဆံမှုတွေ ပြန်လည်စတင်ဖို့ အာဆီယံကို တိုက်တွန်းလိုက်ပါတယ်။

အင်ဒိုနီးရှားနိုင်ငံ မြို့တော် ဂျကာတာမှာရှိတဲ့ အာဆီယံအဖွဲ့ချုပ်ရုံးချုပ်မှာ အာဆီယံအထွေထွေအတွင်းရေးမှူးချုပ် ကောင်ကင်ဟွန်းနဲ့ တွေ့ဆုံခဲ့ပြီးနောက် အနူတင်က အခုလို ပြောဆိုလိုက်တာဖြစ်ပြီး အနုတင်ဟာ အင်ဒိုနီးရှားသမ္မတ ပရာဘိုဝို ဆူဘီယန်တိုနဲ့လည်း ဩဂုတ် ၃ ရက်နေ့က တွေ့ဆုံခဲ့ပါသေးတယ်။

အာဆီယံရဲ့ အကြမ်းဖက်မှု ရပ်တန့်ရေးနဲ့ လူသားချင်းစာနာမှု အကူအညီများ ပေးအပ်ရေး ပါဝင်တဲ့ ဘုံသဘောတူညီချက် ၅ ချက်ဟာ မြန်မာ့အရေး ဖြေရှင်းဖို့ အဓိက လမ်းညွှန်မူဘောင်အဖြစ် ဆက်လက်ရှိနေဆဲဖြစ်တယ်လို့ ထိုင်းဝန်ကြီးချုပ်က ဆိုပါတယ်။

ထိုင်းနိုင်ငံအနေနဲ့ ပွင့်လင်းစွာတဲ့ စကားဝိုင်းဆွေးနွေးမှုတွေအတွက် ဆက်လက် တံခါးဖွင့်ထားပြီး မြေပြင်အခြေအနေမှန်တွေနဲ့အညီ တုံ့ပြန်ကာ တိကျတဲ့ တိုးတက်မှုတွေ ရရှိလာအောင် အားပေးတဲ့ "အခြေအနေပေါ် မူတည်ပြီး နည်းလမ်းတကျ ပြန်လည်ထိတွေ့ဆက်ဆံရေး" မူဝါဒကို အမြဲတမ်း အားပေးထောက်ခံခဲ့တယ်လို့ အနူတင်က ဆိုပါတယ်။

ဒါ့အပြင် ဩဂုတ် ၃ ရက်နေ့က အပြည်ပြည်ဆိုင်ရာ ကြက်ခြေနီကော်မတီ (ICRC) ကိုယ်စားလှယ်နဲ့ တွေ့ဆုံခဲ့တဲ့ ဒေါ်အောင်ဆန်းစုကြည်ဟာ ကျန်းမာရေး ကောင်းမွန်တဲ့အခြေအနေမှာ ရှိနေတယ်လို့ ယူဆရတာကြောင့် ထိုင်းနိုင်ငံရဲ့ ချဉ်းကပ်မှုဟာ လမ်းကြောင်းမှန်ပေါ် ရောက်နေပြီလို့လည်း အနုတင်က ဖြည့်စွက်ပြောဆိုပါတယ်။

ဒါပေမယ့် အာဆီယံအနေနဲ့ လက်ရှိအချိန်မှာ မြန်မာနိုင်ငံနဲ့ ပြန်လည်ထိတွေ့ဆက်ဆံတာဟာ စစ်တပ်ဦးဆောင်တဲ့ အစိုးရကို နိုင်ငံရေးအရ တရားဝင်အသိအမှတ်ပြုသလို ဖြစ်လာနိုင်တယ်လို့ ဝေဖန်ထောက်ပြမှုတွေလည်း ရှိနေသလို ပြီးခဲ့တဲ့လကလည်း ဖိလစ်ပိုင် နိုင်ငံခြားရေးဝန်ကြီး မာရီယာ ထရီဆာ လာဇာရိုက အာဆီယံ အစည်းအဝေးတွေမှာ မြန်မာနိုင်ငံ ပြန်လည်ပါဝင်ခွင့်ရဖို့ဆိုတာ ဝေးကွာနေသေးတယ်လို့ ပြောဆိုထားပါတယ်။

Ref & Photo; Reuters

မြို့တော် News Channel