ဗန်ဂိုးရဲ့ နှစ်ပေါင်း ၆၀ ကျော် အများပြည်သူရှေ့က ပျောက်ကွယ်နေခဲ့တဲ့ ပန်းချီကား လေလံတင်မယ်

ဗန်ဂိုးရဲ့ နှစ်ပေါင်း ၆၀ ကျော် အများပြည်သူရှေ့က ပျောက်ကွယ်နေခဲ့တဲ့ ပန်းချီကား လေလံတင်မယ်

အောက်တိုဘာ ၁၃

ကမ္ဘာကျော် ဒတ်ခ်ျပန်းချီဆရာကြီး ဗင်းဆင့် ဗန်ဂိုးရဲ့ နှစ်ပေါင်း ၆၀ ကျော် အများပြည်သူရှေ့က ပျောက်ကွယ်နေခဲ့တဲ့ ရှားပါးလက်ရာတခုကို လာမယ့် နိုဝင်ဘာလ ၁၈ ရက်နေ့ နယူးယောက်မြို့ ဆော့သ်ဘီလေလံအိမ်မှာ လေလံတင် ရောင်းချသွားတော့မယ်လို့ ရိုက်တာသတင်းဌာနက ဖော်ပြပါတယ်။

အဆိုပါ ပန်းချီကားဟာ အမေရိကန်ဒေါ်လာ သန်း ၁၈၀ ဝန်းကျင်အထိ ရရှိနိုင်တယ်လို့ ခန့်မှန်းထားပြီး ဗန်ဂိုးရဲ့ လက်ရာတွေထဲမှာ လေလံဈေးနှုန်း စံချိန်သစ်တင်နိုင်ဖွယ် ရှိတယ်လို့ ဆိုပါတယ်။

“ပန်းပွင့်နေသော သစ်အယ်ပင်များ” “Châtaigniers en fleurs” လို့ အမည်ရတဲ့ အဆိုပါပန်းချီကားကို ၁၈၉၀ ပြည့်နှစ် မေလမှာ ရေးဆွဲခဲ့တာဖြစ်ပြီး ပန်းပွင့်တွေနဲ့ ဝေဆာနေတဲ့ သစ်အယ်ပင်ကြီးတပင်ကို ပုံဖော်ထားတာပါ။ ဒီလက်ရာဟာ ဗန်ဂိုးမကွယ်လွန်မီ နောက်ဆုံးကာလတွေအတွင်း ရေးဆွဲခဲ့တဲ့ အရေးပါတဲ့ ပန်းချီကားတွေထဲက တစ်ချပ်လည်း ဖြစ်ပါတယ်။

ဗန်ဂိုးဟာ ဒီပန်းချီကားကို ရေးဆွဲပြီး နှစ်လခန့်အကြာမှာ ပြင်သစ်နိုင်ငံ အိုဗဲ-ဆူရာအွာ့ဇ်ရွာမှာ အသက် ၃၇ နှစ်အရွယ်နဲ့ ကွယ်လွန်ခဲ့ပါတယ်။

အခုလေလံပွဲမှာ ဒီပန်းချီကားအပြင် နှစ်ပေါင်းများစွာ အများပြည်သူရှေ့ မပြသခဲ့တဲ့ ပန်းချီလက်ရာ စုစုပေါင်း ၁၂ ခုကို လေလံတင် ရောင်းချသွားမှာဖြစ်ပြီး ကမ္ဘာကျော်ပန်းချီဆရာတွေဖြစ်တဲ့ ပေါလ် ဆီဇန်းနဲ့ ကလော့ဒ် မိုနေးတို့ရဲ့ လက်ရာတွေလည်း ပါဝင်မယ်လို့ သိရပါတယ်။

“ပန်းပွင့်နေသော သစ်အယ်ပင်များ” ပန်းချီကားကို ကြည့်ရှုဖို့ အောက်တိုဘာလ ၁၃ ရက်နေ့က ဟောင်ကောင်မြို့မှာ လူရာနဲ့ချီ တန်းစီခဲ့ကြပြီး လေလံပွဲမတိုင်မီကတည်းက အနုပညာလောကရဲ့ စိတ်ဝင်စားမှုကို ရရှိနေပါတယ်။

Ref & Photo: Reuters

မြို့တော် News Channel