ဖုန်းထဲမှာ စလော့ဂိမ်းဆော့ထားတာ တွေ့လို့ဆိုကာ လူငယ် ၄ ဦး ဖမ်းဆီးခံခဲ့ရပြီး ၂ ဦး စစ်မှုထမ်းထဲ ထည့်ခံရ
နိုဝင်ဘာ ၁၉
ရှမ်းပြည်နယ်တောင်ပိုင်း၊ နမ့်စန်ခရိုင်၊ ခိုလမ်ရဲစခန်းက နယ်ထိန်းရဲတပ်ဖွဲ့ဝင်တွေဟာ ဒေသခံပြည်သူတွေအပေါ် ခြိမ်းခြောက်ငွေညှစ်တာတွေအပြင် လူငယ်တွေကို မတရားဖမ်းဆီးပြီး စစ်မှုထမ်းထဲ အတင်းအဓမ္မ ပို့ဆောင်တာတွေ လုပ်ဆောင်နေတယ်လို့ ဒေသခံတွေဆီက သိရပါတယ်။
ပြီးခဲ့တဲ့ နိုဝင်ဘာလ ၁၄ ရက်နေ့ ညနေပိုင်းက ခိုလမ်မြို့၊ ရပ်ကွက် (၁) အတွင်း လမ်းဘေးမှာ ထိုင်နေတဲ့ ဒေသခံ အမျိုးသား ၄ ဦးကို ဖုန်းထဲမှာ စလော့ဂိမ်း ဆော့ထားတာ တွေ့တယ်ဆိုတဲ့ အကြောင်းပြချက်နဲ့ ဖမ်းဆီးခေါ်ဆောင်သွားခဲ့တယ်လို့ သိရပါတယ်။
အဲဒီနောက် ဖမ်းဆီးခံရသူ ၄ ဦးထဲက ၂ ဦးကိုတော့ လာဘ်ငွေယူပြီး ပြန်လွှတ်ပေးခဲ့ပေမဲ့ ငွေမပေးနိုင်တဲ့ ကျန်အမျိုးသား ၂ ဦးကိုတော့ မိဘဆွေမျိုးတွေနဲ့ လုံးဝတွေ့ခွင့်မပေးဘဲ ကျိုင်းတုံမြို့က စစ်မှုထမ်း သင်တန်းကျောင်းထဲကို အတင်းအဓမ္မ ပို့ဆောင်လိုက်တယ်လို့ ဒေသခံတစ်ဦးက ပြောပါတယ်။
"တည်ဆဲဥပဒေအရ အရေးယူတာမျိုး မဟုတ်ဘဲ ငွေပေးနိုင်တဲ့သူကျ လွှတ်ပေးပြီး ငွေမပေးနိုင်တဲ့ သူတွေကိုကျတော့ မိသားစုနဲ့တောင် တွေ့ခွင့်မပေးဘဲ စစ်မှုထမ်းထဲ ထည့်လိုက်တာပါ။ တပ်ကြပ် ဇော်ဇော်အောင်နဲ့ နယ်ထိန်း စိုးမောင်မောင်တို့ လုပ်သွားတာပါ" လို့ ဒေသခံတဦးက မြို့တော်ကို ပြောပြပါတယ်။
ဒါ့အပြင် ခိုလမ်ရဲစခန်းက တပ်ကြပ် ဇော်ဇော်အောင် နဲ့ နယ်ထိန်း စိုးမောင်မောင် တို့ဟာ နယ်ထိန်းသင်တန်း တက်ရောက်ပြီးနောက်ပိုင်း ရပ်ကွက်နဲ့ ကျေးရွာတွေထဲမှာ အာဏာပြ ခြိမ်းခြောက်ငွေညှစ်တာတွေကို ပိုမိုလုပ်ဆောင်လာတယ်လို့ ဆိုပါတယ်။
သူတို့ဟာ မူးယစ်ဆေးဝါး ရောင်းဝယ်သူတွေဆီက လစဉ်လိုင်းကြေး ကောက်ခံနေသလို၊ သုံးစွဲသူတွေဆီက ဖမ်းဆီးသိမ်းဆည်းရမိတဲ့ မူးယစ်ဆေးဝါးတွေကိုလည်း ဥပဒေအရ အရေးမယူဘဲ ရောင်းချသူတွေဆီ တစ်ဖက်လှည့်နဲ့ ပြန်လည်ရောင်းချတာမျိုးတွေအထိ လုပ်ဆောင်နေတယ်လို့ ဒေသခံတွေက ပြောဆိုနေကြပါတယ်။
လက်ရှိမှာတော့ နယ်ထိန်းရဲတပ်ဖွဲ့ဝင်တွေရဲ့ ဥပဒေမဲ့ အနိုင်ကျင့်မှုတွေနဲ့ လာဘ်စားမှုတွေကြောင့် ခိုလမ်ဒေသခံတွေအနေနဲ့ စိုးရိမ်ထိတ်လန့်နေကြရပြီး သက်ဆိုင်ရာ အထက်အဆင့် တာဝန်ရှိသူတွေအနေနဲ့ ထိထိရောက်ရောက် စစ်ဆေးအရေးယူပေးဖို့ကိုလည်း ဒေသခံတွေက လိုလားနေကြပါတယ်။
မြို့တော် News Channel