ဖားအောက်ကျေးရွာ မြေးအဖွားနေအိမ် ဓားပြတိုက်ခံရ၊ ရွှေထည်အကုန်လုယက်

မြေးအဖွား ၂ ယောက်တည်းရှိတဲ့ နေအိမ် အာရုဏ်ဆွမ်းထချက်ချိန် ဓားပြတိုက်ခံရပြီး ဝတ်ဆင်ထားတဲ့ ရွှေထည်ပစ္စည်းတွေ အကုန်ချွတ်ယူသွား

၂၀၂၆ စက်တင်ဘာ ၂၈ Myo Taw

စက်တင်ဘာ ၂‌‌၈

မွန်ပြည်နယ်၊ ဖားအောက်ကျေးရွာ အနောက်ဘက်ခြမ်းက မြေးအဖွား ၂ ယောက်တည်းနေတဲ့ နေအိမ်မှာ ဓားပြတိုက် လုယက်မှု ဖြစ်ပွားခဲ့တယ်လို့ သိရပါတယ်။

စက်တင်ဘာ ၂၇ ရက် မနက် ၃ နာရီခန့်က ဆွမ်းထချက်တဲ့ အသက် ၆၀ ကျော်အရွယ် ဒေါ်စန်းလှရဲ့ နေအိမ်ကို မျက်နှာဖုံးစွပ်ထားတဲ့လူ ၄ ယောက်က ဝင်ရောက် ဓားပြတိုက်ခဲ့တာဖြစ်ပြီး လူကို ရိုက်နှက်ကာ ဝတ်ဆင်ထားတဲ့ ရွှေထည်ပစ္စည်းတွေ အကုန်ချွတ်ယူသွားခဲ့တယ်လို့ သိရပါတယ်။

“မြေးအဖွား ၂ ယောက်တည်း နေတာ။ မနက်အစောကြီး ဆွမ်းထချက်နေတဲ့အချိန် အိမ်နောက်ကနေ မျက်နှာဖုံးစွပ်ထားတဲ့ လူ ၄ ယောက်က ဝင်လာပြီး ဓားပြတိုက်တာ။ ဝတ်ထားတဲ့ လက်စွပ်၊ လက်ကောက်၊ နားကပ်ကအစ အကုန်ချွတ်ပြီး ယူသွားတာ” လို့ ဖားအောက်ကျေးရွာက ဒေသခံတဦးက ပြောပါတယ်။

အခင်းဖြစ်ပွားပြီးနောက် နေ့လယ်ပိုင်းမှာ အာဏာသိမ်းအစိုးရလက်အောက်ခံ ရဲနဲ့ ကျေးရွာအုပ်ချုပ်ရေးအဖွဲ့တွေက ဖားအောက်ကျေးရွာအတွင်းရှိ အဆောင်ငှားနေထိုင်သူတွေနဲ့ သံသယရှိသူတွေကို စစ်ဆေးမေးမြန်းတာတွေ လုပ်ခဲ့ပေမယ့် ထူးခြားမှုတော့ မရှိခဲ့ဘူးလို့ သိရပါတယ်။

မြို့တော် News Channel