မော်လမြိုင်က အနှိပ်ခန်းတွေမှာ မိုးလင်းပေါက် အနှိပ်ခံပါက ဧည့်စာရင်းတိုင်ဖို့ ထွေအုပ်က ညွှန်ကြား

မော်လမြိုင်က အနှိပ်ခန်းတွေမှာ မိုးလင်းပေါက် အနှိပ်ခံပါက ဧည့်စာရင်းတိုင်ဖို့ ထွေအုပ်က ညွှန်ကြား

စက်တင်ဘာ ၁၉

မွန်ပြည်နယ်၊ မော်လမြိုင်မြို့က အနှိပ်ခန်းတွေမှာ မိုးလင်းပေါက်အနှိပ်ခံပါက ဧည့်စာရင်းတိုင်ဖို့ မော်လမြိုင်မြို့နယ် အထွေထွေအုပ်ချုပ်ရေးဦးစီးဌာနက ညွှန်ကြားထားတယ်လို့ သိရပါတယ်။

စက်တင်ဘာလ ၁၉ ရက်နေ့က စတင်ကာ အနှိပ်ခန်းတွေကို သီးသန့်ညွှန်ကြားစာ ထုတ်ခဲ့တာလို့ သိရပြီး မော်လမြိုင်မြို့ကို အလည်အပတ် လာရောက်သူတွေဟာ တည်းခိုခန်းတွေမှာ တည်းခိုပါက ဧည့်စာရင်းတိုင်ရတာကြောင့် ဧည့်စာရင်းမတိုင်ရတဲ့ အနှိပ်ခန်းတွေမှာသာ တည်းခိုပြီး မိုးလင်းပေါက် အနှိပ်ခံကာ အိပ်ကြတာကြောင့် အခုလို စာထုတ်တာလို့ သိရပါတယ်။

"ရွာတွေကနေ မြို့ပေါ်ကိုလာရင် အနှိပ်ခန်းတွေမှာပဲ မိုးလင်းပေါက်အနှိပ်ခံပြီး တည်းကြတော့တာ။ တည်းခိုခန်းတွေမှာတည်းရင် ဧည့်စာရင်းအစစ်ခံရတာကြောင့် မတည်းကြတာ” လို့ အာဏာသိမ်းစစ်တပ် လက်အောက်ခံ ထွေအုပ်ဝန်ထမ်းတဦးက ပြောပါတယ်။

အနှိပ်ခန်းတွေနဲ့ KTV တွေမှာ ည ၁၂ နာရီကျော်ထိ နေသူတွေကို အကုန်ဧည့်စာရင်းတိုင်ရမယ်လို့ ညွှန်ကြားစာထုတ်ထားတာ ဖြစ်ပြီး မော်လမြိုင်မြို့မှာ ည ၁၂ ကနေ မနက် ၄ နာရီထိ ညမထွက်ရအမိန့် ထုတ်ပြန်ထားတာလည်း ရှိတယ်လို့လည်း သိရပါတယ်။

ဒါ့အပြင် မော်လမြိုင်မြို့မှာ သတ်မှတ်အချိန်ကျော်လွန်ကာ သွားလာသူတွေကိုလည်း ဖမ်းဆီးရိုက်နှက်ပြီး ငွေညှစ်တဲ့ ဖြစ်စဥ်တွေလည်း ရှိနေတယ်လို့ သိရပါတယ်။

မြို့တော် News Channel