အင်းတော် - ကောလင်း - ထီးချိုင့်အစပ် ဒိုးပင်တောင်ရိုးမှာ စစ်ရှောင်ပြည်သူ ၃ ဦးကို အာဏာသိမ်းစစ်တပ်က သတ်ပစ်

အင်းတော် - ကောလင်း - ထီးချိုင့်အစပ် ဒိုးပင်တောင်ရိုးမှာ စစ်ရှောင်ပြည်သူ ၃ ဦးကို အာဏာသိမ်းစစ်တပ်က သတ်ပစ်ခဲ့

နိုဝင်ဘာ ၅

စစ်ကိုင်းတိုင်း၊ အင်းတော်မြို့နယ် - ကောလင်းမြို့နယ် - ထီးချိုင့်မြို့နယ်အစပ်မှာ ထီးချိုင့်လမ်းဆုံကနေ စစ်ကြောင်း ထိုးလာတဲ့ အာဏာသိမ်း စစ်တပ်က ဒိုးပင်တောင်ရိုး၊ ရှုခင်းသာအနီးမှာ စစ်ရှောင်ပြည်သူ ၄ ဦးကို ဖမ်းဆီးပြီး ၃ ဦးကို ပစ်သတ်ခဲ့တယ်လို့ Indaw Revolution – IR က သတင်း ထုတ်ပြန်ထားပါတယ်။

နိုဝင်ဘာလ ၃ ရက်က ထီးချိုင့်လမ်းဆုံအနီးရှိ ကျောင်းကုန်းရွာကနေ စစ်ကြောင်းထိုးလာတဲ့ အာဏာသိမ်းစစ်တပ် တပ်ဖွဲ့ဝင်တွေက စစ်ရှောင်လာတဲ့ ကျောင်းကုန်းရွာနေ လင်မယားနှစ်ဦး ဖြစ်တဲ့ ဦးစစ်ကြည် နဲ့ ဒေါ်တင်တင်လှ၊ ထီးချိုင့်မြို့စစ်ရှောင် ကိုကြက်ရိုး နဲ့ အမည်မသိ အမျိုးသား ၁ ဦး တို့ကို ဖမ်းဆီးသွားခဲ့တာလို့ ဆိုပါတယ်။

“ကားနားရောက်တော့ ဒေါ်တင်တင်လှက ကြောက်ကြောက်နဲ့ စကားတွေပြောတော့ စစ်သားက စကားများတယ် ဆိုပြီး ဓားနဲ့ ထိုးလိုက်တာ။ အဲ့ဒါမြင်တော့ သူ့ယောက်ျား ဦးစစ်ကြည်က ထွက်ပြေးတာ” လို့ ဒေသခံတဦးက ပြောပါတယ်။

အာဏာသိမ်းစစ်တပ် တပ်ဖွဲ့ဝင်တွေက ဦးစစ်ကြည် ကို လိုက်လံပစ်ခတ်ခဲ့သလို ကိုကြက်ရိုး နဲ့ အမည်မသိ စစ်ရှောင်အမျိုးသား ၁ ဦးတို့ကိုလည်း သတ်ပစ်ခဲ့တယ်လို့ သိရပါတယ်။

လက်ရှိအချိန်မှာ အဆိုပါ အာဏာသိမ်းစစ်တပ် စစ်ကြောင်းက ကောလင်းမြို့နယ်၊ ကျွန်းတောရွာကို ရောက်ရှိသွားပြီ ဖြစ်တယ်လို့ Inaw Revolution – IR က အသိပေးပါတယ်။

အာဏာသိမ်းပြီးချိန်မှ ၂၀၂၆ ခုနှစ် နိုဝင်ဘာလ ၄ ရက် အထိ အာဏာသိမ်းစစ်တပ်နှင့် ၎င်းရဲ့လက်ပါးစေတွေကြောင့် နွေဦးတော်လှန်ရေးကာလအတွင်း သေဆုံးခဲ့ရတဲ့ ဒီမိုကရေစီရေးလှုပ်ရှားသူတွေနှင့် ပြည်သူစုစုပေါင်း (၈၆၄၇) ဦး ရှိခဲ့ပြီ ဖြစ်တယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP က ထုတ်ပြန်ထားပါတယ်။

မြို့တော် News Channel