အင်တာနက်ဝန်ဆောင်မှု ပျက်ကွက်ပါက အရေးယူမယ်လို့ အင်တာနက် ဖြတ်တောက်ထားတဲ့ အာဏာသိမ်းအစိုးရရဲ့ ဒုဝန်ကြီး ပြောဆို

အင်တာနက်ဝန်ဆောင်မှု ပျက်ကွက်ပါက အရေးယူမယ်လို့ အင်တာနက် ဖြတ်တောက်ထားတဲ့ အာဏာသိမ်းအစိုးရရဲ့ ဒုဝန်ကြီး ပြောဆို

ဇူလိုင် ၂၆

ဆက်သွယ်ရေးဝန်ဆောင်မှု လုပ်ငန်းလိုင်စင်ရရှိထားတဲ့ အင်တာနက်ကုမ္ပဏီတွေအနေနဲ့ ဝန်ဆောင်မှုပျက်ကွက်ပါက သုံးစွဲသူပြည်သူတွေက တိုင်ကြားနိုင်ပြီး ဥပဒေနှင့်အညီ ထိရောက်စွာ အရေးယူဆောင်ရွက်သွားမယ်လို့ ဇူလိုင်လ ၂၄ ရက်နေ့က ကျင်းပခဲ့တဲ့ အာဏာသိမ်းအစိုးရရဲ့ တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေး ၂၉ ရက်မြောက်နေ့မှာ လွှတ်တော်ကိုယ်စားလှယ်တဦးရဲ့ မေးမြန်းမှုကို ဒီဂျစ်တယ် ဖွံ့ဖြိုးတိုးတက်ရေးနှင့် ဆက်သွယ်ရေးဝန်ကြီးဌာန ဒုတိယဝန်ကြီး ဦးသက်ဝင်းအောင်က ထည့်သွင်းပြောကြားခဲ့တာ ဖြစ်ပါတယ်။

သုံးစွဲသူတွေအနေဖြင့် အင်တာနက်လိုင်း ပြတ်တောက်မှုတွေ ကြုံတွေ့ရပါက သက်ဆိုင်ရာ ကုမ္ပဏီသို့ ရှေးဦးစွာအကြောင်းကြားဖို့ လိုအပ်ပြီး ဝန်ဆောင်မှု ပေးနိုင်ခြင်းမရှိဘဲ ပျက်ကွက်ခဲ့ပါက ကုမ္ပဏီများထံမှ လျော်ကြေးငွေ သိုမဟုတ် အစားထိုးဝန်ဆောင်မှုပေးအပ်နိုင်ရေး ညှိနှိင်းတောင်းဆိုသွားရန်နှင့် လိုက်နာဖြည့်ဆည်းမှု မရှိပါက သက်ဆိုင်ရာဌာနတွေကို ဆက်သွယ်တိုင်ကြားနိုင်တယ်လို့ ဖြေကြားခဲ့ပါတယ်။

တိုင်ကြားလိုသူတွေအနေဖြင့် ဆက်သွယ်ရေးညွှန်ကြားမှုဦးစီးဌာန (PTD) ရဲ့ အီးမေးလ်ဖြစ်တဲ့ complaint@ptd.gov.mm သို့ လည်းကောင်း၊ စားသုံးသူရေးရာဦးစီးဌာနရဲ့ Consumer Call Center ဖုန်းနံပါတ် ၁၅၃၅ သို့ လည်းကောင်း တိုက်ရိုက်ဆက်သွယ် တိုင်ကြားနိုင်ပြီး ကုမ္ပဏီတွေအနေနဲ့ လိုက်နာဆောင်ရွက်ခြင်းမရှိကြောင်း ထင်ရှားပါက လိုင်စင်ထုတ်ပေးခြင်းဆိုင်ရာ နည်းဥပဒေပုဒ်မ ၄၁ (က)အရ အရေးယူ ဆောင်ရွက်သွားမယ်လို့ ပြောဆိုခဲ့ပါတယ်။

ဒါ့အပြင် စားသုံးသူရေးရာဦးစီးဌာနသို့ ၂၀၁၇ ခုနှစ်မှ ၂၀၂၆ ခုနှစ် ဇူလိုင်လ ၂၀ ရက်အထိ ဆက်သွယ်ရေး ဝန်ဆောင်မှုနှင့် ပတ်သက်ပြီး တိုင်ကြားစာ စုစုပေါင်း ၂၂၀၀ ခု လက်ခံရရှိခဲ့ရာမှ ၂၁၉၂ ခုကို အောင်မြင်စွာ ဖြေရှင်းဆောင်ရွက်ပေးနိုင်ခဲ့ပြီး ကျန်ရှိတဲ့ ၈ မှုကိုလည်း ဆက်လက်ဖြေရှင်း ဆောင်ရွက်ပေးလျက်ရှိတယ်လို့ ပြောဆိုခဲ့ပါတယ်။

အာဏာသိမ်း စစ်အစိုးရရဲ့ ဒုတိယဝန်ကြီး ဦးသက်ဝင်းအောင်က ခုလိုဖြေကြားထားပေမယ့် အာဏာသိမ်းပြီးချိန်ကတည်းက ပြည်သူတွေဟာ အင်တာနက်သုံးစွဲမှုကို လုံလုံလောက်လောက်မရရှိဘဲ ကန့်သတ်ခံထားရသလို Facebook ကဲ့သို့ ဆိုရှယ်မီဒီယာ သုံးစွဲခွင့်ကိုလည်း ပိတ်ပင်ထားရာ ပြည်သူတွေဟာ VPN အသုံးပြုပြီး ခိုးကြောင်ခိုးဝှက် သုံးစွဲနေကြရပါတယ်။

အာဏာသိမ်း စစ်အစိုးရက ကန့်သတ်ထားတဲ့ Application တွေနဲ့ Game တွေကို သုံးစွဲတာနှင့် ဖုန်းထဲမှာ Install သွင်းထားတာ တွေ့ရှိပါက ဖမ်းဆီးအရေးယူတာတွေရှိခဲ့ပြီး အာဏာသိမ်းစစ်တပ် တပ်ဖွဲ့ဝင်တွေက ခြိမ်းခြောက် ငွေညစ်နေတာတွေလည်း ရှိနေပါတယ်။

အလားတူ တိုင်းနဲ့ ပြည်နယ်တချို့မှာ တော်လှန်ရေးအင်အားစုတွေ အများစု အသုံးပြုကြတဲ့ Signal မက်ဆေ့ချ်အက်ပ်ကိုလည်း တားမြစ်ထားပြီး ဖုန်းထဲမှာ သွင်းထားတာ တွေ့ရှိပါက အာဏာသိမ်း တပ်ဖွဲ့ဝင်တွေက မတရားဖမ်းဆီးတာတွေလည်း လုပ်ဆောင်နေပါတယ်။

မြို့တော် News Channel