အာဏာသိမ်းစစ်တပ်က Grade 12 ကျောင်းသားကို အဆောင်ထဲအထိ ဝင်ရောက်ဖမ်းဆီးပြီး စစ်မှုထမ်းခိုင်း
ဇူလိုင် ၂၆
ဧရာဝတီတိုင်း၊ ပုသိမ်မြို့နယ်မှာ အသက် ၁၇ နှစ်အရွယ် Grade 12 ကျောင်းသား ၁ ဦးကို အာဏာသိမ်းစစ်တပ်က ဇူလိုင် ၂၃ ရက် ညပိုင်းမှာ ဝင်ရောက်ဖမ်းဆီးသွားပြီး စစ်မှုထမ်းခိုင်းဖို့အတွက် အမှတ် (၅၀၅) အမြှောက်တပ်ရင်းကို ပို့ဆောင်လိုက်တယ်လို့ ပုသိမ်မြို့နယ် ပြည်သူ့ကာကွယ်ရေးအဖွဲ့ရဲ့ ထုတ်ပြန်ချက်အရ သိရပါတယ်။
ပုသိမ်မြို့၊ အမှတ် (၁၃) ရပ်ကွက်၊ ငုဝါ (၃) လမ်းမှာ နေထိုင်တဲ့ Grade 12 ကျောင်းသား မောင်စိုင်းအာကာထက်ဟာ စာမေးပွဲ ကျရှုံးတဲ့ကိစ္စနဲ့ ပတ်သက်လို့ အဒေါ်ဖြစ်သူနဲ့ စကားများရာကနေ မြတ်တိုတရားရုံးအနီးမှာရှိတဲ့ ရတနာဆောင်မှာ ခေတ္တသွားရောက်နေထိုင်နေစဉ် အာဏာသိမ်းစစ်တပ်က အဆောင်ထဲအထိ ဝင်ရောက်စစ်ဆေးပြီး ဖမ်းဆီးခေါ်ဆောင်သွားခဲ့တာလို့ ဆိုပါတယ်။
ဖမ်းဆီးပြီးနောက် မောင်စိုင်းအာကာထက်ကို အနောက်တောင်တိုင်းစစ်ဌာနချုပ်(နတခ) မှာ ခေါ်ယူစစ်ဆေးခဲ့ပြီး စစ်မှုထမ်းဆောင်ဖို့အတွက် ကန်ကြီးထောင့်မြို့နယ်မှာရှိတဲ့ အမတ-၅၀၅ ထံကို လွှဲပြောင်းပို့ဆောင်လိုက်တယ်လို့ သိရပါတယ်။
အခုလို စာမေးပွဲကျရှုံးခဲ့တဲ့ ကျောင်းသားငယ်တစ်ဦးကိုပါ အတင်းအဓမ္မ ဝင်ရောက်ဖမ်းဆီးပြီး စစ်မှုထမ်းဖို့ တပ်ရင်းတွေထံ ပို့ဆောင်နေတာကြောင့် အာဏာသိမ်းစစ်တပ်ရဲ့ လက်အောက်မှာ ပညာသင်ကြားနေရတဲ့ ကျောင်းသား၊ ကျောင်းသူတွေရဲ့ ဘဝဟာ လုံခြုံမှုမရှိတော့တဲ့ အနေအထားကို ရောက်ရှိနေပြီး ဒေသခံတွေနဲ့ မိဘတွေအကြား စိုးရိမ်ပူပန်မှုတွေ မြင့်တက်လျက်ရှိနေတယ်လို့လည်း သိရပါတယ်။
မြို့တော် News Channel
ပြည်တွင်းသတင်း
