နမ့်ဆန်မြို့က တောင်တက်လမ်းမှာ ခရီးသည်တင်ကား နောက်ပြန်လိမ့်ကျလို့ အမျိုးသမီး ၁ ဦး သေဆုံး

နမ့်ဆန်မြို့က တောင်တက်လမ်းမှာ ခရီးသည်တင်ကား နောက်ပြန်လိမ့်ကျလို့ အမျိုးသမီး ၁ ဦး သေဆုံး

အောက်တိုဘာ ၃

ရှမ်းပြည်နယ်မြောက်ပိုင်း၊ နမ့်ဆန်မြို့နယ်မှာ ယာဉ်တိမ်းမှောက်မှု ဖြစ်ပွားပြီး အမျိုးသမီး ၁ ဦး သေဆုံးကာ ၃ ဦး ထိခိုက်ဒဏ်ရာ ရရှိခဲ့တယ်လို့ သိရပါတယ်။

အောက်တိုဘာလ ၂ ရက်နေ့ နေ့လယ်ပိုင်း ၁၂ နာရီခန့်က မန္တလေးကနေ နမ့်ဆန်ဘက်ကို တက်လာတဲ့ ခရီးသည်တင်ယာဉ်တစီးဟာ နမ့်ဆန်မြို့၊ ပန်စမိန်းအတက်လမ်းမှာ ကားနောက်ပြန်လိမ့်ကျပြီး ယာဥ်တိမ်းမှောက်မှု ဖြစ်ပွားခဲ့တာလို့ သိရပါတယ်။

“လက်ဖက်ခြောက်စက်ရုံ အတက်နားမှာ ဖြစ်တာ။ ကျောက်ဖြူလမ်းက ပိတ်ထားတော့ ဒီဘက်ကနေသွားတာ။ တောင်အတက်မှာ နောက်ပြန်လိမ့်ကျတာ” လို့ လူမှုကူညီရေးအသင်းဝင်တဦးက ပြောပါတယ်။

တိမ်းမှောက်ခဲ့တဲ့ ခရီးသည်တင်ယာဥ်ပေါ်မှာ ခရီးသည် ၆ ဦး လိုက်ပါလာတယ်လို့ သိရပြီး အမျိုးသား ၁ ဦးနဲ့ အမျိုးသမီး ၃ ဦး ထိခိုက်ဒဏ်ရာရကာ အဲ့ဒီထဲက အမျိုးသမီး ၁ ဦး ဆေးရုံမှာ သေဆုံးခဲ့တယ်လို့ သိရပါတယ်။

“တယောက်က ဆေးရုံမှာ သေတယ်။ တခြားသူတွေလည်း ဒဏ်ရာပြင်းတယ်။ နမ့်ဆန်ကလူတွေချည်းပါပဲ” လို့ ဒေသခံတဦးက ပြောပါတယ်။

သေဆုံးသွားတဲ့ အမျိုးသမီးဟာ အသက် ၅၀ ဝန်းကျင်အရွယ်ဖြစ်ပြီး နမ့်ဆန်မြို့နယ်ကလို့ သိရကာ လတ်တလောမှာ ဒဏ်ရာရသူတွေကို နမ့်ဆန်ပြည်သူ့ဆေးရုံကြီးမှာ ဆေးဝါးကုသမှု ပေးနေတယ်လို့ သိရပါတယ်။

မြို့တော် News Channel