မြေပဲပြုတ်ရောင်းတဲ့ တွန်းလှည်းနဲ့ လူတွေကို Taxi တစီးက ဝင်တိုက်ပြီး ထွက်ပြေးသွား

ရန်ကုန်မြို့၊ သာကေတမြို့နယ်မှာ မြေပဲပြုတ်ရောင်းနေတဲ့ တွန်းလှည်းကို Taxi တစီးက ဝင်တိုက်ပြီး ထွက်ပြေးသွားလို့ မြေပဲပြုတ်ရောင်းသူနဲ့ အနီးအနားက လူတွေ ထိခိုက်ဒဏ်ရာ ပြင်းထန်ရရှိခဲ့တယ်လို့ သိရပါတယ်။

ဩဂုတ်လ ၂၂ ရက်နေ့ မနေ့ညက သာကေတမြို့နယ်၊ ဧရာဝဏ်လမ်းနဲ့ မြင်တော်သာလမ်း မီးပွိုင့်ထောင့် လျှံဖြိုးစားသောက်ဆိုင်ရှေ့မှာ လမ်းဘေးမှာ ရပ်တန့်ထားတဲ့ မြေပဲပြုတ်ရောင်းတဲ့လှည်းနဲ့ Taxi Probox ယာဉ်တို့ကို Taxi ကားတစီးက အရှိန်ပြင်းပြင်းနဲ့ ဝင်တိုက်သွားခဲ့တယ်လို့ သိရပါတယ်။

"Taxi သမားက မူးနေပုံရတယ်၊ လှည်းကလမ်းနဲ့အလွတ်ကြီးကို ဝင်တိုက်သွားတာ၊ ပြီးတော့ ကားကိုမရပ်ဘဲ ဆက်မောင်းသွားတာ၊ ထိတဲ့သူတွေက မြေပဲပြုတ်ရောင်းတဲ့ တွန်းလှည့်သမားနဲ့ ဘေးကလူတွေ ထိတယ်" လို့ ဒေသခံတဦးက ပြောပါတယ်။

ယာဥ်တိုက်မှုကြောင့် လမ်းဘေးတွန်းလှည်းရပ်ကာ ဈေးရောင်းချနေသူတွေနဲ့ အနီးအနားက အမျိုးသား ၂ ဦးမှာ ပြင်းထန်ထိခိုက်ဒဏ်ရာတွေ ရရှိခဲ့ပြီး တကိုယ်လုံး ရေနွေးပူ‌လောင် ဒဏ်ရာ၊ ဘယ်ဘက်မျက်နှာ ကွဲအက်ဒဏ်ရာ၊ ဘယ်ဘက်ခြေထောက် ထိခိုက်ဒဏ်ရာတို့ ရရှိခဲ့ကြတယ်လို့ သိရပါတယ်။

ဝင်တိုက်ခဲ့တဲ့ Taxi ယာဥ်ဟာ တိုက်ပြီး ထွက်ပြေးသွားခဲ့တယ်လို့ သိရကာ Taxi-AA/1983 ယာဉ် ဖြစ်တယ်လို့ သိရပါတယ်။