မိသားစု ၃ ဦး စီးနင်းလာတဲ့ဆိုင်ကယ်ကို Express ယာဉ်က အနောက်ကနေဝင်တိုက်လို့ အမျိုးသမီးဖြစ်သူ သေဆုံး

မိသားစု ၃ ဦး စီးနင်းလာတဲ့ဆိုင်ကယ်ကို Express ယာဉ်က အနောက်ကနေဝင်တိုက်လို့ အမျိုးသမီးဖြစ်သူ သေဆုံး

အောက်တိုဘာ ၂၉

မွန်ပြည်နယ်၊ သထုံမြို့၊ မိုးကောင်းကျေးရွာ၊ ဖရဲသီးဆိုင်တန်းရှေ့က ရန်ကုန်-မော်လမြိုင်သွား ကားလမ်းမပေါ်မှာ ခရီးသည်တင် Express နဲ့ ဆိုင်ကယ်တို့တိုက်မိပြီး အမျိုးသမီးတဦး သေဆုံးခဲ့တယ်လို့ သိရပါတယ်။

အောက်တိုဘာလ ၂၈ ရက်နေ့ နေ့လယ် ၁ နာရီခန့်က ရန်ကုန်-မော်လမြိုင်သွား ကားလမ်းမပေါ် မိုးကောင်းကျေးရွာအနီးမှာ မိသားစု ၃ ဦး စီးနင်းလာတဲ့ဆိုင်ကယ်ကို ခရီးသည်တင် Express ယာဉ်က ဝင်တိုက်ခဲ့တာလို့ သိရပါတယ်။

"ဒီနားဖြစ်တာ ၂ ရက်ဆက်တိုက်ရှိပြီ၊ အရင်ရက်ကလည်း ကားနဲ့ဆိုင်ကယ်တိုက်တာ တစ်ယောက်သေတယ်၊ ခုလည်း အမျိုးသမီးသေတယ်၊ ကားကအရှိန်များပြီး အနောက်ကနေဝင်တိုက်တာ၊ ဒီနားကလမ်းကျဉ်းတယ်၊ ကားတွေက အရှိန်အတော်ပြင်းပြင်းနဲ့မောင်းတာ၊ ဖြစ်တော့မထိန်းနိုင်ကြဘူး" လို့ ဒေသခံအမျိုးသမီးတဦးက ပြောပါတယ်။

ယာဉ်တိုက်မှုကြောင့် တံတားဦးကျေးရွာမြောက်ပိုင်းမှာနေတဲ့ အသက် ၄၄ နှစ်အရွယ် ကိုစိုးမိုးသူ လက်မောင်း၊ ဒူးဆစ်နဲ့မျက်နှာတွေ ထိခိုက်ဒဏ်ရာ (စိုးရိမ်ရ)ရရှိခဲ့ပြီး၊ ဆိုင်ကယ်အလယ်ကစီးနင်းတဲ့ သမီးဖြစ်သူ အသက် ၅ နှစ် အရွယ် မနန်းအိမ်သူချစ်စံ ဒဏ်ရာအနည်းငယ်ရရှိခဲ့ကာ မိခင်ဖြစ်သူ ဒေါ်မေယုစံ မှာ နဖူးပွင့် ဦးခေါင်းပြားချပ်ကာ နေရာမှာပဲသေဆုံးခဲ့တယ်လို့ သိရပါတယ်။

ဒဏ်ရာရသူတွေနဲ့ သေဆုံးသူကို အရေးပေါ်လူနာတင်ယာဉ်နဲ့ သိမ်ဆိပ်ဆေးရုံကို ပို့ဆောင်ပေးခဲ့ပြီး အဲဒီ ဆေးရုံကတစ်ဆင့် ဖခင်ဖြစ်သူကို သထုံပြည်သူ့ဆေးရုံကြီးကို ထပ်မံလွှဲပြောင်းခဲ့ရတယ်လို့ သိရပါတယ်။

မြို့တော် News Channel