နယူးယောက်မှာ ဝက်သက်ရောဂါကူးစက်မှု စံချိန်တင် မြင့်တက်လာတာကြောင့် အရေးပေါ်အခြေအနေ ထုတ်ပြန်

နယူးယောက်မှာ ဝက်သက်ရောဂါကူးစက်မှု စံချိန်တင် မြင့်တက်လာတာကြောင့် အရေးပေါ်အခြေအနေ ထုတ်ပြန်

အောက်တိုဘာ ၆

အမေရိကန်နိုင်ငံ နယူးယောက်ပြည်နယ်မှာ ဝက်သက်ရောဂါ ကူးစက်မှုတွေ စံချိန်တင် မြင့်တက်လာတာကြောင့် ပြည်နယ်အုပ်ချုပ်ရေးမှူး ကေသီ ဟိုချူးလ်က အောက်တိုဘာ ၅ ရက်နေ့က စတင်ကာ တပြည်နယ်လုံး အရေးပေါ်အခြေအနေ ကြေညာလိုက်ပါတယ်။

ဒါဟာ ၂၀၂၅ ခုနှစ်အတွင်း နိုင်ငံတဝန်း ဝက်သက်ရောဂါ ကူးစက်မှုတွေ ပြန်လည်မြင့်တက်လာပြီးနောက်ပိုင်း အမေရိကန်ပြည်နယ်တခုကနေ အခုလို သဘာဝဘေးအရေးပေါ်အခြေအနေ ပထမဆုံး ထုတ်ပြန်ရတာလည်း ဖြစ်ပါတယ်။

နယူးယောက်ပြည်နယ်မှာ အောက်တိုဘာ ၃ ရက်အထိ ဒီနှစ်အတွင်း ဝက်သက်ကူးစက်သူ ၁၀၈ ဦး ရှိလာပြီး အဲဒီထဲက ၉၂ ဦးဟာ ဇူလိုင် ၁၅ ရက်နောက်ပိုင်း ကာကွယ်ဆေးထိုးနှံမှု အားနည်းတဲ့ ကျေးလက်ဒေသ ၁၈ ခရိုင်မှာ တွေ့ရှိခဲ့တာ ဖြစ်ပါတယ်။ ကူးစက်သူတွေထဲမှာ နယူးယောက်မြို့က ၇ ဦး၊ ပြည်နယ်အတွင်း အခြားဒေသတွေက ၁၀၁ ဦး ပါဝင်ပါတယ်။

ရောဂါကူးစက်မှုကို အမြန်ဆုံး ထိန်းချုပ်နိုင်ဖို့အတွက် ထုတ်ပြန်လိုက်တဲ့ အရေးပေါ်အမိန့်အရ မှတ်ပုံတင် သူနာပြုတွေကို ရောဂါသံသယရှိသူတွေအပေါ် ဓာတ်ခွဲစစ်ဆေးဖို့ ညွှန်ကြားခွင့် ပေးထားသလို ဆေးဝါးကျွမ်းကျင်သူတွေအနေနဲ့လည်း အသက် ၂ နှစ်အရွယ် ကလေးတွေအထိ ဝက်သက်၊ ပါးချိတ်ရောင်နဲ့ ဂျိုက်သိုး သုံးမျိုးစပ် ကာကွယ်ဆေး (MMR Vaccine) ထိုးနှံပေးခွင့် အာဏာ တိုးမြှင့်ပေးထားပါတယ်။

နယူးယောက်နဲ့ နယ်နိမိတ်ချင်းထိစပ်နေတဲ့ ပင်ဆယ်ဗေးနီးယားပြည်နယ်မှာတော့ ဝက်သက်ကူးစက်ခံရသူ ၁,၀၀၀ ကျော်သွားပြီဖြစ်ပြီး ဆယ်စုနှစ် ၃ ခုကျော်အတွင်း အဆိုပါပြည်နယ်မှာ စံချိန်တင် ကူးစက်မှုလည်း ဖြစ်လာပါတယ်။ အောက်တိုဘာ ၂ ရက်အထိ ကူးစက်သူ ၉၇၇ ဦးနဲ့ သေဆုံးသူ ၅ ဦးအထိ ရှိလာခဲ့ပြီ ဖြစ်ပါတယ်။

အမေရိကန်နိုင်ငံတဝန်းလုံးမှာလည်း ဒီနှစ်ဟာ ၁၉၉၁ ခုနှစ်နောက်ပိုင်း ဝက်သက်ကူးစက်မှု အများဆုံးနှစ်ဖြစ်လာနေပြီး ကူးစက်သူ ၃,၉၀၀ နီးပါး ရှိလာပြီလို့ အမေရိကန် ရောဂါထိန်းချုပ်ရေးနဲ့ ကာကွယ်ရေးဗဟိုဌာန (CDC) က ထုတ်ပြန်ထားပါတယ်။

နယူးယောက်ရဲ့ အရေးပေါ်အမိန့်ဟာ အောက်တိုဘာ ၅ ရက်နေ့မှာ စတင်အသက်ဝင်ခဲ့ပြီး နိုဝင်ဘာ ၄ ရက်အထိ တလကြာ အကျုံးဝင် သက်ရောက်မှာ ဖြစ်ပါတယ်။

Ref & Photo: Reuters

မြို့တော် News Channel