ထရမ့်က ဆော်ဒီအာရေဗျအတွက် ယူရေနီယမ်သန့်စင်ခွင့် ရနိုင်မယ့် နျူကလီးယားသဘောတူညီချက်ကို အတည်ပြု
ဇူလိုင် ၂၂
အမေရိကန်သမ္မတ ဒေါ်နယ်ထရမ့်က ဆော်ဒီအာရေဗျရဲ့ အရပ်ဘက် နျူကလီးယား စီမံကိန်းမှာ ယူရေနီယမ် သန့်စင်စွမ်းရည် ရရှိလာစေနိုင်မယ့် နှစ် ၃၀ သက်တမ်းရှိ သဘောတူညီချက်တစ်ခုကို အတည်ပြုပေးလိုက်ပြီဖြစ်ကြောင်း သတင်းရင်းမြစ် ၂ ခုကို ကိုးကားပြီး အေပီသတင်းဌာန (AP) က ဖော်ပြလိုက်ပါတယ်။
ဒီသဘောတူညီချက်အရ အမေရိကန် ကုမ္ပဏီတွေက ဆော်ဒီရဲ့ နျူကလီးယား စီမံကိန်း တည်ဆောက်ရေးမှာ ပါဝင်သွားမှာဖြစ်ပြီး ပူးတွဲလေ့လာမှု ပြုလုပ်ပြီးနောက် ဆော်ဒီမှာ ယူရေနီယမ် သန့်စင်စက်ရုံ တည်ဆောက်ခွင့်လည်း ပါဝင်လာနိုင်တယ်လို့ ဆိုပါတယ်။
ဒါပေမဲ့ သဘောတူညီချက်ကို အမေရိကန်လွှတ်တော်က ပြန်လည်စိစစ်သုံးသပ်ရမှာဖြစ်ပြီး ဆော်ဒီကို ယူရေနီယမ်သန့်စင်ခွင့်ပေးတာဟာ နျူကလီးယားလက်နက်ပြန့်ပွားမှုနဲ့ ဒေသတွင်း နျူကလီးယားပြိုင်ဆိုင်မှုတွေ ဖြစ်လာနိုင်တယ်လို့ စိုးရိမ်နေတဲ့ လွှတ်တော်အမတ်တွေရဲ့ ကန့်ကွက်မှုနဲ့ ရင်ဆိုင်ရနိုင်ဖွယ် ရှိနေပါတယ်။
ဒါ့အပြင် ဆော်ဒီဟာ အပြည်ပြည်ဆိုင်ရာ အဏုမြူစွမ်းအင်အေဂျင်စီ (IAEA) ရဲ့ အဖွဲ့ဝင်နိုင်ငံဖြစ်ပေမယ့် အခုသဘောတူညီချက်မှာ ပိုမိုတင်းကျပ်တဲ့ စောင့်ကြည့်စစ်ဆေးမှုတွေ ပြုလုပ်နိုင်မယ့် IAEA ရဲ့ ထပ်ဆောင်းနောက်ဆက်တွဲပရိုတိုကော (Additional Protocol) ပါဝင်လာဖို့ မရှိဘူးလို့ ဆိုပါတယ်။
နျူကလီးယားလက်နက်ပြန့်ပွားမှု တားဆီးရေး ကျွမ်းကျင်သူတွေကတော့ ဆော်ဒီမှာ ယူရေနီယမ်သန့်စင်စက်ရုံတွေ လည်ပတ်လာရင် နျူကလီးယားလက်နက်ထုတ်လုပ်ရေးဆီ လမ်းဖွင့်ပေးသလို ဖြစ်သွားနိုင်တယ်လို့ သတိပေးထားပါတယ်။
ဆော်ဒီအိမ်ရှေ့မင်းသား မိုဟာမက် ဘင် ဆာလမန်ကလည်း အီရန်သာ အဏုမြူဗုံး ရရှိသွားရင် မိမိတို့လည်း ရယူသွားမယ်လို့ အရိပ်အမြွက် ပြောဆိုထားဖူးပါတယ်။
လက်ရှိမှာ ဆော်ဒီဟာ နျူကလီးယားပိုင်လက်နက် ပိုင်ဆိုင်တဲ့ ပါကစ္စတန်နဲ့ ပူးတွဲကာကွယ်ရေး စာချုပ် ရေးထိုးထားပြီး ပါကစ္စတန်ကာကွယ်ရေးဝန်ကြီးကလည်း လိုအပ်ရင် ပါကစ္စတန်ရဲ့ နျူကလီးယားအစီအစဉ်ကို ဆော်ဒီအတွက် အသုံးပြုခွင့်ပေးမယ်လို့ ပြောဆိုထားပါတယ်။
Ref & Photo; AP
မြို့တော် News Channel
နိုင်ငံတကာသတင်း
