မင်းအောင်လှိုင်ရဲ့ ခရီးစဉ်နဲ့ပတ်သက်ပြီး ထိုင်းအစိုးရရဲ့ပုံရိပ် ထိခိုက်လာမှာကို စိုးရိမ်ပူပန်ခြင်း မရှိဘူးလို့ ထိုင်းအစိုးရ ပြောရေးဆိုခွင့်ရှိသူ ပြောဆို

မင်းအောင်လှိုင်ရဲ့ ခရီးစဉ်နဲ့ပတ်သက်ပြီး ထိုင်းအစိုးရရဲ့ပုံရိပ် ထိခိုက်လာမှာကို စိုးရိမ်ပူပန်ခြင်း မရှိဘူးလို့ ထိုင်းအစိုးရ ပြောရေးဆိုခွင့်ရှိသူ ပြောဆို

ဇူလိုင် ၂၂

အာဏာသိမ်းစစ်ခေါင်းဆောင် မင်းအောင်လှိုင်ရဲ့ ထိုင်းနိုင်ငံ ခရီးစဉ်နဲ့ပတ်သက်ပြီး ထိုင်းအစိုးရရဲ့ပုံရိပ် ထိခိုက်လာမှာကို စိုးရိမ်ပူပန်ခြင်း မရှိဘူးလို့ ထိုင်းအစိုးရ ပြောရေးဆိုခွင့်ရှိသူ မစ္စ ရာချာဒါ သနာဒီရက်ခ်က ဒီကနေ့ ဇူလိုင်လ ၂၂ ရက်နေ့မှာ ပြောဆိုလိုက်ပါတယ်။

မြန်မာနိုင်ငံ ငြိမ်းချမ်းမှသာ ထိုင်းနယ်စပ်မှာ နေထိုင်သူတွေလည်း အေးချမ်းမှာဖြစ်လို့ မြန်မာနိုင်ငံရဲ့ အခြေအနေတွေဟာ ထိုင်းနိုင်ငံနဲ့ တိုက်ရိုက်သက်ဆိုင်နေတာကြောင့် ထိရောက်တဲ့ နိုင်ငံတကာ ပူးပေါင်းဆောင်ရွက်မှုတွေနဲ့ ပြဿနာတွေကို ဖြေရှင်းဖို့ ထိုင်းဝန်ကြီးချုပ်က အာဏာသိမ်း စစ်ခေါင်းဆောင် မင်းအောင်လှိုင်ကို လာရောက်ဖို့ ဖိတ်ခေါ်ခဲ့တာ ဖြစ်တယ်လို့လည်း မစ္စ ရာချာဒါ က ဆိုပါတယ်။

ဒါ့အပြင် အာဆီယံ နိုင်ငံခြားရေးဝန်ကြီးတွေရဲ့ သီးသန့်ဆွေးနွေးပွဲတွေကနေတဆင့် မြန်မာနိုင်ငံကို အာဆီယံ အသိုင်းအဝိုင်းထဲ ပြန်လည်ဝင်ရောက်နိုင်ရေးအတွက် အခွင့်အလမ်းတွေ ဖွင့်ပေးခဲ့တာဟာ ထိုင်းအစိုးရရဲ့ စိတ်ရင်းစေတနာကို ပိုမိုထင်ဟပ်စေတယ်လို့လည်း သူမက ဆိုပါတယ်။

အာဏာသိမ်းစစ်ခေါင်းဆောင် မင်းအောင်လှိုင်ရဲ့ အပျက်သဘောဆောင်တဲ့ ပုံရိပ်နဲ့ပတ်သက်ပြီး ထိုင်းအစိုးရအပေါ် အကျိုးသက်ရောက်မှု ရှိလာမှာကို စိုးရိမ်မှု ရှိမရှိ မေးမြန်းရာမှာတော့ မစ္စ ရာချာဒါ က စိုးရိမ်မှု မရှိဘူးလို့ ပြောဆိုခဲ့ပြီး အိမ်နီးချင်း မဟုတ်တဲ့ ပြင်ပကလူတွေအနေနဲ့ အိမ်နီးချင်းနိုင်ငံတွေအဖြစ် အတူယှဉ်တွဲ နေထိုင်ကြရတာကို နားလည်ချင်မှ နားလည်မှာ ဖြစ်ကြောင်း၊ မြန်မာနိုင်ငံမှာ ငြိမ်းချမ်းရေးနဲ့ ကောင်းမွန်တဲ့အရာတွေ ဖြစ်ပေါ်လာရင် ထိုင်းပြည်သူတွေနဲ့ ထိုင်းနိုင်ငံပါ အကျိုးကျေးဇူးရရှိမှာဖြစ်လို့ အဟန့်အတားမလုပ်ဘဲ အချင်းချင်း ကူညီကြရမှာ ဖြစ်ကြောင်း ပြောဆိုခဲ့ပါတယ်။

ထိုင်းဝန်ကြီးချုပ်ဟာ မင်းအောင်လှိုင်နဲ့ တွေ့ဆုံပြီး မြန်မာနိုင်ငံ ငြိမ်းချမ်းရေး၊ မူးယစ်ဆေးဝါး ကုန်ကူးမှု၊ အွန်လိုင်း ငွေလိမ်ဂိုဏ်းနှိမ်နင်းရေးနဲ့ သဘာဝပတ်ဝန်းကျင်ဆိုင်ရာ ပြဿနာတွေဖြစ်တဲ့ မီးရှို့မှု၊ မြစ်ချောင်းတွေအတွင်း အဆိပ်သင့်မှုတွေကို အဓိကထား ဆွေးနွေးသွားဖို့ ရှိနေပါတယ်။

အာဏာသိမ်း စစ်ခေါင်းဆောင် မင်းအောင်လှိုင်နဲ့ ထိုင်းဝန်ကြီးချုပ် အနုတင် ချာန်ဗီရကူးလ် တို့ဟာ လာမယ့် ဩဂုတ်လ ၆ ရက်နှင့် ၇ ရက်နေ့တွေမှာ ထိုင်းနိုင်ငံ၊ ဘန်ကောက်မြို့မှာ တွေ့ဆုံ‌သွားဖို့ ရှိနေတာလည်း ဖြစ်ပါတယ်။

Ref & Photo; Khaosod

မြို့တော် News Channel