AI နည်းပညာအခြေပြု အော်တိုစနစ် စစ်လက်နက်တွေ ထိန်းချုပ်နိုင်ရေး စည်းမျဉ်းတွေ သတ်မှတ်ဖို့ UN နဲ့ ICRC အရေးပေါ်တောင်းဆို

လူသားတွေရဲ့ တိုက်ရိုက်ထိန်းချုပ်မှုမရှိဘဲ လူသားတွေကို အလိုအလျောက် ပစ်မှတ်ထားတိုက်ခိုက်နိုင်တဲ့ လက်နက်စနစ်တွေ စစ်ပွဲတွေမှာ အသုံးပြုလာနိုင်တဲ့ အန္တရာယ်ရှိနေတာကြောင့် အဲဒီလက်နက်တွေ အသုံးပြုမှုကို ထိန်းချုပ်နိုင်ရေး အရေးပေါ်ဆွေးနွေးမှုတွေ စတင်ဖို့ အပြည်ပြည်ဆိုင်ရာ ကြက်ခြေနီကော်မတီ (ICRC) နဲ့ ကုလသမဂ္ဂ (UN) တို့က ဒီကနေ့ ဩဂုတ် ၂၅ ရက်နေ့မှာ တောင်းဆိုလိုက်ပါတယ်။

ကုလသမဂ္ဂအတွင်းရေးမှူးချုပ် အန်တိုနီယို ဂူတာရက်စ်နဲ့ ICRC ဥက္ကဋ္ဌ မီရ်ဂျာနာ စပိုလျာရစ်တို့က လူသားတွေကို စက်တွေနဲ့ အလိုအလျောက် ပစ်မှတ်ထားတိုက်ခိုက်တာဟာ ကျင့်ဝတ်ပိုင်းဆိုင်ရာ အနီရောင်မျဉ်းကို ကျော်လွန်ဖို့ အန္တရာယ်ရှိတဲ့ အခြေအနေထိ ရောက်လာနေပြီလို့ ပူးတွဲကြေညာချက်မှာ ပြောဆိုထားပါတယ်။

ဒါကြောင့် အော်တိုစနစ် စစ်လက်နက်တွေကို ထိန်းချုပ်နိုင်ရေး ရှင်းလင်းတဲ့ တားမြစ်ချက်တွေနဲ့ ကန့်သတ်ချက်တွေ ပါဝင်ပြီး ဥပဒေအရ စည်းနှောင်မှုရှိတဲ့ သဘောတူညီချက်တစ်ရပ် အမြန်ဆုံးချမှတ်နိုင်ဖို့ ဆွေးနွေးမှုတွေ အခုကတည်းက စတင်ဖို့လည်း တိုက်တွန်းထားပါတယ်။

လက်ရှိ ယူကရိန်း၊ ဆူဒန်၊ ဂါဇာ၊ အီရန်နဲ့ ပင်လယ်ကွေ့ဒေသက ပဋိပက္ခတွေမှာ AI နည်းပညာအခြေပြု ဆီမီးအော်တိုစနစ် စစ်လက်နက်တွေ အသုံးပြုလာတာကြောင့် ဒီကိစ္စအပေါ် စိုးရိမ်မှုတွေ ပိုမိုမြင့်တက်လာပါတယ်။

လူ့အခွင့်အရေး အဖွဲ့အစည်းတွေကလည်း AI နည်းပညာအခြေပြု လက်နက်စနစ်တွေဟာ တိတိကျကျ ခန့်မှန်းတာ သို့မဟုတ် ထိန်းချုပ်တာ မလုပ်နိုင်တဲ့အတွက် ဒဏ်ရာရနေသူတွေနဲ့ လက်နက်ချသူတွေကို မခွဲခြားနိုင်ဘဲ မှားယွင်းသတ်ဖြတ်မိတာမျိုးလို အမှားအယွင်းကြီးတွေ ဖြစ်လာမှာကို စိုးရိမ်နေကြပါတယ်။

ဒါ့အပြင် အဲဒီလို အမှားအယွင်းတွေ ဖြစ်ပွားခဲ့ရင်လည်း အနာဂတ် စစ်ရာဇဝတ်မှု ခုံရုံးတွေမှာ တာဝန်ရှိသူတွေကို ဖော်ထုတ်အရေးယူဖို့ ပိုမို ခက်ခဲသွားနိုင်တယ်လို့လည်း ထောက်ပြထားပါတယ်။

ကမ္ဘာ့နိုင်ငံတွေအနေနဲ့ စိစစ်ပြီး အဆင့်ဆင့် ဆွေးနွေးနေတာထက် နိုင်ငံရေးအရ သတ္တိရှိရှိ ပိုပြီးထိရောက်တဲ့ ဆုံးဖြတ်ချက်တွေ ချမှတ်ဖို့ ပူးတွဲထုတ်ပြန်ချက်မှာ တိုက်တွန်းထားပြီး အဆိုပါဆွေးနွေးပွဲတွေကို လာမယ့် နိုဝင်ဘာလ ဂျနီဗာမြို့မှာ ကျင်းပမယ့် ညီလာခံမှာ စတင်ကြဖို့ UN နဲ့ ICRC နဲ့ တောင်းဆိုထားပါတယ်။

Ref & Photo; Reuters