ရာသီဥတု ဆိုးရွားမှုကြောင့် နီပေါရေဘေးကယ်ဆယ်ရေး ယာယီရပ်ဆိုင်း၊ ဘေးအန္တရာယ် ကိုင်တွယ်ဖြေရှင်းဖို့ နိုင်ငံခြားနည်းပညာအကူအညီ လိုအပ်နေ

နီပေါနိုင်ငံမှာ ဩဂုတ်လ ၂၆ ရက်က ဖြစ်ပွားခဲ့တဲ့ ရေကြီးရေလျှံမှုကြောင့် အကြီးအကျယ် ပျက်စီးဆုံးရှုံးခဲ့ပြီး ရာသီဥတုဆိုးရွားမှုကြောင့် ရှာဖွေကယ်ဆယ်ရေးလုပ်ငန်းတွေကို ဩဂုတ်လ ၂၉ ရက်မှာ ယာယီရပ်ဆိုင်းထားရတယ်လို့ သိရပါတယ်။

အဆိုပါ ဘေးအန္တရာယ်ကို ထိရောက်စွာ ကိုင်တွယ်ဖြေရှင်းနိုင်ဖို့ နိုင်ငံခြားက နည်းပညာပိုင်းဆိုင်ရာ အကူအညီတွေ လိုအပ်နေတယ်လို့လည်း နီပေါအစိုးရဘက်က ပြောပါတယ်။

လူဦးရေ သန်း ၃၀ ခန့်ရှိတဲ့ ဟိမဝန္တာတောင်တန်းနိုင်ငံ နီပေါမှာ ဩဂုတ်လ ၂၆ ရက်က ဖြစ်ပွားခဲ့တဲ့ ရေဘေးကြောင့် ပျက်စီးဆုံးရှုံးမှုတွေကို ပြန်လည်ထူထောင်ဖို့ အမေရိကန်ဒေါ်လာ ၄ ဘီလီယံကနေ ၅ ဘီလီယံအထိ လိုအပ်နိုင်တယ်လို့ နီပေါဘဏ္ဍာရေးဝန်ကြီးက ရိုက်တာသတင်းဌာနကို ပြောထားပါတယ်။

အဆိုပါရေဘေးဟာ ရေခဲမြစ်ပြိုကျမှုကြောင့် စတင်ဖြစ်ပွားခဲ့တာဖြစ်ပြီး ကျောက်တုံး၊ ရေခဲ၊ ရွှံ့နွံနဲ့ အပျက်အစီးတွေ ပါဝင်တဲ့ တောင်ကျရေစီးကြောင်းဟာ တောင်တန်းဒေသက မြစ်ကြောင်းတွေအတိုင်း တဟုန်ထိုး စီးဆင်းခဲ့တာပါ။

အဲဒီတောင်ကျရေစီးကြောင်းကြောင့် လမ်းကြောင်းတစ်လျှောက်မှာရှိတဲ့ အဆောက်အအုံတွေ၊ တံတားတွေနဲ့ လျှပ်စစ်ဓာတ်အားပေးစက်ရုံတွေ ပျက်စီးခဲ့သလို နီပေါနိုင်ငံမှာ အနည်းဆုံး ၆၂၆ ဦးနဲ့ တရုတ်နိုင်ငံ တိဘက်ဒေသမှာ ၇ ဦး သေဆုံးခဲ့ပါတယ်။

လက်ရှိအချိန်အထိ နီပေါနိုင်ငံမှာ ၂,၄၂၆ ဦးနဲ့ တိဘက်ဒေသ ဂျီရောင်ခရိုင်မှာ အနည်းဆုံး ၅၅၄ ဦးအပါအဝင် စုစုပေါင်း လူ ၃,၀၀၀ နီးပါး ပျောက်ဆုံးနေဆဲဖြစ်ပါတယ်။ ပျောက်ဆုံးသူတွေထဲမှာ နိုင်ငံခြားသား အနည်းဆုံး ၅၄၀ ဦး ပါဝင်ပြီး အများစုဟာ အိန္ဒိယနိုင်ငံက ဟိန္ဒူဘာသာဝင် ဘုရားဖူးတွေ ဖြစ်တယ်လို့ သိရပါတယ်။

Ref & Photo; Reuters