ဂရင်းလန်းကျွန်းမှာ အမေရိကန်စစ်အင်အား တိုးချဲ့ချထားဖို့ သဘောတူညီချက်ရရှိ

ဂရင်းလန်းကျွန်းမှာ အမေရိကန်စစ်အင်အား တိုးချဲ့ချထားဖို့ သဘောတူညီချက်ရရှိ

စက်တင်ဘာ ၁၉

ဂရင်းလန်းကျွန်းပေါ်မှာ အမေရိကန်ဘက်က စစ်အင်အား သိသိသာသာ တိုးချဲ့ချထားဖို့နဲ့ ပြိုင်ဘက်နိုင်ငံတွေကို အခြေစိုက်စခန်း တည်ဆောက်ခွင့် မပြုဖို့အတွက် အမေရိကန်၊ ဒိန်းမတ်နဲ့ ဂရင်းလန်းတို့အကြား သဘောတူညီချက် ရရှိခဲ့ပြီလို့ သမ္မတ ဒေါ်နယ်ထရမ့်က စက်တင်ဘာ ၁၈ ရက်နေ့မှာ ထုတ်ဖော်ပြောဆိုလိုက်ပါတယ်။

ဒီသဘောတူညီချက်အရ ဒိန်းမတ်နိုင်ငံရဲ့ ကိုယ်ပိုင်အုပ်ချုပ်ခွင့်ရဒေသဖြစ်တဲ့ ဂရင်းလန်းကျွန်းပေါ်မှာ အမေရိကန်ဘက်က စစ်ရေးလှုပ်ရှားမှုတွေ ပိုမိုလုပ်ဆောင်ခွင့် ရရှိလာမှာဖြစ်သလို အမေရိကန်ရဲ့ ပြိုင်ဘက်နိုင်ငံတွေကလည်း ခွင့်ပြုချက်မရှိဘဲ အရေးပါတဲ့ ရင်းနှီးမြှုပ်နှံမှုတွေ လုပ်ကိုင်ခွင့် ရှိတော့မှာမဟုတ်ဘူးလို့ ဆိုပါတယ်။

သမ္မတ ထရမ့်ကတော့ ဒါဟာ အမေရိကန်အတွက် အိပ်မက်တခု လက်တွေ့ဖြစ်လာတာဖြစ်ပြီး၊ သဘောတူညီချက်ဟာ သက်တမ်းကုန်ဆုံးမယ့်ရက် မရှိတဲ့အတွက် အမေရိကန်နဲ့ ဂရင်းလန်းရဲ့ လုံခြုံရေးဆိုင်ရာ လိုအပ်ချက်တွေကို အမေရိကန်ဘက်က ထာဝရ ဆောင်ရွက်ခွင့် ရရှိသွားပြီလို့ သူ့ရဲ့ လူမှုကွန်ရက်ဖြစ်တဲ့ Truth Social မှာ ရေးသားဖော်ပြခဲ့ပါတယ်။

ဒီသဘောတူညီချက်နဲ့ ပတ်သက်ပြီး ဒိန်းမတ်ဝန်ကြီးချုပ်ရုံးနဲ့ ဂရင်းလန်းဝန်ကြီးချုပ် ဂျန်စ် ဖရက်ဒရစ် နီလ်ဆင်တို့ကလည်း ဒါဟာ မြောက်အတ္တလန္တိတ်နဲ့ အာတိတ်ဒေသ လုံခြုံရေးကို ပိုမိုခိုင်မာစေသလို အားလုံးအတွက် အကျိုးရှိစေတဲ့ ဆုံးဖြတ်ချက်ဖြစ်တယ်လို့ မှတ်ချက်ပြုထားပါတယ်။

အလားတူ အမေရိကန် နိုင်ငံခြားရေးဝန်ကြီး မာကို ရူဘီယိုကလည်း ဂရင်းလန်းကျွန်းနဲ့ ပတ်သက်တဲ့ ဝါရှင်တန်ရဲ့ အမျိုးသားလုံခြုံရေးဆိုင်ရာ စိုးရိမ်ချက်တွေကို အပြည့်အဝ ဖြေရှင်းနိုင်ခဲ့ပြီလို့ ပြောဆိုထားပါတယ်။

အမေရိကန်နိုင်ငံခြားရေးဝန်ကြီးဌာန တာဝန်ရှိသူတစ်ဦးရဲ့ အဆိုအရ နေတိုး (NATO) အဖွဲ့ဝင်မဟုတ်တဲ့ နိုင်ငံတွေကို ဂရင်းလန်းမှာ အခြေစိုက်စခန်း တည်ဆောက်ခွင့် ပိတ်ပင်ထားပြီး အမေရိကန်နဲ့ မဟာမိတ်နိုင်ငံတွေကိုသာ အရေးပါတဲ့ ရင်းနှီးမြှုပ်နှံမှုတွေ ပြုလုပ်ခွင့်ပြုထားတယ်လို့ ဆိုပါတယ်။

ဒါ့အပြင် ဂရင်းလန်းအနေနဲ့ အနာဂတ်မှာ လွတ်လပ်တဲ့နိုင်ငံတစ်နိုင်ငံ ဖြစ်လာခဲ့ရင်တောင် အမေရိကန်ရဲ့ အမြဲတမ်း ဝင်ရောက်ခွင့်၊ အခြေစိုက်ခွင့်နဲ့ လေကြောင်းဖြတ်သန်းခွင့်တွေ ဆက်လက်တည်ရှိနေမှာဖြစ်တယ်လို့ ဆိုပါတယ်။

Ref & Photo; Reuters

မြို့တော် News Channel