ရဲဘော်အချင်းချင်း စကားများပြီး သေနတ်လုကြရာက ကျည်ထွက်ကာ တိုက်နယ် ပကဖ တာဝန်ခံ အမျိုးသမီး အမရာမောင် ကျဆုံး
ဇူလိုင် ၃၀
မန္တလေးတိုင်း၊ တောင်သာမြို့နယ်မှာ PDF ရဲဘော်အချင်းချင်း သေနတ် လုကြရာက သေနတ်ကျည်ထွက်ပြီး ပကဖ တာဝန်ခံ အမျိုးသမီး လက်မောင်းမှတဆင့် ခန္ဓာကိုယ်ထဲသို့ ကျည်ဖောက်ဝင်ကာ တိုက်နယ်ပကဖ တာဝန်ခံအမျိုးသမီးဖြစ်သူ အမရာမောင် ကျဆုံးသွားခဲ့တယ်လို့ သိရပါတယ်။
ဇူလိုင်လ ၂၈ ရက်နေ့ ည ၁၀ နာရီခန့်က တောင်သာမြို့နယ် တနေရာမှာ ရုံးစည်ကြီး တိုက်နယ် ပကဖ လက်အောက်က PDF ရဲဘော်တွေဟာ စစ်ဆေးရေးဂိတ်တစ်ခုအနီးက ဇရပ်မှာ ထမင်းစားနေချိန် အချင်းချင်း စကားများရာက သေနတ်နဲ့ ထိုးချိန်ကြပြီးနောက် ကျန်တဦးက သေနတ်ကို ဆွဲလုရာက သေနတ်ကျည်ထွက်ပြီး နံဘေးမှာရှိတဲ့ တိုက်နယ် ပကဖ တာဝန်ခံ အမရာမောင်ကို ကျည်ထိမှန်ခဲ့တာလို့ ဆိုပါတယ်။
"ရဲဘော်သိန်းဌက်နဲ့ ရဲဘော် ရဲထက် တို့ စကားကြတာ၊ သိန်းဌက်က ရဲထက်ကို သေနတ်ကျည်ထိုးပြီး ပစ်ခတ်ဖို့ ဟန်ပြင်တာ၊ အဲ့တာနဲ့ ရဲဘော် ရဲထက်က သေနတ်ကို လုတာ၊ နှစ်ယောက်သား သေနတ်လုကြရင်းနဲ့ ကျည်ထွက်သွားတာ၊ ကျည်က ထမင်းခူးကျွေးနေတဲ့ အမရာမောင်ရဲ့ ဘယ်ဘက်လက်မောင်းကို ဖောက်ဝင်ပြီး ကျည်က ခန္ဓာကိုယ်ထဲထိ တိုးဝင်သွားတာ၊ ဆေးခန်းပို့ကြပေမယ့် သွေးထွက်လွန်ပြီး ကျဆုံးသွားတာ" လို့ အဆိုပါဖြစ်စဉ်ကိုသိတဲ့ နယ်မြေခံတဦးက မြို့တော်ကို ပြောပါတယ်။
ကျည်ထိမှန်ခဲ့တာကြောင့် ရုံးစည်ကြီးတိုက်နယ် ပကဖ တာဝန်ခံ အမရာမောင်(ခ) စွန်ရဲမမှာ လက်ပြင်ဖောက်ဝင်ဒဏ်ရာနဲ့ ဆေးကုဖို့ခေါ်ဆောင်ရာလမ်းမှာပဲ ကျဆုံးသွားခဲ့ရတယ်လို့ သိရပါတယ်။
သေနတ်နဲ့ ထိုးချိန်တဲ့ ရဲဘော် သိန်းဌက်နဲ့ စကားများ ရန်ဖြစ်သူ ရဲဘော် ရဲထက်တို့ကို တာဝန်ရှိသူတွေက ဖမ်းဆီးစစ်ဆေးနေတယ်လို့ ကနဦး သိရပါတယ်။
မြို့တော် News Channel
ပြည်တွင်းသတင်း
