မော်တော်ယာဉ်ကို ဗီနိုင်းချိတ်ဆွဲကာ လနဲ့ချီ အလှူခံစားနေတဲ့ အဖွဲ့ကို ထောင်ဒဏ် ၃ လနဲ့ ငွေကျပ် ၅ သောင်းစီ အမိန့်ချမှတ်

မော်တော်ယာဉ်ကို ဗီနိုင်းချိတ်ဆွဲကာ လနဲ့ချီ အလှူခံစားနေတဲ့ အဖွဲ့ကို ထောင်ဒဏ် ၃ လနဲ့ ငွေကျပ် ၅ သောင်းစီ အမိန့်ချမှတ်

စက်တင်ဘာ ၃

ပဲခူးတိုင်း၊ တောင်ငူခရိုင်၊ အုတ်တွင်းမြို့နယ်၊ ညောင်ခြေထောက်မြို့မှာ Light truck ကားကို ဗီနိုင်းချိတ်ဆွဲကာ လှည့်လည်အလှူခံ စားနေတဲ့ အဖွဲ့ကို ဩဂုတ်လ ၃၁ ရက်နေ့က ဖမ်းဆီးရမိခဲ့တယ်လို့ သိရပါတယ်။

အုတ်တွင်းမြို့နယ်အတွင်း ဘ/က အမည်ခံ ဗီနိုင်းနဲ့ အဖွဲ့တစ်ဖွဲ့ အလှူခံနေတယ်လို့ သတင်းရရှိခဲ့တာကြောင့် အုတ်တွင်းမြို့နယ် သာသနာတော် ထိန်းသိမ်းစောင့်ရှောက်ရေး အဖွဲ့က သွားရောက်စစ်ဆေးပြီး ဖမ်းဆီးခဲ့တာ ဖြစ်တယ်လို့ သိရပါတယ်။

အဆိုပါအဖွဲ့ဟာ ယခင်ကလည်း ပေါက်တောကျေးရွာမှာ လိမ်လည်အလှူခံတာကို မြို့နယ် သာ/ထိန်း အဖွဲ့က ဖမ်းမိခဲ့ဖူးပြီး ဦးဆောင်သူ ဗိန္ဓောဆရာက အသက်ကြီးနေတာကြောင့် နောက်ထပ် လိမ်လည်အလှူမခံဖို့ ခံဝန်ထိုးခိုင်းကာ ဗီနိုင်းတွေ သိမ်းဆည်းခဲ့ပြီး ပြန်လွှတ်ပေးခဲ့တဲ့ အဖွဲ့ဖြစ်တယ်လို့ သိရပါတယ်။

အဆိုပါအဖွဲ့ဟာ ကျောင်းရှစ်ဆယ်အုပ်စု ထန်းကုန်းရွာမှာ နေအိမ်တစ်လုံးကို တစ်လ (၁)သိန်းခွဲကျပ်ဖြင့် ငှားရမ်းနေထိုင်ပြီး ဗီနိုင်းပုံစံတမျိုးပြောင်းကာ ထပ်မံလိမ်လည် အလှူခံနေတာ ဖြစ်တယ်လို့ သိရပါတယ်။

ဖမ်းဆီးစဉ် ယာဉ်မောင်း အပါအဝင် အမျိုးသား ၆ ဦးနှင့် အမျိုးသမီး ၁ ဦး စုစုပေါင်း ၇ ဦးတို့ကို ဖမ်းဆီးရမိခဲ့ပြီး ခေါင်းဆောင်ဖြစ်သူဟာ ငှားရမ်းနေထိုင်တဲ့ ထန်းကုန်းကျေးရွာရှိ နေအိမ်မှာ ကျန်ရှိနေခဲ့တယ်လို့ သိရပါတယ်။

မော်တော်ယာဉ်ကို ဗီနိုင်းချိတ်ဆွဲကာ လှည့်လည်အလှူခံ စားနေတဲ့ ၈ ဦးကို အုတ်တွင်းမြို့နယ် တရားရုံးက စက်တင်ဘာလ ၃ ရက် ဒီကနေ့မှာ ထောင်ဒဏ် သုံးလနဲ့ ငွေကျပ် ၅ သောင်းစီ အမိန့်ချမှတ်ခဲ့တယ်လို့ သိရပါတယ်။

မြို့တော် News Channel