ကိုယ့်ပြည်သူတွေရဲ့ ရေဘေးဒုက္ခကို ထိထိရောက်ရောက် မလုပ်ဆောင်နိုင်တဲ့ အာဏာသိမ်းအစိုးရက နီပေါနိုင်ငံ သဘာဝဘေးကို ထောက်ပံ့လှူဒါန်း

ကိုယ့်ပြည်သူတွေရဲ့ ရေဘေးဒုက္ခကို ထိထိရောက်ရောက် မလုပ်ဆောင်နိုင်တဲ့ အာဏာသိမ်းအစိုးရက နီပေါနိုင်ငံ သဘာဝဘေးကို ထောက်ပံ့လှူဒါန်း

စက်တင်ဘာ ၃

အာဏာသိမ်း အစိုးရက နီပေါနိုင်ငံနှင့် တရုတ်နိုင်ငံ နယ်စပ်ဒေသမှ သဘာဝဘေးဒဏ်သင့် ပြည်သူတွေအတွက် အလှူငွေနှင့် စားသောက်ကုန်တွေကို ထောက်ပံ့လှူဒါန်းခဲ့တယ်လို့ သိရပါတယ်။

အာဏာသိမ်း အစိုးရ လက်အောက်ခံ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ဒုတိယဝန်ကြီး ဒေါက်တာ သန်းစိုးနှင့်အဖွဲ့က စက်တင်ဘာလ ၂ ရက်နေ့ မနေ့က မနက်ပိုင်းမှာ တပ်မတော် လေယာဉ် Y8 နဲ့ ရန်ကုန်မြို့မှ နီပေါနိုင်ငံ ကတ္တမန္ဒူးမြို့ရှိ Tribhuvan International Airport (KTM) သို့ သွားရောက် လှူဒါန်းခဲ့တာဖြစ်ပါတယ်။

"ကလေးမြို့မှာက တောက်လျှောက် ရေးကြီးနေတာ ဒီနေ့ထိပဲ။ ကလေးမြို့တင်ပဲလား ဆိုတော့ မဟုတ်ဘူး တနိုင်ငံလုံးနီးပါး ရေဘေးကြောင့် အတော်လေး ဒုက္ခရောက်နေကြတာ။ ကိုယ့်ပြည်သူတွေကိုကျ ဘာမှမလုပ်ပေးနိုင်ဘဲ သူများနိုင်ငံကို မျက်နှာလို မျက်နှာရ သွားလုပ်နေတာ။ ကိုယ့်ဆီမှာ ဘာဘေးဒုက္ခမှ မရှိနေလို့ ဆိုရင်တော့ တမျိုးပေါ့။ အတော့်ကို အသုံးမကျတဲ့ လူတွေလို့ပဲ ပြောချင်တယ်" လို့ ကလေးမြို့ ဒေသခံ တဦးက မြို့တော်ကို ပြောပါတယ်။

နီပေါနိုင်ငံကို လှူဒါန်းမှုအပေါ် လူသားချင်းစာနာထောက်ထားမှုအရ ကူညီထောက်ပံ့ခြင်း ဖြစ်ကြောင်း၊ နှစ်နိုင်ငံချစ်ကြည်ရေးနှင့် ပူးပေါင်းဆောင်ရွက်မှုတွေ တိုးမြှင့်ဆောင်ရွက်နိုင်မယ်လို့ မျှော်လင့်ကြောင်း၊ သဘာဝဘေးသင့် ပြည်သူတွေ အမြန်ဆုံး ပုံမှန်ဘဝသို့ ပြန်လည်ရောက်ရှိစေရေး အာဏာသိမ်းအစိုးရအဖွဲ့က ဆုမွန်ကောင်း တောင်းပေးထားပါသေးတယ်။

"ကိုယ့်နိုင်ငံတွင်းမှာ ရေဘေးဒဏ်ကြောင့် ပြည်သူတွေ အတိဒုက္ခရောက်နေချိန် ပြည်ပကို သွားလှူတာဟာ ပြည်သူ့အသက်အိုးအိမ်ထက် သူတို့ရပ်တည်မှု ရဖို့အရေးကိုသာ ပိုပြီး ဦးစားပေးတယ်ဆိုတာ ပေါ်လွင်နေပါတယ်။ နိုင်ငံတကာရဲ့ ဖယ်ကြဉ်ခံထားရမှုကို ကျော်လွှားဖို့ လူသားချင်းစာနာမှု ခေါင်းစဉ်တပ်ပြီး ဒေသတွင်းနိုင်ငံတွေကို ချဉ်းကပ်နေတာပါ။ ဒါပေမဲ့ ပြည်တွင်းက ကိုယ့်ပြည်သူတွေကို နည်းမျိုးစုံနဲ့ ဒုက္ခပေးပြီး လျစ်လျူရှုထားတဲ့ ဒီလို နိုင်ငံရေး အမြတ်ထုတ် လှည့်ကွက်မျိုးကို နိုင်ငံတကာ အသိုင်းအဝိုင်းက လွယ်လွယ်နဲ့ အသိအမှတ်ပြု လက်ခံပေးမှာ မဟုတ်ပါဘူး" လို့ နိုင်ငံရေးသမား တဦးက မြို့တော်ကို ပြောပါတယ်။

နီပေါနိုင်ငံ သိပ္ပံ၊ နည်းပညာနှင့် တီထွင်ဆန်းသစ်မှု ဝန်ကြီးဌာန ထံ မတ်ပဲ ၅ တန်၊ ကုလားပဲ ၃ တန်၊ စုစုပေါင်း ပဲ ၈ တန်နှင့် အမေရိကန် ဒေါ်လာ ၅ သိန်း တို့ကို အာဏာသိမ်းအစိုးရက ထောက်ပံ့လှူဒါန်း ပေးအပ်ခဲ့တယ်လို့ သိရပါတယ်။

မြို့တော် News Channel