အဆိုတော် ကိုင်ဇာ အဆုတ်ထဲ ပိုးဝင်လို့ ဆေးကုသရင်း ကွယ်လွန်

ကိုယ်ပိုင်သံစဉ်တေးသီချင်းတွေနဲ့ အောင်မြင်ကျော်ကြားခဲ့တဲ့ အဆိုတော်ကိုင်ဇာ ဩဂုတ်လ၂၂ ရက် မနေ့က ည ၇ နာရီခန့်က ကွယ်လွန်သွားပြီ ဖြစ်တယ်လို့ သိရပါတယ်။

အဆိုတော် ကိုင်ဇာ (ခ) ဦးညီညီဝင်း ဟာ အဆုတ်ထဲပိုးဝင်တဲ့ ရောဂါကြောင့် ဝိတိုရိယဆေးရုံရဲ့ အထူးကြပ်မတ်ကုသဆောင်မှာ ဆေးကုသနေရင်း ကွယ်လွန်ခဲ့တာလို့ သိရပါတယ်။

"ဆုတောင်းမပြည့်ခဲ့ပါဘူး၊ ချစ်သူငယ်ချင်း ကိုညီ ယခုည (၂၂.၈.၂၀၂၆) ၀၇၀၀ နာရီ အချိန်မှာ ဝိတိုရိယ ဆေးရုံမှာ ဘဝတပါးသို့ ကူးပြောင်းသွားပြီ ဖြစ်ကြောင်း သိရှိရပါတယ်၊ သင်္ဂြိုဟ်မည့်ရက်ကို ထပ်မံတင်ပြပါ့မယ်" လို့ အဆိုတော်ကိုင်ဇာရဲ့ မိတ်ဆွေတဦးက လူမှုကွန်ရက်ပေါ်မှာ အသိပေးထားပါတယ်။

အဆိုတော်ကိုင်ဇာဟာ ၁၉၇၇ ခုနှစ်မှာ 'အကျည်းတန်ရဲ့အထီးကျန်' အတ္ထုပ္ပတ္တိတေးစီးရီးနဲ့ ဂီတလောကထဲကို စတင်ဝင်ရောက်လာခဲ့တာဖြစ်ပြီး အနမ်းပန်း၊ သီချင်းရှင်ကို ကြင်နာပါ၊ တူနှစ်ကိုယ်တိုင်းပြည်၊ အင်းလေးမှာရွာတဲ့မိုး၊ မိမိုးကို စတဲ့သီချင်းတွေနဲ့ နာမည်ကျော်ကြား လူသိများခဲ့တာလည်း ဖြစ်ပါတယ်။

တေးရေး၊ တေးဆို၊ အဆိုတော် ကိုင်ဇာ ဟာ ကွယ်လွန်ချိန်မှာ အသက် ၆၆ နှစ် ရှိပြီဖြစ်တယ်လို့ သိရပါတယ်။