ကျိုင်းတုံမှာ ပရိဘောဂဆိုင်ပိုင်ရှင်ရဲ့ သမီးကို နေ့လယ်ခင်းကြီး ပေါ်တင်ပြန်ပေးဆွဲမှု ဖြစ်ပွား

ကျိုင်းတုံမှာ ပရိဘောဂဆိုင်ပိုင်ရှင်ရဲ့ သမီးကို နေ့လယ်ခင်းကြီး ပေါ်တင်ပြန်ပေးဆွဲမှု ဖြစ်ပွား

ဇူလိုင် ၃

‎ရှမ်းပြည်နယ်အရှေ့ပိုင်း ကျိုင်းတုံမြို့မှာ ပရိဘောဂဆိုင်ရှင်ရဲ့ သမီးကို အမျိုးသား ၄ ဦးက ပြန်ပေးဆွဲ ဖမ်းဆီးသွားတယ်လို့ သိရပါတယ်။

ဇူလိုင်လ ၂ ရက် နေ့လယ် ၃ နာရီဝန်းကျင်က ကျိုင်းတုံမြို့ အမှတ်(၄) ရပ်ကွက်၊ နွဲနော်ရပ်က “ကိုစိုင်းလွတ်” ပရိဘောကဆိုင်ရှေ့ကို အိမ်စီးကားအဖြူစီးလာတဲ့ အမျိုးသား ၄ ဦးက သေနတ်အရှည် ကိုယ်စီကိုင်ထားကာ ဆိုင်ရှင်ရဲ့ သမီးဖြစ်သူကို ကားပေါ် ဆွဲခေါ်သွားခဲ့တယ်လို့ သိရပါတယ်။

“နေ့လယ်ကြီး ပေါ်တင်လုပ်သွားတာ၊ ဖြစ်တဲ့နေရာက ရဲစခန်းနဲ့လည်း နီးတယ်၊ ဒီမှာက လုယက်မှု ပြန်ပေးဆွဲမှုတွေနဲ့ မူးယစ်ဆေး လောင်းကစား အကုန်ရှိတော့ မြို့ကပျက်စီးနေတာ၊ ရဲကလည်း အကုန်လုံးကို ကြောက်ရတယ်၊ ဘာမှအရေးယူနိုင်တာ မရှိဘူး” လို့ ကျိုင်းတုံမြို့ခံတဦးက မြို့တော်ကို ပြောပါတယ်။

‎ကျိုင်းတုံမြို့မှာ မူးယစ်ဆေးနဲ့ လောင်းကစားဝိုင်းတွေအပြင် ကျားဖြန့်ဂိုဏ်းတွေလည်းရှိနေပြီး ရာဇဝတ်မှု အတော်များများကို အာဏာသိမ်းအစိုးရလက်အောက်ခံ ရဲတပ်ဖွဲ့က ဖမ်းဆီးနိုင်ခြင်း မရှိဘူးလို့ သိရပါတယ်။

“မေလလောက်က ရွှေဆိုင်ပိုင်ရှင် ဓားပြတိုက်သတ်ဖြတ်ခံရတဲ့အမှု ခုထိ တရားခံမမိသေးဘူး၊ တခြား လုယက်မှု ခိုးမှုတွေ ဘာမှကိုမမိဘူး၊ အဲ့တော ခိုးဆိုးလုယက်တာတွေက ပေါ်တင်လုပ်လာကြတယ်” လို့ ကျိုင်းတုံမြို့ခံတဦးက ထပ်မံပြောဆိုပါတယ်။

ဇူလိုင်လ ၂ ရက်နေ့ ညပိုင်း ၈ နာရီခန့်ကလည်း လူငယ်ချင်း စကားများရာက ဓားခုတ်မှုဖြစ်ခဲ့ပြီး ဇွန်လ ၂၅ ရက်နေ့ညကလည်း ကျိုင်းတုံမြို့နယ် ကျိုင်းကာကျေးရွာက အသက် ၂၀ ကျော်အရွယ် အမျိုးသား စီးလာတဲ့ ဆိုင်ကယ်နဲ့ ဖုန်းကို အမျိုးသား ၄ ဦးက လုယက်ကာ လူကိုလည်း ရိုက်နှက်ခဲ့တဲ့ဖြစ်စဉ် ဖြစ်ပွားခဲ့ပါသေးတယ်။

မြို့တော် News Channel

#myotawnpt
#Myotaw