ကျောက်မြောင်းမြို့ - သပိတ်ကျင်းမြို့ကြားမှာ အာဏာသိမ်းစစ်တပ်ရဲ့ ရေယာဉ်အုပ်စုကို တော်လှန်ရေးတပ်တွေက ပစ်ခတ်တိုက်ခိုက်

ရွှေကူ - ဗန်းမော်အတွက် စစ်ကူလာတဲ့ အာဏာသိမ်းစစ်တပ် ရေယာဉ်အုပ်စုကို တော်လှန်ရေး တပ်ဖွဲ့တွေက ကျောက်မြောင်း - သပိတ်ကျင်းမြို့ကြားမှာ တိုက်ခိုက်ခဲ့တယ်လို့ ဒေသတွင်းသတင်းရင်းမြစ်ထံက သိရပါတယ်။

သြဂုတ်လ ၂၃ ရက်နေ့က အာဏာသိမ်းစစ်တပ် ရေယာဉ်အုပ်စုဟာ ကျောက်မြောင်း - သပိတ်ကျင်းမြို့ ကြားကို ဖြတ်သန်းနေချိန်မှာ တော်လှန်ရေးတပ်တွေက FPV အပါအဝင် ဒရုန်းတွေနဲ့ တိုက်ခိုက်ခဲ့တာ ဖြစ်တယ်လို့ သိရပါတယ်။

“မနေ့က သုံးနေရာ ထိတွေ့မှု ဖြစ်တယ်။ စစ်တပ်ဘက်က အထိနာတယ်။ အကြီးအကဲ အဆင့်ရှိသူတွေ သေတာထိ ရှိတယ်လို့ သတင်းရထားတယ်။ အတည်တော့ မပြုနိုင်သေးပေမဲ့ ဖြစ်နိုင်ချေများတယ်” လို့ တော်လှန်ရေးရဲဘော်တဦးက ပြောပါတယ်။

အာဏာသိမ်းစစ်တပ်ရဲ့ ရေယာဉ်အုပ်စုဟာ ဧရာဝတီမြစ်ကြောင်းကို အသုံးပြုပြီး မန္တလေးမြို့ကနေ ထွက်ခွာလာတာဖြစ်ပြီး ဒီကနေ့မှာ တကောင်းမြို့ကို ရောက်ရှိနေပြီ ဖြစ်တယ်လို့ သိရပါတယ်။

တိုက်ပွဲတွေ ပြင်းထန်နေတဲ့ ရွှေကူမြို့နှင့် ဗန်းမော်မြို့ကို အာဏာသိမ်း စစ်တပ်က KIA ပူးပေါင်း PDF တပ်တွေရဲ့ ထိန်းချုပ်မှုမခံရအောင် လေကြောင်းပစ်ကူတွေနဲ့ တိုက်ခိုက်နေတယ်လို့ သိရပါတယ်။

ပြီးခဲ့တဲ့ သြဂုတ်လ ၂၂ ရက်နေ့ကလည်း အာဏာသိမ်း စစ်တပ်က ဂျက်ဖိုက်တာတွေနဲ့ ဗုံးကြဲတိုက်ခိုက်ခဲ့တဲ့အတွက် ပြည်သူ့ကာကွယ်ရေး ရဲဘော် ၂ ဦး ကျဆုံးခဲ့ရပါတယ်။