ကျောက်ပန်းတောင်းမြို့နယ်မှာ အာဏာသိမ်း စစ်တပ်က ရွှေထည်ပစ္စည်းတွေ လုယူသွားပြီး နေအိမ်တွေကို မီးရှို့ဖျက်ဆီးခဲ့

ကျောက်ပန်းတောင်းမြို့နယ်မှာ အာဏာသိမ်း စစ်တပ်က ရွှေထည်ပစ္စည်းတွေ လုယူသွားပြီး နေအိမ်တွေကို မီးရှို့ဖျက်ဆီးခဲ့

စက်တင်ဘာလ ၄

မန္တလေးတိုင်း၊ ညောင်ဦးခရိုင်၊ ကျောက်ပန်းတောင်းမြို့နယ်မှာ အာဏာသိမ်းစစ်တပ် တပ်ဖွဲ့ဝင်တွေက သေနတ်ထောက် ခြိမ်းခြောက်ကာ ဖုန်းနဲ့ ရွှေထည်ပစ္စည်းတွေ လုယူသွားပြီး နေအိမ်တွေကိုလည်း မီးရှို့သွားခဲ့တယ်လို့ ဒေသခံတွေရဲ့ သတင်းပေးပို့မှုအရ သိရပါတယ်။

အင်အား ၁၀၀ နီးပါးခန့်ပါတဲ့ အာဏာသိမ်းစစ်တပ် စစ်ကြောင်းဟာ စက်တင်ဘာလ ၂ ရက်နေ့ ညနေ ၃ နာရီခန့်က ကျောက်ပန်းတောင်းမြို့နယ်၊ ပုပ္ပါးလွင်ကျေးရွာအုပ်စု၊ ပုပ္ပါးတောင်မကြီး မြောက်ဘက် ပိုဇိုလန်စက်ရုံ အနီးရှိ ချိုင်းကျေးရွာအတွင်းကို သေနတ်တွေ ပစ်ဖောက်ကာ ဝင်ရောက်လာတာ ဖြစ်တယ်လို့ သိရပါတယ်။

"သေနတ်တွေ ပစ်ဖောက်ပြီး ရွာထဲကို ဝင်လာတာ။ ရွာအဝင်နားမှာ နေထိုင်တဲ့ အမျိုးသမီး ၂ ဦးနေအိမ်ပေါ်ကို တက်သွားပြီး နားကပ်တွေ၊ ဖုန်းတွေကို အတင်းတောင်းတယ်။ မပေးရင် နေအိမ်ကို မီးရှို့ပစ်မယ်လို့ သေနတ်ထောက်ပြီး ခြိမ်းခြောက်တောင်းသွားတယ်" လို့ ဒေသခံ အမျိုးသားတဦးက မြို့တော်ကို ပြောပါတယ်။

အဲ့ဒီနောက် အာဏာသိမ်းစစ်တပ် တပ်ဖွဲ့ဝင်တွေဟာ သက်ကြီးရွယ်အိုတွေပါ မချန် ဒေသခံတွေကို သေနတ်နဲ့ချိန်ကာ နေအိမ်အတွင်းကနေ ရွာအပြင်အထိ ခေါ်ထုတ်သွားခဲ့တယ်လို့ ဆိုပါတယ်။

ဒေသခံတွေကို ကျေးရွာအပြင်ရှိ ညောင်ပင်အောက်မှာ စုဝေးထားရှိကာ ရွာအတွင်းက ပြည်သူ့နေအိမ် ၆ လုံး ကို ရယ်မောပျော်ရွှင်စွာ မီးရှို့ဖျက်ဆီးခဲ့ပြီး ထွက်ခွါသွားကြတယ်လို့ သိရပါတယ်။

မြို့တော် News Channel