လူထုခေါင်းဆောင် ဒေါ်အောင်ဆန်းစုကြည် မွေးနေ့အတွက် ဆွမ်းကပ်ပြီး မွေးနေ့ဆုတောင်းစာတင်ခဲ့တဲ့ NLD အမတ်ဟောင်း ဒေါက်တာစောနိုင် ထောင် ၃ နှစ် ချမှတ်ခံရ
ဇူလိုင် ၂၆
လူထုခေါင်းဆောင် ဒေါ်အောင်ဆန်းစုကြည်ရဲ့ ၈၁ နှစ်ပြည့်မွေးနေ့အတွက် သံဃာတော်တွေကို ဆွမ်းနဲ့လှူဖွယ်ပစ္စည်းတွေ လှူဒါန်းပြီး မွေးနေ့ဆုတောင်းစာတင်ခဲ့တာကြောင့် အဖမ်းခံထားရတဲ့ NLD ပြည်သူ့လွှတ်တော်ကိုယ်စားလှယ်ဟောင်း သွားဘက်ဆိုင်ရာဆရာဝန် ဒေါက်တာစောနိုင်ကို အာဏာသိမ်းစစ်အစိုးရက ထောင်ဒဏ် ၃ နှစ် ချမှတ်လိုက်ရတယ်လို့ သိရပါတယ်။
ဒေါက်တာစောနိုင်ဟာ ဇွန် ၁၉ ရက်နေ့မှာ ကျရောက်တဲ့ ဒေါ်အောင်ဆန်းစုကြည်ရဲ့ ၈၁ နှစ်ပြည့်မွေးနေ့အတွက် တန်းဆွမ်းကြွနေတဲ့ သံဃာတော်တွေကို ဆွမ်း၊ ဟင်း၊ အလှူငွေနဲ့ သင်္ကန်းတွေ လှူဒါန်းခဲ့ပြီး ဒေါ်အောင်ဆန်းစုကြည် ကျန်းမာရေးကောင်းမွန်ကာ အလုံးစုံ အပြီးအပြတ် အမြန်ဆုံး လွတ်မြောက်ပါစေကြောင်း Facebook လူမှုကွန်ရက်မှာ ဆုတောင်းစာတင်ခဲ့တာ ဖြစ်ပါတယ်။
အဲဒီနောက် ဇွန် ၁၉ ရက်နေ့မှာပဲ အာဏာသိမ်းစစ်တပ်နဲ့ ရဲတပ်ဖွဲ့ဝင်တွေက ဒေါက်တာစောနိုင်နဲ့ ဇနီးဖြစ်သူကို တောင်ဥက္ကလာပမြို့နယ်က နေအိမ်မှာ လာရောက်ဖမ်းဆီးခဲ့ပြီး ဇနီးဖြစ်သူကိုတော့ နောက်ပိုင်းမှာ ပြန်လွှတ်ပေးခဲ့ကာ ဒေါက်တာစောနိုင်ကိုတော့ နိုင်ငံတော်အကြည်ညိုပျက်စေမှု ပုဒ်မ ၅၀၅ (က) နဲ့ အမှုဖွင့်အရေးယူခဲ့ကာ အင်းစိန်ထောင်ကို ပိုခဲ့ပြီးနောက် အခုလို ထောင်ဒဏ် ၃ နှစ် ချမှတ်လိုက်တာဖြစ်ပါတယ်။
ရာဇသတ်ကြီး ဥပဒေပုဒ်မ ၅၀၅(က)အရ အများဆုံး ထောင်ဒဏ် ၃ နှစ် အထိဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံး ဖြစ်စေ ချမှတ်နိုင်တာဖြစ်ပြီး အာဏာသိမ်းစစ်အစိုးရက ဒေါက်တာစောနိုင်ကို အမြင့်ဆုံးပြစ်ဒဏ် ချမှတ်လိုက်တာလည်း ဖြစ်ပါတယ်။
ဒေါက်တာစောနိုင်ဟာ ၂၀၁၅ ရွေးကောက်ပွဲမှာ တောင်ဥက္ကလာပမြို့နယ်ကနေ NLD ပါတီကိုယ်စားပြု ဝင်ရောက်ယှဉ်ပြိုင်ခဲ့ကာ အနိုင်ရခဲ့ပြီး ပြည်သူ့လွှတ်တော်ကိုယ်စားလှယ်အဖြစ် ရွေးကောက်တင်မြှောက်ခံခဲ့ရသူ ဖြစ်ပါတယ်။ ၂၀၂၀ ရွေးကောက်ပွဲမှာတော့ ဆက်လက်ဝင်ရောက်ယှဉ်ပြိုင်ခဲ့ခြင်း မရှိဘူးလို့ သိရပါတယ်။
မြို့တော် News Channel
ပြည်တွင်းသတင်း
