အင်းငါးခွ သကြားစက်ရုံမှာ ကြံဝယ်ယူမှုဈေးနှုန်း လျော့ဝယ်မယ်လို့ သတင်းတွေ ထွက်ပေါ်နေ
အောက်တိုဘာ ၈
ပဲခူးတိုင်း၊ ပေါက်ခေါင်းမြို့နယ်က အင်းငါးခွ သကြားစက်ရုံမှာ ကြံ ၁ တန်ကို အရင်နှစ်ကထက် ဈေးလျော့ပြီး ဝယ်မယ်လို့ သတင်းထွက်ပေါ်နေပြီး ကြံစိုက်တောင်သူတွေအဖို့ အခက်တွေ့နေတယ်လို့ သိရပါတယ်။
ပြီးခဲ့တဲ့ ၂၀၂၅ ခုနှစ်က ကြံ ၁ တန်ကို ၁၇၀၀၀၀ ကျပ်နဲ့ စက်ရုံအရောက် ဝယ်ယူခဲ့ရာက ယခုနှစ် သကြားထုတ်လုပ်မှု ပြည်ပပို့ကုန် မရှိတော့တာကြောင့်နဲ့ ပြည်တွင်းသကြားဈေး ကျဆင်းလာတာတွေကြောင့် အခုလို ဈေးလျော့ပြီး ဝယ်တာလို့ သိရပါတယ်။
အင်းငါးခွ သကြားစက်ရုံက ကြံ ၁ တန်ကို စက်ရုံအရောက် ၁၃၉၀၀၀ ကျပ်သာ ပေးမယ်လို့ သိရပြီး ယခင်နှစ်ထက် ၃ သောင်းကျော် ဈေးလျော့ဝယ်ယူဖို့ ပြင်နေတာကြောင့် ကြံစိုက်ပျိုးရိတ်သိမ်းတဲ့ ကုန်ကျစရိတ်တွေနဲ့ စက်ရုံအရောက် ကားခတွေ မြင့်တက်မှုကြောင့် တောင်သူတွေ အခက်ကြုံနေရတယ်လို့ သိရပါတယ်။
“အရင်နှစ်လို ၁၇၀၀၀၀ လောက်ပေးရင်တောင် ခုသာခံသာ ရှိသေးတယ်။ ခုဈေးနဲ့ဆို ကားခက ၃ သောင်းနဲ့ တွက်ရင် ၁ သိန်းပဲ လက်ထဲကျန်မယ်။ စိုက်ပျိုးရိတ်သိမ်းခတွေနဲ့ အထွေထွေစရိတ်နဲ့ဆိုရင် တောင်သူတွေ လုပ်အားရှုံးပြီး ဘာမှမကျန်တော့ဘူး” လို့ ကြံစိုက်တောင်သူတဦးက ပြောပါတယ်။
ပြီးခဲ့တဲ့ ၂၀၂၅ ခုနှစ်က စစ်ကိုင်းတိုင်းထဲမှာ ကြံစိုက်တောင်သူတွေရဲ့ ကြံတွေကို သကြားစက်ရုံတွေက တခြားစက်ရုံတွေထက် ဈေးနှိမ်ဝယ်ယူခဲ့တာကြောင့် ကြံစိုက်တောင်သူတွေ အရှုံးပေါ်ခဲ့ပါသေးတယ်။
ကြံစိုက်တောင်သူတွေ အရှုံးပေါ်ခဲ့တာကြောင့် ၂၀၂၆ ခုနှစ်မှာ စစ်ကိုင်းတိုင်းအထက်ပိုင်းက ကြံစိုက်ပျိုးမှု သိသိသာသာ လျော့ကျလာခဲ့ပြီး လာမယ့်နှစ်တွေမှာ သကြားထုတ်လုပ်မှုလည်း လျော့ကျလာနိုင်တယ်လို့ သိရပါတယ်။
မြို့တော် News Channel