စဥ့်ကူးမြို့နယ်မှာ အမည်မသိလက်နက်ကိုင်အဖွဲ့က နေအိမ်ထဲထိ ဝင်ရောက်ပစ်ခတ်လို့ ၅ ဦး သေဆုံးကာ ၂ ဦး ဒဏ်ရာရ

မန္တလေးတိုင်း၊ စဥ့်ကူးမြို့နယ်၊ ပင်လယ်ကြီးကျေးရွာမှာ အမည်မသိ လက်နက်ကိုင်ဆောင်ထားသူတွေက နေအိမ်ထဲ ဝင်ရောက်ပစ်ခတ်သွားလို့ ၅ ဦး သေဆုံးကာ ၂ ဦး ဒဏ်ရာရခဲ့တယ်လို့ သိရပါတယ်။

ဩဂုတ်လ ၂၀ ရက်နေ့ ည ၇ နာရီဝန်းကျင်ခန့်က အမည်မသိ လက်နက်ကိုင်ထားတဲ့ လူ ၆ ယောက်က ဆိုင်ကယ် ၂ စီးနဲ့ ပင်လယ်ကြီးကျေးရွာထဲက ဦးထွန်းထွန်းဝင်း နေအိမ်ကို ရောက်လာကာ အိမ်ထဲမှာ စကားပြောနေကြတဲ့သူတွေကို သေနတ်နဲ့ ပစ်ခတ်ခဲ့တာလို့ သိရပါတယ်။

"ဦးထွန်းထွန်းဝင်းတို့ လင်မယားရယ်၊ ယောက္ခမကြီးရယ်၊ ရွာထဲက ၂ ယောက်ရယ် သေတယ်။ ကျန်တဲ့ ၂ ယောက်က ဆေးရုံတင်ထားရတယ်။ သူတို့က အုပ်ကြီးတွေဘာတွေလည်း မဟုတ်ဘူး၊ ရွာမှာတော့ မျက်နှာဖုံး လူသိများတဲ့သူတွေပါ" လို့ ဒေသခံအမျိုးသမီးတဦးက ပြောပါတယ်။

လက်နက်ကိုင်အဖွဲ့ရဲ့ နေအိမ်အတွင်း ဝင်ရောက်ပစ်ခတ်မှုကြောင့် မိသားစုဝင် ၃ ဦး အပါအဝင် ၅ ဦး သေဆုံးခဲ့ကာ ၂ ဦး ထိခိုက်ဒဏ်ရာ ရရှိခဲ့တယ်လို့ သိရပြီး သေဆုံးသူတွေဟာ ဦးထွန်းထွန်းဝင်းနဲ့ ဇနီးဖြစ်သူ ဒေါ်ဇာခြည်ဝင်း၊ ယောက္ခမဖြစ်သူ ဒေါ်ဝင်းမြိုင်၊ ကျေးရွာမှာနေထိုင်သူ ကိုရှမ်းလေးနဲ့ ကိုထွန်းမြင့်အောင်တို့ ဖြစ်တယ်လို့ သိရပါတယ်။

ပြီခဲ့တဲ့ ဇူလိုင်လတုန်းကလည်း စဥ့်ကူးမြို့နယ်၊ နွယ်ရုံကျေးရွာက အမျိုးသား ၅ ဦးနဲ့ ရွှေဒုံးကျေးရွာက ရပ်ကျေးအုပ်ချုပ်ရေးမှူးအပါအဝင် အမျိုးသား ၂ ဦး ပစ်ခတ်ရှင်းလင်းတာ ခံရသေးတယ်လို့ သိရပါတယ်။